Məlum olduğu kimi, Azərbaycanın Şuşa şəhəri yaxınlığında ərazinin minalardan təmizlənməsi zamanı rusiyalı hərbçi həlak olub. Mina partlayışında ölən rus zabit barədə yazan “Vestnik Kavkaza” nəşri bu hadisədə məsuliyyətin Ermənistanın üzərinə düşdüyünü qeyd edib.
Nəşr yazır ki, dəfələrlə Rusiya tərəfinin istəyinə rəğmən, ermənilər minalanmış ərazinin xəritəsini vermirlər: “Bakı tam xəritəyə sahib ola bilməzdi, çünki Azərbaycan Ordusu orada deyildi və erməni qüvvələri heç bir məlumat paylaşmağı düşünməyiblər. Məgər erməni ordusu xaotik şəkildə minanı hara gəldi səpələyib və yerini də qeydə almayıb? Əgər belədirsə, bu, Ermənistan Müdafiə Nazirliyinin səhlənkarlığını təsdiqləyir. Ermənistan tərəfi minalanan sahə barədə mükəmməl biliklərə sahibdir. Lakin Rusiya tərəfinin davamlı istəklərinə baxmayaraq, bu məlumatı bölüşmür, bu səbəbdən də hadisə üçün məsuliyyəti öz üzərinə götürməlidir”.
Yazıda o da vurğulanıb ki, Ermənistan 10 noyabr müqaviləsini imzalamaqla (bununla da “DQR”i etibarsız hesab etdi) quldur birləşmələrinin etdiyi qanunsuzluğun bütün məsuliyyətini öz üzərinə götürüb.
Həqiqətən də sözügedən mina partlayışlarına görə məsuliyyət Ermənistanın üzərinə düşür. Ən azından ona görə ki, rus əsgəri ermənilərin nəzarətində olan hissədə mina partlayışının qurbanı olub.
“Bir tərəfdən Rusiyadan imdad diləyirlər, o biri tərəfdən...”
Məsələyə münasibət bildirən hərbi ekspert İbrahim Rüstəmlinin sözlərinə görə, Rusiya mətbuatının sözügedən məsələ ilə bağlı Ermənistanı ittiham etməsi haqlı yanaşmadır: “Partlayışa görə məsuliyyət birmənalı şəkildə ermənilərin üzərinə düşür. Çünki minalanmış ərazilərin xəritəsini verməməyin özü bir hərbi cinayətdir. Bu, sonradan baş verə biləcək qətllərə, bir növ, zəmin yaradan davamlı bir cinayətdir. Özü də elə bir cinayətdir ki, buna ad vermək çətindir. Bütün bunlar erməni tərəfinin məkrli niyyətlərindən xəbər verir. Bunların niyyətləri o qədər çirkin, pisdir ki, əməlləri də buna uyğundur. Bir tərəfdən Rusiyadan imdad diləyirlər, o biri tərəfdən minalanmış ərazilərin xəritəsini verməkdən imtina edirlər. Mina elə bir silahdır ki, o zərərsizləşdirilməsə, mütləq haçansa kiməsə zərər vuracaq. Obrazlı desək, minanı öldürməsən, mütləq o kimisə öldürəcək. İkinci Dünya müharibəsi 1945-ci ildə bitsə də, onun mina ilə bağlı fəsadları bu gün də davam edir. İllərlə dinc insanlar mina partlayışlarından əziyyət çəkirlər. Ona görə də nə qədər ki, Ermənistan tərəfi minalanmış ərazilərin xəritəsini təqdim etməyib, o zaman rus istehkamçıları belə partlayışlardan sığortalanmayacaqlar. Hərbi qulluqçularla yanaşı, dinc insanlar, ev heyvanları və hətta çöldə yaşayan heyvanlar belə, bunun qurbanı olacaqlar. Nəzərə almaq lazımdır ki, erməni quldurları bir sıra hallarda xaotik formada, necə gəldi minaları basdırıblar. Bu isə o deməkdir ki, çox ciddi təhlükələr var”.
Hərbi ekspert hesab edir ki, ermənilərin bu hərəkəti bütün bəşəriyyətə qarşı olan bir cinayətdir.
Vidadi ORDAHALLI
