Bildiyimiz kimi, son günlər Fransada vətəndaş narazılıqları pik həddə çatıb. Başqa dövlətlərə “demokratiya” dərsi keçən bu ölkənin 130 mindən çox vətəndaşı müxtəlif şəhərlərdə kütləvi etiraz aksiyaları keçirir. Fransada “Qlobal təhlükəsizlik haqqında” qanun layihəsinə qarşı etirazlar davam edir.
Parisdə polis əməkdaşları aksiyanı dağıtmaq üçün zorakılığa əl atıblar. Belə ki, polislər xəbərdarlıq etmədən etirazçılara qarşı gözyaşardıcı qaz və su şırnaqlarından istifadə ediblər. Nəticədə etirazçılarla polislər arasında qarşıdurma yaşanıb.
Fransa Daxili İşlər Nazirliyinin yaydığı məlumata görə, 100-dən artıq polis yaralanıb. Onlardan 23-ü paytaxt Parisdə, digərləri isə Fransanın bölgələrindəki aksiyalarda xəsarət alıblar.
Lakin hələ də kütləvi aksiyalar keçirən etirazçılara qarşı Fransa polisinin həyata keçirdiyi zorakılıq halları ilə bağlı beynəlxalq təşkilatlar hər hansı bir bəyanatla çıxış etməyiblər, onlar sanki Fransada baş verən zorakılılq hallarını “görmürlər”.
“Demokratiya”dan, “insan haqları”ndan dəm vuran və bunu başqa dövlətlərə qarşı xüsusi təzyiq vasitəsi kimi istifadə edən Fransanın özündə vətəndaşlar kütləvi olaraq polis zorakılığına məruz qalırlar. İnsan haqları təşkilatları isə susur, reaksiya vermirlər. Beynəlxalq təşkilatlar dinc fransızların səsini niyə eşitmək istəmirlər?
“Bütün bunlar səbəbsiz deyil, bu, həmin beynəlxalq təşkilatların ikiüzlülüyünün və ikili yanaşmasının göstəricisidir”
“Türk Dünyası İnfo” İctimai Birliyinin rəhbəri Dəyanət Osmanlı “Bakı-Xəbər”ə şərhində bildirdi ki, Fransada baş verən vətəndaş zorakılığına dünya birliyinin sərt reaksiya verməməsi, ümumiyyətlə, bunu görməzdən gəlməsi Qərbin yürütdüyü ikili siyasətin təzahürüdür: “Fransada birinci dəfə deyil ki, vətəndaşlara qarşı polis zorakılığı baş verir. Bu ilin yayında da analoji hadisə yaşanıb və onlarla Fransa vətəndaşı, KİV nümayəndəsi polis zorakılığına məruz qalıb. Özünü “demokratiyanın beşiyi” kimi qələmə verən Fransada aksiya keçirən vətəndaşlara qarşı neçə gündür davam edən şiddətli təzyiqlərin dayandırılması barədə heç bir beynəlxalq təşkilat hər hansı bir bəyanat yaymayıb. Başqa vaxt “insan hüquqları”nın, “söz azadlığı”nın, “demokratiya”nın müdafiəçisi olduqlarını gözə dürtən bu beynəlxalq təşkilatlar Fransaya gələndə susurlar. Əlbəttə, bütün bunlar səbəbsiz deyil, bu həmin beynəlxalq təşkilatların ikiüzlülüyünün və ikili yanaşmasının göstəricisidir. Baxın, buna bənzər bir hadisə hansısa bir islam, türk dövlətində baş versəydi, görün, onda nələr baş verərdi. Həmin beynəlxalq təşkilatlar bəyanatı bəyanat üstən verərdi, həmin ölkələrə qarşı sərt sanksiyaların tətbiq edilməsi tələbi səsləndirilərdi. Amma bu gün Fransa hökumətinin “Qlobal təhlükəsizlik haqqında” qanun layihəsinə qarşı etiraz edən fransızlara qarşı bu ölkənin polisinin törətdiyi vəhşiliklərə hər hansı bir formada reaksiya verilmir. Avropanın mərkəzində insan hüququları tapdalanır, amma insan hüquqlarına qarant duran beynəlxalq təşkilatlar Fransaya “gözün üstə qaşın var” demir və bununla da Fransa polisinin əhaliyə qarşı törətdiyi zorakılıqlara dəstək vermiş olurlar”.
Həmin beynəlxalq təşkilatların analoji münasibəti Ermənistanla da bağlı sərgilədiyini vurğulayan D.Osmanlı hesab edir ki, əsassız yerə Azərbaycanı, Türkiyəni və digər ölkələri ittiham edən bu Qərb təşkilatları xristian dünyasında baş verənləri hesaba almırlar. “Qərbin insan hüquqları üzrə olan beynəlxalq təşkilatları ona görə baş verənlərlə bağlı Fransaya qarşı hər hansı bir təzyiq metodundan istifadə etmirlər ki, bu onlara sərf etmir. Fransa Avropa Birliyinin aparıcı dövlətidir və həmin təşkilatlar da birbaşa bu birliyə tabedirlər. Qərb dünyası heç bir vaxt özündə baş verən qanunsuzluqları öz adı ilə çağırmır, əksinə, ona “qanun” donu geydirirlər. Bilirsiniz ki, bir müddət əvvəl Qarabağdan obyektiv reportaj hazırlayan fransalı jurnalistin başına bu ölkədə hansı oyunlar açıldı, amma heç kəsin səsi çıxmadı. Bircə “Sərhədsiz reportyorlar” başdansovdu bir bəyanat qəbul etdi və sonra isə, ümumiyyətlə, səsini çıxarmadı. Ermənistanda baş verən son hadisələr zamanı da beynəlxalq təşkilatlar susdular, çünki onlar erməni lobbisinin təsiri altında olduqları üçün heç nə edə bilmədilər. Bundan da açıq görsənir ki, həmin beynəlxalq təşkilatlar sənədlərində göstərildiyi kimi, müstəqil qurumlar yox, hansısa ölkələrin, qurumların, qüvvələrin əlaltısıdırlar” - deyə D.Osmanlı vurğuladı.
İradə SARIYEVA
