24/11/2020 13:50
728 x 90

Türkiyənin quru qoşunları Azərbaycanda - Hulusi Akar ən yaxın günlər üçün söz verdi...

Azad İsazadə: “Türkiyədən gələn quru qoşunu, ilk növbədə, Azərbaycanla Rusiya sülhməramlıları arasında dayanacaq”

img

Ən tez zamanda Dağlıq Qarabağa əsgər göndərəcəyik. Bunu Türkiyənin Milli Müdafiə naziri Hulusi Akar deyib. H.Akar bildirib ki, quru qoşunların Azərbaycana göndərilməsi üçün bütün işlər tamamlanıb.

Qeyd edək ki, Türkiyə Prezidenti Rəcəb Tayyib Ərdoğan Azərbaycana türk əsgərinin göndərilməsi ilə bağlı qərarı təsdiq edib.

Azərbaycan, Rusiya və Ermənistan arasında əldə olunmuş razılığa əsasən, bölgədə 10 noyabr tarixindən atəşkəs başlayıb və atəşkəsə riayət edilib-edilmədiyini monitorinq etmək üçün işğaldan azad edilmiş Azərbaycan ərazisində Rusiya ilə birgə Monitorinq Mərkəzi yaradılır. Türkiyə hərbçiləri ölkə konstitusiyasına müvafiq olaraq, 1 il müddətinə Dağlıq Qarabağdakı Rusiya-Türkiyə birgə Monitorinq Mərkəzində fəaliyyət göstərəcəklər.

Maraqlıdır ki, H.Akar açıqlamasında müşahidəçilər yox, quru qoşunları deyir. O, quru qoşunları tezliklə gələcək deyərkən nəyi nəzərdə tutur? Bu nə deməkdir?

  • ...Monitorinq Mərkəzi nəzarət edəcək ki, haradasa təxribat var və ya yoxdur”

Sözügedən məsələyə aydınlıq gətirən hərbi ekspert Azad İsazadə bununla bağlı maraqlı məqamlara toxundu: “Azərbaycan və Türkiyə tərəfi ilk gündən türk sülhməramlılardan danışıb. Rusiya isə bunu hər dəfə təkzib edirdi. Bəyan edirdi ki, münaqişə bölgəsində ancaq Rusiya sülhməramlıları olacaq. Buna rəğmən, Azərbaycan və Türkiyə məsələyə fərqli yanaşır. Bütün bunların nəticəsində Moskva birmənalı cavab verməsə də, razılıq verdi ki, birgə nəzarət üçün Monitorinq Mərkəzi yaratmağa hazırdır. Rusiya rəsmiləri sülhməramlı qüvvələr məsələsində həm də onu qeyd etdilər ki, Azərbaycan müstəqil dövlətdir. Yəni bu o deməkdir ki, Azərbaycan Türkiyə sülhməramlılarını harada istəyirsə, orada yerləşdirə bilər. O zaman biz başa düşməliyik ki, Türkiyədən gələn quru qoşunu, ilk növbədə, Azərbaycanla Rusiya sülhməramlıları arasında dayanacaq. Bununla öz sülhməramlı missiyasını həyata keçirəcək. Eyni zamanda, Monitorinq Mərkəzi nəzarət edəcək ki, haradasa təxribat var və ya yoxdur”.

Ekspert onu da qeyd etdi ki, nə qədər rus sülhməramlısı olacaqsa, o qədər də türk sülhməramlısı olacaq. Bunu belə başa düşmək lazımdır.

Vidadi ORDAHALLI

Son xəbərlər