Məlum olduğu kimi, xalqımız öz tarixinin şanlı və qürurverici səhifələrindən birini yaşamaqdadır. İllərdir mövcud olan Qarabağ həsrətinə son qoyuldu. İşğal altında olan ərazilərimiz Azərbaycan Ordusunun rəşadəti sayəsində düşmən tapdağından azad olundu. Qalib xalq olaraq möhtəşəm bir tarixə şahidlik edirik.
Bu zəfərin qazanılmasında Prezident İlham Əliyevin müstəsna xidmətləri var. Belə ki, onun zəngin dünyagörüşü, uzaqgörənliyi, diplomatik bilikləri sayəsində ölkəmiz bu uğura nail oldu. Prezidentin rəhbərliyilə yaradılan güclü ordumuz düşmənin 30 ildə qurduğu mövqeləri 44 günün içində yerlə-yeksan etdi. Xalqın inamını özünə qaytardı, onu bir yumruq kimi birləşdirdi. Fenomen şəxsiyyətlərə xas idarəetmə bacarığı ilə nəinki Azərbaycan tarixinə, dünya tarixinə də adını qətiyyətli, müdrik, lider dövlət başçısı kim qızıl hərflərlə yazdırdı.
Bütün bu deyilənlərin fonunda, Prezident İlham Əliyev hakimiyyətdə olduğu dövrdə xalqın birmənalı qəbul etdiyi və alternativ tanımadığı liderə necə çevrilə bildi?
“Liderin gücü, nüfuzu həm də onun təsir imkanlarının coğrafi əhatə dairəsi ilə ölçülür”
Məsələyə münasibət bildirən şərqşünas Seyid Camal Əzimbəylinin sözlərinə görə, həyata keçirilən məqsədyönlü və ardıcıl düzgün siyasət nəticəsində bu mümkün olub: “Prezident İlham Əliyevin ölkəyə rəhbərlik etdiyi 2003-cü ildən bu vaxtadək olan müddət Azərbaycan tarixinə hərtərəfli və sürətli inkişaf dövrü kimi daxil olub. Onun dərin istedadı, müstəsna diplomatik savad və bacarığı çox ciddi nəticələrin əldə edilməsinə gətirib çıxarıb. Sosial-siyasi sabitliyin qorunması, mövcud iqtisadi inkişafın, hərtərəfli tərəqqinin təməlində ortaya qoyduğu strategiya öz bəhrəsini verir. Bütün bunların kökündə müəyyənləşdirdiyi daxili və xarici siyasət xətti dayanır. Gənc dövlətin əsaslarının möhkəmliyi və həyata keçirilən strategiyanın səmərəliliyi məhz Prezident İlham Əliyevin liderlik keyfiyyətləri, zəkası, siyasi iradəsi və uzaqgörənliyi sayəsində mümkün olub. Bununla belə, ölkə başçısının şəxsiyyəti modern cəmiyyətdə lider obrazının ən mühüm cəhətlərini özündə birləşdirir. Liderin gücü, nüfuzu həm də onun təsir imkanlarının coğrafi əhatə dairəsi ilə ölçülür. Güclü siyasi liderin fəaliyyətinin təsir dairəsi bir ölkə ilə məhdudlaşmır. Bu xüsusiyyətlər bütövlükdə, regional, hətta qlobal əhəmiyyət daşıya bilir. Bu baxımdan, bu gün Prezident İlham Əliyevin həyata keçirdiyi xarici siyasət regionda gedən siyasi, iqtisadi proseslərin axarına həlledici təsir göstərir. Məhz onun liderlik keyfiyyətləri əsasında bu gün Azərbaycan beynəlxalq aləmdə böyük nüfuz qazanıb. Onun müstəsna siyasi liderliyi sayəsində uzun illər mövcud olan işğal problemi həll edildi. Bütün bunlar İlham Əliyevin bundan sonra da alternativsiz lider olaraq qalacağını əyani şəkildə göstərir”.
Şərqşünas hesab edir ki, indiki dövrdə İlham Əliyev qədər dünyada ikinci alternativsiz lider təsəvvür etmək çətindir.
Vidadi ORDAHALLI
