Erməni mediasında Putinə qarşı köhnə kampaniya materialları yenidən dövriyyəyə daxil edilir - Niyyət...

Elşad Musayev: “Buna Paşinyan şərait yaradır ki, Putinə qarşı antipatiya güclənsin”

img

Ermənilərin Rusiyaya və ruslara münasibəti heç də hər zaman birmənalı olmayıb. Ermənistanda təkcə müxalifətçilər və sadə adamlar deyil, hakimiyyət mənsubları da zaman-zaman Rusiyanı bu və ya digər şəkildə ittiham ediblər.

Çoxsaylı nəşr vaxtaşırı Ermənistandakı mövcud hakimiyyət nümayəndələrinin Rusiyaya olan ikibaşlı, çox zamansa qərəzli fikirləri barədə kifayət qədər yazıb. Hətta erməni mediasında Rusiyanı, bu ölkənin rəsmilərini aşağılamaqdan belə çəkinməyiblər.

Ermənistanın populyar “Politik.am” nəşri yazır ki, vaxtilə Ermənistanda Putinin əleyhinə yazılmış sərt və tərbiyəsiz ifadələrlə dolu yazılar təkrarən dərc edilir. Açıq şəkildə deyilir ki, Putin “KQB tullantısı”dır. Məsələn, Ermənistan parlamentinin vitse-spikeri Alen Simonyan 2013-cü ildə Gürcüstanın sabiq prezidenti Mixeil Saakaşviliyə xoş gəlmək üçün Rusiya Prezidenti Vladimir Putini “KQB tullantısı” adlandırıb: “Alen Simonyan vaxtilə deyirdi ki, “İyrənclikdir, rusların seçmədikləri “KQB tullantısı” Saakaşvilini lağa qoyur. Bu nə tərbiyəsizlikdir. Prezidentlik kreslosunu zorla ələ keçirən bu KQB məxluqunun Saakaşvilini ələ salması iyrənclikdir”.

Nəşr daha sonra yazır ki, ola bilsin, bu fakt bizim üçün o qədər də əhəmiyyət kəsb etməsin: “Çünki özümüz də Ermənistanın indiki Baş nazirinə qarşı ədəbsiz danışırıq. Amma imperatorluq ənənələrinə sahib olan rus elitası üçün bu, vacib məsələdir”.

Erməni mediasının uzun müddətdən sonra Putinlə bağlı deyilən təhqiramiz fikirləri gündəmə gətirməsi təsadüfi deyil. Məlum məsələdir ki, ermənilər 44 günlük müharibədə uduzmağın səbəbini Putinin tutduğu neytral mövqe ilə əlaqələndirirlər.

Maraqlıdır, bəs ekspertlər erməni mediasının Putinə qarşı belə iyrənc kampaniya aparmasını necə dəyərləndirirlər? Bunun arxasında hansı niyyətlər gizlənir?

  • “Ermənilər istəyirdilər ki, Rusiya gəlib onların yerinə döyüşsün və status-kvonun dəyişməsinə imkan verməsin”

Məsələyə münasibət bildirən Böyük Azərbaycan Partiyasının sədri Elşad Musayevin sözlərinə görə, ermənilər sözügedən döyüşlərdə Putinin tutduğu mövqeyi ona bağışlamırlar: “Ona görə də ölkə mediasında bu cür tendensiya müşahidə edilir. Həqiqətən də son vaxtlar erməni mediasında Putinə yönəlik təhqir xarakterli fikirlər səslənir. Keçirilən aksiyalarda ona yönəlik çıxışlar səslənir. Bunun əsas səbəbi məlum döyüşlər zamanı Rusiyanın sərgilədiyi mövqe ilə bağlıdır. Məsələ ondadır ki, onlar zaman-zaman Rusiyanın himayəsinə sığınaraq Azərbaycana yönəlik işğalçı fəaliyyətlə məşğul olublar. Bu dəfə ermənilərin istəkləri baş tutmadı. Baxmayaraq ki, onlar bunu gözləmirdilər. Ona görə də indi daha çox Putini günahlandırırlar ki, nəyə görə Azərbaycana öz torpaqlarını azad etməyə imkan verdi. Ermənilər istəyirdilər ki, Rusiya gəlib onların yerinə döyüşsün və status-kvonun dəyişməsinə imkan verməsin. Halbuki, Putin dedi ki, Rusiya mümkün olan qədər Ermənistana döyüşlərdə yardım edib. Ancaq erməni xisləti bununla kifayətlənmir. Hesab edirəm ki, Putinə yönəlik qaralama kampaniyası daha da güclənəcək. Buna həm də Paşinyan şərait yaradır ki, Putinə qarşı antipatiya güclənsin. Nəticədə o, öz dayaqlarını möhkəmləndirə bilsin”.

Partiya sədri onu da qeyd etdi ki, Ermənistanda bir müddət bu proses davam edəcək.

Vidadi ORDAHALLI

Son xəbərlər