Ermənistan rəhbərliyi yenə də Dağlıq Qarabağ məsələsində təxribatçı mövqedən çıxış edir. Bu da onların hələ də ağıllanmamasından xəbər verir.
Ermənistanın xarici işlər naziri Ara Ayvazyan Fransanın “Le Monde” qəzetinə verdiyi müsahibəsində deyib ki, Azərbaycan status məsələsinə razı olmasa, separatçı qurum tanınacaq: “Yaxın vaxtlarda Dağlıq Qarabağın statusunun müzakirələri gözlənir. Əgər Azərbaycan statusu müəyyənləşdirmək üçün danışıqlara razı olmasa, onda Ermənistan Qarabağın tanınması prosesinə başlaya bilər. Çoxları indi hərbi gücün tətbiqi ilə “Artsax”ın statusu məsələsinin gündəmdən çıxdığını düşünərək səhv edirlər. Minsk Qrupunun həmsədrləri Qarabağın statusu məsələsinin danışıqların gündəliyində qaldığını təsdiqlədilər. Azərbaycan bu mövzuda razılaşmasa, Ermənistan “Artsax Respublikası”nın tanınması prosesini nəzərdən keçirəcək”.
Göründüyü kimi, Ermənistan 44 günlük müharibədə uğradığı ciddi məğlubiyyətdən nəticə çıxarmaq əvəzinə, Azərbaycanla şantaj dilində danışmağa çalışır.
“Hakimiyyət ciddi narazılıqlardan yayınmaq üçün belə açıqlamalar verir”
Məsələyə münasibət bildirən politoloq Elşən Manafovun sözlərinə görə, Ermənistan rəsmiləri bu kimi şantaj xarakterli açıqlamalarla nəyəsə nail ola bilməyəcəklər: “Ayvazyanın məlum açıqlaması o demək deyil ki, Ermənistan yaxın perspektivdə separatçı qurumun tanıdılması ilə bağlı hansısa işlər görə bilər. Çünki 44 günlük müharibə dövründə Ermənistana çox güclü zərbə endirdik. İşğalçı dövlətin, ən azından, 2 milyard dollarlıq hərbi texnikası məhv edildi. Bu, Ermənistanın iqtisadi potensialı və imkanları baxımından çox böyük zərbədir. Yaxın bir neçə il ərzində Ermənistan bu yükün altından çıxa bilməyəcək. Separatçı qurumun tanınması ilə bağlı bəyanatlar daha çox daxili auditoriyaya hesablanıb. Həmçinin, bu, bölgədə maraqları olan siyasi elitalara ünvanlanan mesajlar kimi qəbul olunmalıdır. Ermənistan daxilində radikal qüvvələrin etirazları artıb. Hakimiyyət ciddi narazılıqlardan yayınmaq üçün belə açıqlamalar verir. Ancaq Ermənistan nə etsə belə, reallıq başqadır. Çünki Vətən müharibəsi Cənubi Qafqazla bağlı geosiyasi reallıqları əhəmiyyətli şəkildə dəyişdi. Ona görə bu faktla ancaq razılaşmaq lazımdır. O da var ki, Avropa İttifaqında müəyyən dairələr Cənubi Qafqazda yaranan yeni geosiyasi reallıqları həzm etmək istəmirlər. O cümlədən, bu, ABŞ-ı da məmnun etməyib. Ermənistan bu amildən də istifadə edərək vaxt əldə etmək üçün pozucu mövqedən çıxış edir. Guya Baydenin prezidentlik fəaliyyətinə başlamasından sonra ABŞ ermənilərin mövqeyindən çıxış edəcək”.
Politoloq hesab edir ki, ermənilər nə etsələr, xeyri olmayacaq.
Vidadi ORDAHALLI
