29/11/2020 21:34
728 x 90

Putindən 10 noyabr Qarabağ razılaşması barədə sərt xəbərdarlıq - konkret ünvan deyilməsə də…

img

Rusiya prezidenti Vladimir Putin Dağlıq Qarabağla bağlı noyabrın 10-da üçtərəfli qaydada imzalanmış sülh sazişinin pozulması cəhdi ilə bağlı xəbərdarlıq edib. Putin sazişin pozulmasının yalnız bir alternativi olduğunu deyib:

“Bəyanatın icrasını ləngitməyə çalışan insanlar bunu başa düşməldirlər ki, sazişin pozulmasının yalnız bir alternativi var – müharibə. Əgər, Allah qorusun, müharibə olarsa, onun qurbanlarının qanları bu razılaşmanı pozmağa çalışanların əllərinə bulaşacaq”.

Qeyd edək ki, Ermənistanda hazırda da etiraz aksiyaları davam edir. Bir çox etirazçılar üçtərəfli bəyanatın pozulmasını tələb edir. Etirazçı ermənilərin fikrinə görə, Paşinyanı devirdikdən sonra onun yerinə gələcək şəxs bəyanata əməl etməyə bilər. 5 mindən çox canlı itki verən Ermənistanın baş naziri Nikol Paşinyan isə ağır məğlubiyyəti etiraf edərək, bu bəyanatı xilas yolu kimi gördüyünü açıqlayıb. Onu da xatırladaq ki, Rusiya prezidenti Vladimir Putin bundan öncəki çıxışında "Ermənistanın Qarabağla bağlı hazırkı razılaşmadan imtina etməsi ölkə üçün intihar olardı" demişdi. Putinin sərt tonda etdiyi xəbərdarlıq kimə ünvanlanıb və bundan daha çox hansı ölkə özünə pay götürməlidir?

  • “Bu, birmənalı olaraq Ermənistana yönəlmiş mesajdır”

Politoloq Yeganə Hacıyeva  “Bakı-Xəbər”ə açıqlamasında bildirdi ki, bu, birmənalı olaraq Ermənistana yönəlmiş mesajdır: “Eyni mesajı Ağdamın işğaldan azad olunması münasibətilə Azərbaycan xalqına müraciət edən Ali Baş Komandan İlham Əliyev də səsləndirdi. Ümumiyyətlə, dünən hər iki prezidentin Dağlıq Qarabağla bağlı fikirləri oxşar idi. Sazişin imzalanmasından keçən müddətdə Ermənistanda daxildə istər siyasi qüvvələrdə, istərsə də cəmiyyətdə  sazişə narazılıq ifadə olunur. Sazişin birinci mərhələsinin bitməsinə 9 gün qalıb.  Ermənistanın etməli olduğu iki bənddən biri həyata keçib. Kəlbəcərin boşaldılması üçün isə vaxt istənilib. Ermənistan daxilindəki istər etirazlar, istərsə də siyasi çağırışlar onu göstərir ki, Ermənistan sazişdən boyun qaçırmağa cəhd göstərir.  Oradakı siyasi qruplar və cəmiyyət radikal əhval-ruhiyyədədir. Paşinyanın isə yeni hökümət formalaşdırdığını müşahidə edirik və formalaşan yeni hökümət anti-Rusiyaçı qruplarla boldur. Ənənəvi rusiyapərəst qüvvələr səssiz, yeniləri isə mövcud siyasi konfiqurasiyada kifayət qədər zəifdir. Bunun da bir neçə fundamental əsası var. Ən birincisi budur ki, Rusiya çox uzun müddət Ermənistan hakimiyyətində hansı qüvvənin olmasını çox da əhəmiyyətli məsələ hesab etmirdi. Çünki Ermənistanı Rusiya hökümətindəki erməni şəbəkəsi tərəfindən rahat idarə edirdi. Nikol Paşınyanın timsalında aydın oldu ki, erməni höküməti Rusiayadakı lobbi qrupunu deyil, ABŞ-dakı lobbi qrupunu daha çox dinləyir. Prosesin getməsi üçün Nikol Paşınyan dekabrın 1- nə qədər baş nazir postunda qalmalı və  sazişin bəndləri yerinə yetirilməlidir. Sazişin pozulmasına yönəlik istənilən hərəkətlilik müharibə başladacaq”.

Müsahibimizin sözlərinə görə, hər hansı fövqəladə hadisə, o cümlədən Ermənistanda çevriliş baş verməzsə və hər şey nəzərdə tutulan qrafik üzrə gedərsə, yaxın gələcəkdə bölgədə Rusiya-Türkiyə-Azərbaycan əməkdaşlığında yeni səhifə açılacaq və qonşu İran da fəal şəkildə bu prosesə cəlb ediləcək.

Məhəmmədəli QƏRİBLİ

Son xəbərlər