Prezident İlham Əliyev xalqa müraciətində Avropa qurumlarına maraqlı təklif verib: “Ermənistanda gündə hansısa müxalifət lideri həbs olunur, Avropa Şurası, haradasan?”
Dövlət başçısı bildirib ki, bizim qələbəmiz artıq Ermənistanda böyük problemlər yaradıb:
“Amma baxın beynəlxalq təşkilatların buna reaksiyası nədir. Varmı reaksiya? Yoxdur. Ermənistanda gündə hansısa müxalifət lideri həbs olunur, özü də tamamilə əsassız. Bir Qərb ölkəsi buna reaksiya veribmi? Yox. Bunu qınayıbmı? Yox. Əsas müxalifət partiyalarının rəhbərləri həbs olunub. Bir nəfər də söz demir. Avropa Şurası, haradasan? Azərbaycana xor gözlə baxan, bizi qaralamağa çalışan, haradasan Avropa Şurası, niyə susursan? Yaxud da ki, monitorinq komitəsi. Orada bizim Azərbaycan üzrə bir neçə məruzəçi təyin ediblər. Ermənistan monitorinq altında olmalıdır. Niyə susursan, Avropa Şurası? Hanı sənin rəhbərlərin, hanı sənin monitorinq komitən, siyasi komitən? Görmürsünüz ki, Ermənistanda repressiya baş alıb gedir? Görmürsünüz ki, diktator at oynadır? Özü də məğlub edilmiş diktator, rəzil vəziyyətdə olan diktator. Bəs niyə səsinizi çıxarmırsınız? Bəs hanı sizin demokratiyanız, insan haqlarınız? Cavab var? Yoxdur. Olmayacaq. Mənim sözlərimdən sonra bax, görərsiniz, olmayacaq. Ört-basdır edəcək, ört-basdır. Avropa Parlamenti Azərbaycana qarşı 10-dan çox eybəcər, yalan üzərində qurulmuş qətnamə qəbul edib. Niyə susursan, Avropa Parlamenti? Özünü guya dünyanın demokratiya mərkəzi sayırsan. Bir səs çıxar, açıqlama ver, bəyanat ver, qına bunu. Dünyanın gözü qarşısında diktator bütün müxalifəti məhv edir. Bir adamı öldürüb. O parlamenti zəbt edənlər arasında bir nəfər artıq ölü tapılıb. Nə üçün səs qaldırmırsınız? Niyə? Müntəzəm olaraq bizə qarşı çirkin kampaniya aparan qeyri-hökumət təşkilatları, niyə susursunuz, niyə söz demirsiniz? Yaxşı, ballistik raketlə bizi vurdu, susdunuz, kasetli bombalarla, fosforlu bombalarla bizi vurdu, susdunuz. Böyük ölkələr, özlərindən Avropanın lideri düzəldən ölkələr, siz niyə susursunuz? Deyin, cavab verin. Yoxsa yerindən duran burada bizə mız qoymaq istəyir, sataşmaq istəyir. Hamısının cavabını verirəm, hamısının, artıqlaması ilə".
Ölkə başçısının Avropa təsisatlarına Ermənistanın timsalında yeni monitorinq obyekti göstərməsi hansı anlama gəlir?
“Azərbaycan bu tarixi qələbəni əldə edəndən sonra onların səsi ümumiyyətlə batıb”
Milli Qeyri Hökumət Forumunun Prezidenti Rauf Zeyni “Bakı-Xəbər”ə açıqlamasında bildirdi ki, Prezidentin göstərdiyi ünvan çox dəqiqdir: “Biz bir ölkə olaraq, bu cür məsələlərlə bağlı artıq möhkəm immunitetə sahibik. O qədər bizə ikili standartlardan irəli gələn basqılar ediblər ki, onları dəf etmək bizim üçün artıq çətin deyil. Əsasən bu ayrıseçkiliyi biz Ermənistanla müqayisədə özümüzə qarşı daha aydın görmüşük. Sanki onlarla bir ərköyün uşaq kimi davranılar. Prezident haqlı olaraq hazırda Ermənistanda baş verənləri onların diqqətinə çatdırdı. Doğru olaraq deyir ki, Paşinyan kimi istəyirsə öldürür, həbs edir, ancaq Avropa Şurasının səsi çıxmır. Bu fikirlərlə ikiəlli razıyam. Biz bütün müsahibələrimizdə bu məqama daim toxunmuşuq. Konkret demişik ki, bizim hər hansı kiçik səhvimizə görə dünyanı dağıdan beynəlxalq təşkilatlar bu gün göz qabağında olan erməni vəhşiliyinə susurlar. İşğaldan azad edilən rayonlarda baş verənləri bəyəm görmürlər? Bu vəhşiliyi heç Hitler etməmişdi. Təbii ki görürlər, ancaq onlara susmaq daha çox sərf edir. Mən tamamilə həmin mövqeni bölüşürəm. Azərbaycan bu tarixi qələbəni əldə edəndən sonra onların səsi ümumiyyətlə batıb. Ən azından, öz mandatlarına uyğun olaraq baş verən hadisələrə münasibət bildirmirlərsə, deməli, öz yoxluqlarını təsdiq edirlər. Prezident dedi ki, onun çıxışından sonra həmin qurumların səsi ümumiyyətlə batacaq. Belə də oldu. Onlar özləri yaratdıqları qaydaları pozurlar”.
Müsahibimizin sözlərinə görə, Avropanın ən böyük ölkəsi, həmsədr olan Fransanın addımları Qərb dəyərlərinin hansı vəziyyətdə olduğu ilə bağlı aydın təsəvvür yaratmış olur.
Məhəmmədəli QƏRİBLİ
