“Azərbaycan Respublikasının 2021-ci il dövlət büdcəsi haqqında” qanun layihəsində müdafiə xərclərinin bu illə müqayisədə artırıldığı qeyd edilib.
Müdafiə və milli təhlükəsizlik, məhkəmə hakimiyyəti, hüquq-mühafizə orqanlarının və prokurorluğun saxlanılması xərcləri üçün 2021-ci ilin dövlət büdcəsi xərclərinin 23,4 faizi həcmində (2020-ci illə müqayisədə 2,5 faiz-bənd çox) və ya 6678,6 milyon manat vəsait nəzərdə tutulub ki, bu da 2020-ci ilə nisbətən 937,7 milyon manat və ya 16,3 faiz çoxdur.
Müdafiə və milli təhlükəsizlik, məhkəmə hakimiyyəti, hüquq-mühafizə orqanlarının və prokurorluğun saxlanılması xərcləri üzrə nəzərdə tutulmuş vəsaitin 4585,8 milyon manatı və ya 68,7 faizi (2020-ci ilə nisbətən 781,6 milyon manat və ya 20,5 faiz çox) müdafiə və milli təhlükəsizliyin maliyyələşdirilməsinə, 2092,8 milyon manatı və ya 31,3 faizi (2020-ci ilə nisbətən 156,1 milyon manat və ya 8,1 faiz çox) məhkəmə hakimiyyəti, hüquq-mühafizə və prokurorluq orqanlarının saxlanılması xərclərinə yönəldiləcək.
Kirayəyə götürülmüş yaşayış sahəsinə görə yaşayış yeri olmayan hərbi qulluqçulara (ehtiyatda və istefada olan hərbi qulluqçular nəzərə alınmaqla) ödənilən pul kompensasiyası üçün 2021-ci ilin dövlət büdcəsində 85,2 milyon manat vəsait nəzərdə tutulub. Aztəminatlı əhaliyə dövlət hesabına həyata keçirilən hüquqi yardım üçün növbəti ilin dövlət büdcəsində 4,8 milyon manat vəsait proqnozlaşdırılıb. 2021-ci ilin dövlət büdcəsinin müdafiə və milli təhlükəsizlik, məhkəmə hakimiyyəti, hüquq-mühafizə və prokurorluq xərcləri bölmələrindən maliyyələşən təşkilatların büdcədənkənar xərcləri 294,7 milyon manat təşkil edəcək ki, bu da 2020-ci illə müqayisədə 17,5 milyon manat və ya 6,3 faiz çoxdur.
Büdcənin təhlili göstərir ki, Azərbaycan 2021-ci ildə hərbi büdcəsini 2,7 milyard dollaradək artırmağı planlaşdırır. Bu da 2020-ci ildəki rəqəmləri üstələyir.
Müharibədə qalib gəlsək də, hərbi büdcəmizin artırılmasını zəruri edən səbəblər nədən ibarətdir?
“Şəxsi heyətin əmək haqlarının da əhəmiyyətli dərəcədə artırılması nəzərdə tutulur”
Hərbi ekspert, ehtiyatda olan polkovnik-leytenant Daşdəmir Əliyev “Bakı-Xəbər”ə açıqlamasında bildirdi ki, bu gün biz rəşadətli ordumuzla fəxr edirik: “Ali Baş Komandanın rəhbərliyi ilə biz layiq olduğumuz qələbəyə nail olmuşuq. Hərbi büdcəmiz gələn il üçün artırılıb. İlk baxışda adama belə gələ bilər ki, qalib gəlmişiksə, bu qədər hərbi büdcəyə nə ehtiyac var? İzahı budur ki, biz itirdiymiz torpaqlarımızı geri qaytarmışıq, amma bununla iş bitmir. Həmin geniş əraziləri qoruyub saxlamaq lazımdır. Bunun üçün də kifayət qədər hərbi güc və şəxsi heyət tələb edilir. İşğaldan azad edilən bölgələrində bizim digər ərazilərimizdə olan müasir tipli hərbi hissələrimiz yoxdur. Bunu yaratmaq lazımdır. Eyni zamanda, bizim dövlət sərhədimiz bütünlüklə öz nəzarətimizə keçib. Sərhədlərin qorunması üçün də xeyli yeni infrastruktur yaratmaq lazımdır. Həmin ərazilərdə zabit, gizir və MAXE heyətinin ailələrinin də yaşaması üçün normal şərait yaradılmalıdır. Bunun üçün normal şəraiti olan hərbi şəhərciklər tikilməlidir. Eyni zamanda, işğaldan azad edilmiş ərazilərin mütləq mənada minalardan təmizlənməsi və həmin ərazilərdə təhlükəsizliyin tam təmin olunması gərəkdir. Büdcənin artmasının bir səbəbi də bu müharibədən çıxarılan əsaslı nəticə ilə bağlıdır. Biz ən müasir silahlarla qalib gəldik. Sübut olundu ki, bəzi “sovetdən” qalma silahları ordunun arsenalından çıxarmaq lazımdır. Bu da xeyli vəsait tələb edir. Biz, eyni zamanda, hərbi sənayemizin inkişafına da diqqət yetiririk. Özümüzün istehsalımız olan bəzi silahlarımız da bu döyüşlərdə sınaqdan üzü ağ çıxdı. Hərbi xərclərin böyük bir hissəsini şəxsi heyətin təminatının yaxşılaşmasına sərf edirik. Onun ilin bütün fəsillərinə uyğun olaraq müasir geyim dəstləri ilə təmin olunması lazımdır. Son günlərdə gördük ki, müharibədən sonra ordumuzun əsgər və zabitlərlə bağlı təminatını daha da yaxşılaşdırmaq nəzərdə tutulur. Yəqin ki, şəxsi heyətin əmək haqlarının da əhəmiyyətli dərəcədə artırılması nəzərdə tutulur”.
Ekspertin sözlərinə görə, bütün bunlar bizim hərbi büdcəmizin artımını zəruri edir.
Məhəmmədəli QƏRİBLİ
