Güclü, qüdrətli Azərbaycanın sürətli tərəqqisini şərtləndirən amil mütəmadi səciyyə daşıyan ictimai-siyasi sabitlikdir. Azərbaycan cəmiyyəti Prezident İlham Əliyevin rəhbərliyi ilə həyata keçirilən siyasətin fonunda əldə edilmiş möhkəm ictimai-siyasi sabitliyi və sürətli iqtisadi inkişafı perspektiv tərəqqinin əsası kimi səciyyələndirir.
Cənab İlham Əliyevin rəhbərliyi ilə həyata keçirilən daxili və xarici siyasət kursunun nəticəsi kimi, bu gün Azərbaycan sözün əsl mənasında sabit bir ölkə kimi dəyərləndirilir. Azərbaycan dünya miqyasında ən sürətlə inkişaf edən ölkələr sırasında ən öncül yerlərdən birini tutur. Prezidentimizin rəhbərliyi ilə ölkəmizin daxilində və beynəlxalq miqyasda qazandığı uğurlar nəinki təkcə xalqımız tərəfindən , eyni zamanda nüfuzlu xarici analitik mərkəzlər, ekspertlər tərəfindən də yüksək qiymətləndirilir. Ali Baş Komandanımız dünyada nüfuzlu, uzaqgörən lider kimi tanınır. Milli və bəşəri keyfiyyətlərə, liderliyə xas olan, öz ölkəsini respublikanın hüdudlarından kənarda belə tanıdan, fəaliyyəti ilə beynəlxalq təhlükəsizliyə, münasibətlərə müsbət təsir göstərmək imkanlarına malik Prezident İlham Əliyev şəxsiyyətinə, siyasətinə ən böyük dividend qazandıran amil qlobal güclərin maraqlarını ölkəsinə yönəltməyi bacarmasıdır. Dövlət başçımızın fəaliyyəti haqqında dünyanın aparıcı dövlətlərinin rəhbərləri dəfələrlə fikir bildiriblər. Onların hamısı Azərbaycan Prezidentindən müdrik, uzaqgörən, əməkdaşlığa açıq və etibarlı, dövlət işlərini dərindən bilən və yüksək diplomatik bacarığa sahib lider kimi bəhs ediblər. Bütövlükdə, qeyd etmək lazımdır ki, cənab İlham Əliyevin fəaliyyətinin bu cür dəyərləndirilməsi, öndə olması onun liderliyinin, praqmatik siyasətinin və səmərəli fəaliyyətinin göstəricisidir. Prezidentimizin miqyaslı lider olması, onun dünya görüşü və intellektual potensialının zənginliyi, həmçinin qlobal düşüncə tərzi Azərbaycandakı islahatların uğurunu təmin edir. Siyasi hazırlığı, intellekt səviyyəsi, praqmatik düşüncəsi ilə dünya siyasətinin sayılıb-seçilən simalarından olan dövlət başçımızın müəyyənləşdirdiyi dəst-xətt Azərbaycanın daha böyük uğurlara çatmasına, ölkə vətəndaşlarının sosial müdafiəsinin, firavan, rahat həyat tərzinin daha da yüksəlməsinə xidmət edir. Dövlətimizdə hökm sürən və ardıcıl səciyyə daşıyan sabitliyin əsasında duran başlıca faktor hakimiyyətin həyata keçirdiyi siyasi kursun milli maraqlara, ümummilli mənafeyə tam cavab verməsidir. Cənab İlham Əliyevin rəhbərliyi altında məqsədini inkişaf və sabitlik, yolunu isə demokratiya və qanunçuluq prinsipləri əsasında müəyyənləşdirən Azərbaycanda möhkəm təməllərə söykənən, ictimai-siyasi sabitliyi şərtləndirən digər bir faktor isə mütəmadi surətdə siyasi-hüquqi islahatların həyata keçirilməsidir. Sosial-siyasi islahatların mütəmadi qaydada həyata keçirilməsi, qanunvericilik bazasının zənginləşdirilməsi, vətəndaş cəmiyyəti, hüquqi dövlətin inkişafına maksimum əlverişli şəraitin yaradılması və digər bu kimi istiqamətlər dövlətimizin qarşısında duran