Şakir Ağayev: “Qarabağda qanunsuz olaraq livanlı ailələrin yerləşdirildiyini Ermənistan etiraf edir, amma...”
Ermənistan mediası ölkəsinin Qarabağda qanunsuz məskunlaşma siyasəti apardığını artıq etiraf etməyə başlayıb. Bilirik ki, Qarabağ işğalda olduğu dövrdə Ermənistan hökuməti Livanda, Suriyada və başqa ölkələrdə yaşayan erməni ailələrini Qarabağa, Kəlbəcərə və digər ərazilərimizə köçürərək, burada qanunsuz yerləşdirmə həyata keçirib. Əvvəllər onları “yerli ermənilər” kimi qələmə verən Ermənistan artıq cidanı çuvalda gizlədə bilmir.
Diaspor işləri üzrə baş komissar Zare Sinanyan 26 noyabrda “Armenpress”ə müsahibəsində bildirib ki, iki Livan ermənisi müharibə bitdikdən sonra “Artsax”da (?) (Qarabağda - İ.S.) itkin düşüb.
“Noyabrın 10-da “Artsax”dakı döyüş əməliyyatlarının dayandırılmasının elan edilməsindən sonra iki Livan ermənisi itkin düşüb. “Artsax”da atəşkəsdən sonra bir qadın və bir kişi itkin düşüb. Mallarını gətirməyə getdilər və geri qayıtmadılar. Harada olduqlarını öyrənməyə çalışırıq, amma tapa bilmirik” - deyə Sinanyan bildirib.
- “Ermənistanın bu cinayətlərini dünyaya yaymalıyıq və sübut etməliyik ki...”
“Novoye vremya” qəzetinin baş redaktoru Şakir Ağayev bizimlə söhbətində bildirdi ki, Ermənistan mediasının Qarabağda qanunsuz məskunlaşdırılan livanlı ailələrin olduğunu etiraf etməsi həm də düşmən tərəfin İkinci Qarabağ müharibəsi zamanı Livandan, Suriyadan terrorçu muzdlu döyüşçüləri gətirərək bizə qarşı döyüşdürdüyünün etiraf edilməsidir. “Azərbaycan dəfələrlə bəyan etmişdi ki, Ermənistan Qarabağda qanusuz məskunlaşdırma siyasəti aparır, Livandan, Suriyadan, Ermənistandan erməniləri gətirib bizim torpaqlarda yerləşdirirlər, süni demoqrafik mühit yaradırlar. Eləcə də Azərbaycan müharibənin gedişi dövründə dəfələrlə bildirib ki, Ermənistan tərəfindən Qarabağda bizə qarşı Livandan, Suriyadan və başqa ölkələrdən gətirilən muzdlular döyüşürlər. Bütün bunlar hamısı real faktlardır”. Ş.Ağayevin sözlərinə görə, o zaman Ermənistan bunu etiraf etmirdi və Azərbaycana şər atırdı ki, guya biz tərəfdən muzdlular döyüşür, bu isə yalandan başqa bir şey deyildi. “Cənab Prezident dəfələrlə həm xarici KİV-ə müsahibəsində, həm də çıxışlarında bildirmişdi ki, bununla bağlı bir fakt qoyun ortaya.
Bu gün artıq ermənilər etiraf edirlər ki, bizim torpaqlara Livandan və başqa ölkələrdən ailələr köçürüblər. Bu aydın olan bir məsələ idi. Azərbaycan müharibədən əvvəl də bunu deyirdi ki, Ermənistan Azərbaycan ərazilərinə Livandan, Suriyadan və başqa ölkələrdən “erməni ailələri” adı altında gətirib terrorçular yerləşdirir. Hətta bir xarici araşdırma qrupu vardı, ölkəmizin müraciətinə əsasən Qarabağda araşdırma apararaq bu faktları üzə çıxarmışdı. Bu 30 ildir gedən proses idi. Bir neçə ay bundan əvvəl Livanda baş verən partlayışdan sonra, həmişə olduğu kimi, ermənilər bu dəfə də başqalarının bədbəxtçiliyindən istifadə etdilər və Ermənistan oradan da xeyli erməni ailəsi və böyük sayda terrorçu gətirib Qarabağda yerləşdirdi. Livandan, Suriyadan müxtəlif şirin vədlərlə gətirdikləri insanları bizim torpaqlarda qanunsuz olaraq məskunlaşdırdılar. Təbii ki, onlar bu müharibədə iştirak edirdilər. Qarabağda qanunsuz olaraq livanlı ailələrin yerləşdirildiyini Ermənistan etiraf edir, amma gərək buna dünya birliyi, beynəlxalq aləm də münasibət bildirsin ki, Livan ermənilərinin orada nə işi vardı? Amma beynəlxalq aləm hələ ki, buna reaksiya vermir, susur. Fikrimcə, biz həm informasiya, həm də diplomatiya cəbhəsində bu faktlardan istifadə edərək Ermənistanın bu cinayətlərini dünyaya yaymalıyıq və sübut etməliyik ki, Ermənistan Azərbaycan ərazisində insanlığa qarşı hərbi cinayətlə məşğul olub” - deyə Ş.Ağayev vurğuladı.
İradə SARIYEVA
