Prezident İlham Əliyevin 8 dekabr 2020-ci il tarixli Fərmanı ilə yaradılan “YAŞAT” Fondu ilk 10 gündə görülən işlər barədə açıqlama yayıb.
“ASAN xidmət”dən mətbuata verilən məlumata görə, fondun əsas məqsədi şəhid ailələrinin və hərbi əməliyyatlar nəticəsində əlilliyi müəyyən olunmuş şəxslərin sosial müdafiəsi sahəsində dövlət tərəfindən həyata keçirilən tədbirlərə əlavə dəstək verilməsi istiqamətində vətəndaş cəmiyyəti təşəbbüslərinin reallaşdırılması üçün müvafiq platformanın yaradılması, bu sahədə şəffaflığın, hesabatlılığın və ictimai nəzarətin təmin edilməsidir.
- Fondun fəaliyyətinin təşkili ilə bağlı Tədbirlər Planı təsdiq edilib, müvafiq icra qrupu müəyyən edilib. Azərbaycan Beynəlxalq Bankında Azərbaycan manatı və 5 xarici valyutada (ABŞ dolları, rubl, lirə, avro, funt sterlinq ) Fonda hesablar açılıb.
- Bütün şəhid ailələrinin yaşadıqları ünvanlar müəyyənləşdirilib, yaralananlarla bağlı siyahılar üzrə işlər isə yaxın günlərdə tam yekunlaşacaq.
- Vətən müharibəsində şəhid olmuş və yaralanmış şəxslərin ailələlərinə baş çəkmək üçün “ASAN xidmət” əməkdaşlarından və könüllülərindən ibarət bütün rayonları əhatə edən 69 qrup formalaşdırılıb və onlar müvafiq təlimlərə cəlb edilərək ünvanlara baş çəkməyə başlayıblar. Həmçinin, qruplar planşetlərlə təmin olunub və bütün zəruri ehtiyaclar elektron qaydada qeydə alınır.
- Bu kateqoriyadan olan 1500-dən çox ailəyə baş çəkilib, zəruri ehtiyacları müəyyən edilib və ilkin yardımlara başlanıb.
- Şəhid və yaralıların ailələrinə baş çəkilməsi zamanı dəqiqləşdiriləcək informasiyalardan ibarət vahid anket forması hazırlanıb. Fondun sosial şəbəkələrdə rəsmi səhifələri yaradılıb.
- İnternet portalının yaradılması prosesi sürətlə davam etdirilir. Portalda ianə edənlərin və yardım olunan şəxslərin şəxsi kabineti olacaq. Hər bir yardım barədə foto və videomateriallar portalda yerləşdiriləcək.
- “YAŞAT” Fondunun işinin təşkili “ASAN xidmət”də çalışan şəhid ailələrinin üzvləri və qazilərə həvalə olunub.
“YAŞAT” Fondu yarandığı bu 10 gündə öz səmərəli fəaliyyətilə diqqəti çəkir, Fond bu günlər ərzində xeyli iş görüb. Bunu hesabatdan da açıq görmək mümkündür.
Bu nümunəvi nəticəni nə ilə izah etmək olar?
“...qısa müddət ərzində bu qədər vəsaitin toplanması, saysız insanın qayğı ilə əhatə olunması onu göstərdi ki... “
Milli QHT Forumunun rəhbəri Rauf Zeyni “YAŞAT”ın 10 gün ərzində imza atdığı uğurun sirrini açdı: “Ölkə başçısına vətəndaş cəmiyyəti və Azərbaycan ictimaiyyəti adından bir daha təşəkkür edirik ki, bizə qələbəni yaşadanlarla bağlı “YAŞAT” Fondunun yaradılması ilə bağlı Fərman imzaladı. “YAŞAT” bizi qələbə ilə təmin edənləri yaşatmaq üçün çox gözəl, humanist bir addımdır, mexanizmdir. “YAŞAT” Fondunun idarə edilməsi “ASAN xidmət”ə həvalə olunub, eyni zamanda da onun müşahidə, himayədarlar şurasının tərkibində layiqli, dəyərli insanlar təmsil olunur. Qısa müddət ərzində “ASAN xidmət”in rəhbərliyi tərəfindən “YAŞAT” Fondunun bütün yerləri əhatə etməsi üçün 69 qrup yaradılıb və bu qruplara könüllülər də cəlb edilib. Formalaşdırılan 69 qrup tərəfindən bütün şəhər və rayonlarda müasir texnoloji üsullardan istifadə edərək şəhid ailələrinin təxirə salınmadan qeydiyyatının aparılması, qısa müddət ərzində bu qədər vəsaitin toplanması, saysız insanın qayğı ilə əhatə olunması onu göstərdi ki, “YAŞAT”ı idarə edən insanlar milli vətənpərvər insanlar olmaqla yanaşı, həm də müasir idarəetmənin incəliklərini çox yüksək səviyyədə bilirlər. “YAŞAT”çılar şəhid ailələrimizə və qazilərimizə ən qısa müddət ərzində hərtərəfli dəstək olmaq üçün bütün bacarıq və imkanlarını sərf ediblər. Düşünürəm ki, bütün vətəndaş cəmiyyəti, bütün QHT-lər də, bizim könüllülər də bu prosesə cəlb olunmağa hazırdırlar. Təki həm bu il boyu, həm də növbəti ildə “YAŞAT” Fondu vasitəsilə biz şəhid ailələrinə və qazilərimizə dövlətin qarşıya qoyduğu məqsədin tam hədəfə çatmasına töhfə verək. Ölkə başçısı tərəfindən hər bir şəhid ailəsi, qazimiz diqqət və qayğı ilə əhatə olunur”.
R.Zeyni hesab edir ki, heç bir qazimiz, şəhid ailəsi diqqətdən kənarda qalmır, onlara yönəlik qayğı siyasəti davam edir: “Bu bizim bundan sonra da əldə edəcəyimiz qələbələr üçün çox vacibdir”.
İradə SARIYEVA
