Adını Azərbaycanın dövlətçilik tarixinə müzəffər Ali Baş Komandan, qalib sərkərdə, Azərbaycan xalqına zəfər bəxş edən, ərazi bütövlüyümüzü təmin edən Prezident kimi həkk edən ölkə başçısı İlham Əliyevin dekabrın 24-də doğum günüdür.
Məlum olduğu kimi, bir sıra dövlət və hökumət başçıları, ictimai-siyasi xadimlər Prezident İlham Əliyevin ünvanına təbrik məktubları göndərir, bəzi dövlət rəhbərləri isə telefonla zəng edərək cənab Prezidenti ad günü münasibətilə təbrik edirlər.
Prezident İlham Əliyevə ünvanlanan təbriklərin məzmunu bu dəfə bir qədər fərqlidir, burada “Azərbaycanın ərazi bütövlüyünü təmin edən sərkərdə”, “əraziləri qaytaran sərkərdə”, “Azərbaycan xalqının 27 illik həsrətinə son qoyan dövlət başçısı”, “Qarabağ həsrətinə son qoyan və əzəli Azərbaycan torpaqlarında sülh və rifahın bərqərar olması ilə tarixi ədalət bərpa edən Prezident” kimi saysız xoş epitet əksini tapıb. Prezidentə ünvanlanan ad günü təbriklərində bu notlar üstünlük təşkil edir.
“...Azərbaycanın ərazi bütövlüyünü təmin edən böyük dövlət, siyasət xadimi olaraq yüksək qiymətləndirirlər”
Azərbaycan Milli Elmlər Akademiyasının (AMEA) A.Bakıxanov adına Tarix İnstitutunun aparıcı elmi işçisi, tarix elmləri doktoru Vaqif Abışov Prezidentə ünvanlanan ad günü təbriklərində bu kimi xoş epitetlərin üstünlük təşkil etməsinin təsadüfi olmadığını bildirdi. “Hesab edirəm ki, Ali Baş Komandana ünvanlanan təbrik məktublarında əks olunan bu xoş epitetlər, bu qiymətli fikirlər İlham Əliyevin 17 illik Prezidentlik fəaliyyətinin uğurlu nəticəslərinə verilən qiymətdir. Cənab Prezidentin 17 illik hakimiyyəti dövründə bütün sferalarda - sosial, iqtisadi, siyasi, humanitar, hərbi sahələrdə çox düzgün, dəqiq strateji xətt götürülüb və bu xətt də özünü son nəticədə doğrultdu. Bu gün bu nəticələrə dünya ölkələrinin başçıları tərəfindən yüksək qiymət verilir. Prezidentə ad günü təbrikləri ünvanlayan xarici dövlət və hökumət başçılarının, ictimai-siyasi xadimlərin bir çoxu öz məktublarında Ali Baş Komandanı “əraziləri azad edən sərkərdə” adlandıraraq, onu erməni işğalçılarını torpaqlarımızdan qovub çıxaran, Azərbaycanın ərazi bütövlüyünü təmin edən böyük dövlət, siyasət xadimi olaraq yüksək qiymətləndirirlər. Bu təbiidir. İlham Əliyev böyük dövlət xadimi, müzəffər sərkərdə kimi həm xalqımız, həm də beynəlxalq aləm tərəfindən öz layiqli qiymətini alıb. Bu qiyməti də bütün sahələr üzrə yeritdiyi mükəmməl siyasətə, 44 günlük müharibədə Azərbaycanı zəfərə qovuşdurduğuna, torpaqlarımızı işğaldan azad edərək ərazi bütövlüyümüzü təmin etdiyinə görə alıb. Bu mühüm hadisədir. Əminəm ki, bu tarixi hadisə illərlə yox, minillərlə, on min illərlə təkcə Azərbaycan tarixi kitablarında yox, dünya tarixi kitablarında əks olunacaq, dünyanın siyasi aləmində dəfələrlə vurğulanacaq, yazılacaq, gündəmə gələcək. Yəni dünyanın Qafqaz adlanan güşəsində Azərbaycan adlı belə bir dövlət var, Azərbaycan xalqı var və xalq özünün Ali Baş Komandanının, sərkərdəsinin, Prezidentinin rəhbərliyi altında 27 illik işğala son qoydu və yağı düşməni torpaqlarından qovub çıxardı. Bu təbrik məktublarında əks olunan dəyərli fikirlər Prezident İlham Əliyevin 17 illik hakimiyyəti dövründə həyata keçirdiyi praqmatik, uzaqgörən, düzgün siyasətə və onun rəhbərliyi altında ərazi bütövlüyümüzün təmin edilməsinə verilən birmənalı qiymətdir”.
Bu illər ərzində ölkə başçısının çox düzgün strateji xətt seçərək Azərbaycanın ərazi bütövlüyünü bərpa etməyə nail olduğunu deyən V.Abışov hesab edir ki, bu məqamlar da dünya liderlərinin diqqətindən qaça bilməz. “Prezidentin 17 illik hakimiyyəti bizə uğurlar, qələbə, zəfər bəxş edib. Torpaqlarımızı düşmən tapdağından azad etdiyinə və bizə zəfər bəxş etdiyinə görə cənab Prezidentə bir daha təşəkkürümüzü bildiririk. İnanın, bu uğurlu siyasət davam edəcək və Azərbaycanı yeni-yeni uğurlara aparacaq” - deyə V.Abışov qeyd etdi.
İradə SARIYEVA
