Lamiyə İsazadə: “Fransa dövlətinin cılız, riyakar siyasəti...”

img

Azərbaycanın ərazi bütövlüyünün bərpasına ATƏT-in Minsk Qrupunun həmsədri kimi Fransanın neytral və konstruktiv bir davranış sərgiləməsi gözlənilən olsa da, 25 noyabr tarixində qondarma “Dağlıq Qarabağ respublikasının” tanınmasına dair Fransa Senatı 145 nömrəli qətnamənin qəbul edilməsi ilə bağlı bəyanat yaydı.

 Fransanın bu cılız addımı  ölkənin vasitəçilik missiyası ilə heç də uyğun gəlmədi. Ermənistana dəstək məqsədli absurd bir qətnamənin qəbul edilməsi ilə Fransa artıq özünün əsl ermənipərəst simasını dünyaya açıq-aşkar bəyan etmiş oldu. Fransa bu qərəzli qətnaməsi ilə işğalçı Ermənistanı dəstəkləyir və bu qətnamə bölgə və beynəlxalq təhlükəsizliyin təmin edilməsinə qətiyyən xidmət etmir. Vasitəçilik missiyasından tamamilə uzaq olan Fransa hər məqamda erməniləri mühafizə edir. İşğalçı dövləti müdafiə edən dövlət özü ya işğalçıdır ya da işğalçılığa meyllidir. Hər kəs bilsin ki, Fransa özü soyqırımı törətmiş bir ölkədir. Fransanın yaxın tarixinə diqqət yetirdikdə onun soyqırımlarla dolu səhifələrini görməmək mümkün deyil. Əlcəzair xalqı Fransanın hakimiyyəti altında 132 ildə (1830-1962) müstəqillik uğrunda mübarizə aparmış və nəticədə fransızlar tərəfindən 1,5 milyon əlcəzairliyə qarşı soyqırımı həyata keçirmişdir. Bundan başqa Fransa Vyetnamda çox böyük soyqırımı həyata keçirmişdir.  Fransanın soyqırımı keçmişi yalnız Əlcəzairlə və Vyetnamla məhdudlaşmır. Fransa üç qitədə olan müstəmləkələrində yerli əhaliyə qarşı soyqırımı törətmiş, əhalini ölkəni tərk etməyə məcbur etmiş, dinlərini dəyişdirmiş və onlara ən adi insani yaşamaq haqqı verməmişdir. XIX əsrin 60-cı illərində Fransa əsgəri birlikləri Cibutiyə daxil oldu. 1917-ci ildə Cibutidə başlanan azadlıq mübarizəsi qan gölündə boğuldu, 100 minlərlə insan öldürüldü. Bununla belə, Çad torpaqlarının fransızlar tərəfindən işğalı da bu ölkənin törətdiyi soyqırımlar silsiləsinin davamıdır. Ötən əsrin 50-ci illərinin sonlarına qədər fransızlar Çadda soyqırımına davam etmişlər. Hələ bu da son deyil. Fransa Qabon torpaqlarında da soyqırımı həyata keçirmiş, islam dinini qadağan etmiş, din xadimlərini öldürmüş, 10 minlərlə insanı yaşamaq hüququndan məhrum etmişdir. 1881-ci ildə isə Fransa Tunisi işğal etmişdir. Fransızlar burada müqavimət göstərənlərə qarşı amansız terror həyata keçirmişlər. Bu gün isə Kamerunun ingilisdilli və fransızdilli bölgələri arasındakı savaş Fransanın müstəmləkə dövrünün Afrika ölkələrinə qoyduğu acı mirasdır.  Fransadan fərqli olaraq Azərbaycan dövlətinin keçmişinə nəzər salanda isə orada nə işğal nə də terrorçuluq görürsən. Bütün dünya bilir ki, Azərbaycan illərlə işğala məruz qalan ölkə olubdur.
Fransanın bu qərəzli, beynəlxalq hüquq norma və prinsiplərinə zidd olan qətnaməsi onu göstərir ki, bu ölkə Minsk Qrupu həmsədri funksiyasını yerinə yetirməyə layiq deyil. Bu hər kəsə aydındır ki, fransızlar daima erməniləri dəstəkləyib, ermənipərəst olublar. Azərbaycan xalqı bugünə qədər gördüyü ikiüzlülüyə, ikili standartlara daha dözmək məcburiyyətində deyil.  Məhz buna görə də Fransa Minsk Qrupu həmsədrliyindən qeyd-şərtsiz uzaqlaşdırılmalıdır.
30 ildir Ermənistan-Azərbaycan Dağlıq Qarabağ münaqişəsinin ədalətli həll yolunu tapmamasının səbəbi bu gün artıq bütün dünyaya bəllidir. Minsk Qrupu həmsədri ermənipərəst olarsa, obyektiv mövqe sərgiləməzsə əlbətdə haqq və ədalət də öz yerini tapmaz. Fransa Senatı qəbul etdiyi bu yalan qətnamə ilə BMT qətnamələrini kobud şəkildə pozduğunun görəsən fərqindədirmi? Yoxsa erməni sevgisi onların ağıllarını başlarından alıb?! Fransa dövləti bilməlidir ki, bu cür saxta qətnamələr işğalçı dövləti yeni ərazilər işğal etməyə həvəsləndirməkdir. Ermənilərə yeni torpaqlar işğal etməyə imkan yaradan Fransa bu qətnamə ilə obyektiv və ədalətli vasitəçi reputasiyasını tamamilə itirmiş oldu.
Fransa Senatının üzvlərinin çoxu Dağlıq Qarabağın həqiqətən də Azərbaycanın ərazisi olduğundan xəbərsizdir. Onlar sadəcə kiminsə sifarişini yerinə yetirərək qətnamənin təsdiqlənməsinə səs verdilər və böyük ehtimal ki, bu qətnamənin müqabilində nəsə əldə ediblər. Halbuki Fransa dövləti bilməli idi ki, Dağlıq Qarabağ mübahisəli torpaq deyil, Azərbaycanın əbədi, əzəli və beynəlxalq hüquq tərəfindən tanınmış tarixi torpağıdır. 30 ildir işğal altında olan torpaqlarını azad edərək ərazi bütövlüyünü bərpa edən Azərbaycanın döyüş meydanında əldə etdiyi nəticə BMT qətnamələrinə söykənir. BMT-nin müvafiq qətnamələrində isə ermənilərin işğal etdikləri Azərbaycan torpaqlarından dərhal və qeyd-şərtsiz çıxmasını tələb edir. Əgər BMT-nin qətnamələrində Dağlıq Qarabağın Azərbaycan torpaqları olduğu öz əksini tapırsa, Fransa Senatının Azərbaycana işğaldan azad etdiyi öz torpaqlarından çəkilməsi çağırışını etməsi sadəcə gülünc doğurur. Belə saxta qətnamələrin qəbulu Fransa dövlətinin cılız, riyakar siyasətinin göstəricisidir.
Lamiyə İsazadə,
“Kimsəsiz Uşaqların Sosial Müdafiəsi” Birliyinin sədri

Son xəbərlər