prinsipial öhdəlikləri təşkil edir. Azərbaycanın dinamik, müstəqil iqtisadi inkişaf strategiyası olduqca mühüm önəm daşıyır. Ölkəmiz heç bir qurumdan, heç bir dövlətdən asılı olmayan iqtisadi siyasət yürüdür ki, bu da inkişafın fundamental komponenti kimi çıxış edir. Beləliklə, Prezident İlham Əliyevin rəhbərliyi ilə həyata keçirilən strateji kurs özündə millətin, dövlətin mənafeyinə cavab verən ən ali prinsipləri və normaları ehtiva edir. Dövlət başçımızın həyata keçirdiyi xarici siyasət regionda cərəyan edən siyasi, iqtisadi proseslərin axarına həlledici təsir göstərir. Məhz dövlət başçısının liderlik keyfiyyətləri əsasında bu gün Azərbaycan beynəlxalq aləmdə söz sahibidir. Azərbaycanın rolu artaraq təkcə regional səviyyədə deyil, regionlararası inteqrasiya proseslərində də öz sözünü deyən mühüm faktora çevrilib. Azərbaycanın beynəlxalq səviyyədə qurduğu bütün əlaqələr bərabərhüquqlu tərəfdaşlıq, qarşılıqlı maraqların təmin olunması prinsiplərinə söykənir. Ölkəmizin tutduğu inkişaf yolu milli mənafeyi ifadə etməklə yanaşı, bölgənin inkişafına və sabitliyinə də xidmət edir. Buna görə də Azərbaycanın iqtisadi, hərbi, mədəni və digər sahələrdə həyata keçirdiyi siyasət təkcə özünün deyil, əməkdaşlıq etdiyi qonşu regionlardakı ölkələrin də inkişafına şərait yaradır. Bu isə, ilk növbədə, Azərbaycanın gücünü, qüdrətini göstərir. Prezident İlham Əliyevin qeyd etdiyi kimi, ölkəmiz böyük regional amilə çevrilib: “Bu gün Azərbaycan öz gücünə arxayın olan, öz gücünə arxalanan, bütün tərəfdaşlar ilə münasibətləri qarşılıqlı hörmət və ehtiram prinsipləri əsasında qurmağa çalışan, dinamik inkişaf edən gənc və eyni zamanda, təcrübəli ölkədir. Azərbaycan artıq böyük bir regional amildir. Sabitlik, təhlükəsizlik və inkişaf amilidir”. İlham Əliyevin xarici siyasət kursunun uğurları müstəqil dövlətçiliyimizin inkişafı aspektində böyük əhəmiyyət kəsb edir. Bu istiqamətdə dövlət başçısının əldə etdiyi uğurlar bütün dünyaya məlumdur. Xüsusilə də erməni təxribatının qarşısını almaq üçün Ali Baş Komandanımızın rəhbəliyi ilə şanlı ordumuz tərəfindən başlayan zəfər yürüşünün nəticəsində döyüş meydanında darmadağın olan düşmən üzərindəki tarixi Qələbəmiz. 44 günlük haqlı savaşımız döyüş meydanında müzəffər ordumuzun əldə etdiyi uğurlara görə diplomatiya meydanında da uğurlara çevrildi. Məhz buna görə də danışıqların şərtlərini Azərbaycan tərəfi müəyyən etdi, Prezident İlham Əliyev işğala əsaslanan status-kvonu dəyişməyi bacardı. Ali Baş Komandanımız öz prinsipiallığını və qəti əzmini dünyaya nümayiş etdirərək böyük güclər və Ermənistanın havadarları tərəfindən olan təzyiqlərin öhdəsindən layiqincə gəlməyi bacardı və bütün dünyaya güclü, qüdrətli lider olduğunu bir daha sübut etdi. Bundan sonra ölkəmizin məhz cənab İlham Əliyevin rəhbərliyi altında olması, inkişaf etməsi dövlətini həqiqi məhəbbətlə sevən bütün Azərbaycan xalqının istəyidir. Çünki xalqımızın öz Prezidentinə inamı, güvəni sonsuzdur! Lamiyə İsazadə, “Kimsəsiz Uşaqların Sosial Müdafiəsi” Birliyinin sədri.
