“Şuşanın götürülməsi çox böyük peşəkarlıq, cəsarət tələb edən əməliyyat idi”. Baki-xeber.com xəbər verir ki, bunu Prezident İlham Əliyev noyabrın 16-da işğaldan azad olunmuş Füzuli və Cəbrayıl rayonlarına səfəri zamanı deyib.
Dövlət başçısı bildirib: “Şuşa işğaldan azad olunandan sonra artıq düşmən dərk etdi ki, bundan sonra bizə qarşı müqavimət göstərmək heç bir əhəmiyyət kəsb etməyəcək. Şuşa işğaldan azad olunandan bir gün sonra qəhrəman Azərbaycan Ordusu daha 70-dən çox yaşayış məntəqəsini işğalçılardan azad edib və əslində, bu, düşmənə vurulan son zərbə idi. Təsadüfi deyil ki, noyabrın 10-da düşmən faktiki olaraq kapitulyasiya aktını imzalamışdır. Şuşanın işğaldan azad edilməsi bizim gücümüzü göstərdi, Ordumuzun peşəkarlığını, hərbçilərimizin cəsarətini, qəhrəmanlığını göstərdi. Şuşanın götürülməsi çox böyük peşəkarlıq, cəsarət tələb edən əməliyyat idi. Əminəm ki, bu əməliyyat dünya hərb tarixində xüsusi yer tutacaqdır. Çünki bu əməliyyatı yalnız yüngül silahlarla silahlanmış bizim qəhrəman hərbçilərimiz dağlardan, meşələrdən, cığırlardan keçərək icra ediblər. Şuşanın işğaldan azad edilməsi bizim şanlı Qələbəmizdir”.
Qeyd edək ki, Azərbaycan Ordusunun həyata keçirdiyi Şuşanın düşmən işğalından azad olunması əməliyyatı bütün dünyada böyük heyrətlə qarşılanır. NATO və digər beynəlxalq hərbi təşkilatlar bu əməliyyatı təqdir edir və bunun dünya hərb tarixi dərsliklərinə salınmasını tövsiyə edirlər. Dünya hərb tarixi fənnində bu əməliyyatın xüsusi yeri olduğunu deyən ekspertlərə görə, artıq dünya mütəxəssisləri bu taktikanı öyrənib əxz edirlər. Ekseprtlər hesab edirlər ki, Azərbaycan Ordusunun həyata keçirdiyi bu unikal hərbi əməliyyatlar ordumuzun, dövlətimizin gücünün, əzəmətinin göstəricisidir.
“...Azərbaycan əsgərinin əzminin, hazırlığının və onun qələbə çalmaq arzusunun bariz nümunəsidir”
Tanınmış hərbi ekspert Tərlan Eyvazov “Bakı-Xəbər”ə bildirdi ki, Şuşanın işğaldan azad edilməsi əməliyyatı dünyanın hərb tarixində nadir hadisədir. O hesab edir ki, bu əməliyyat müasir dünyanın hərb elminə yeni taktika bəxş edib: “Cənab Prezident tamamilə haqlı olaraq qeyd edib ki, Şuşanın götürülməsi çox böyük peşəkarlıq, cəsarət tələb edən əməliyyat idi. Azərbaycan Ordusunun bu unikal hərbi əməliyyatı nəinki yerli mütəxəssislər, eləcə də beynəlxalq ekspertlər tərəfindən təqdir edilib, heyranlıqla qarşılanıb. Onlar öz heyranlıqlarını gizlətməyiblər. Çünki keçmiş Sovet, indiki Rusiya hərbi taktikasında təbii ki, müəyyən üsullar var ki, tutalım, ondan istifadə edərək Şuşanın işğaldan azad edilməsi əməliyyatı həyata keçirilsəydi, onda gərək bir tərəfdən Ağdamdan, Xocalıdan, digər tərəfdən Laçından keçməklə bu əməliyyat baş tutaydı. Amma Azərbaycan Ordusu, Azərbaycanın Baş Qərargahı olduqca unikal bir üsul işlətdi. Azərbaycan Ordusunun işlətdiyi bu unikal hərbi əməliyyat taktikası isə düşməni mat qoydu, beynəlxalq müşahidəçiləri isə heyran etdi. Bu ondan ibarət idi ki, Azərbaycan Ordusu cənub sərhədlərinin 170 kilometr sahəsini azad etməklə Zəngilan, Qubadlı, oradan isə çox çətin keçilən meşə yolları ilə Laçın şəhərinin özündən yan keçməklə Laçın yoluna çıxıblar. Bununla da düşmən tərəfindən Ermənistandan gətiriləcək köməyin qarşısı alındı. Digər bir tərəfdən isə Azərbaycan xüsusi təyinatlıları ağılasığmaz dərəcədə böyük zəhmət çəkərək Hadrut üzərindən keçən və Şuşaya gedən dağ yolları ilə 40 kilometrdən artıq bir məsafəni piyada qət edərək yüngül silahlarla düşmənin üzərinə gedib Şuşanı azad ediblər. Müzəffər ordumuz Şuşanı düşmənin çaynağından əlbəyaxa döyüşlə alıb. Bunu təkcə biz demirik, bunu düşmənin heysiyyatını, təəssübünü çəkən, onun tərəfində duran xarici jurnalistlər - Rusiya, Fransa və digər ölkələrin KİV nümayəndələri deyirlər. İki-üç gün ərzində düşmənlə çarpışmalardan sonra xüsusi təyinatlılarımız Şuşanı tam olaraq nəzarətə götürdülər. Sonra Laçın yolu ilə gələn qüvvələrimiz Şuşanın köməyinə yetişdilər ki, ora Xankəndidən və digər yerlərdən əlavə düşmən qüvvəsi gələ bilməsin. Bununla da Şuşa tamamilə yenidən bizim oldu. Doğrudan, Şuşanın işğaldan azad olunması əməliyyatı dünyanın hərb tarixində baş verən nadir əməliyyatlardan olub ki, bu da bütün dünyanı heyrətə salıb. Yadınızdadırsa, düşmən iddia edirdi ki, guya Azərbaycan tərəfində xaricdən gətirilən muzdlular döyüşür və sair. Həm də deyirdilər ki, Azərbaycan Ordusunun əlində dronlar var. Amma, göründüyü kimi, Şuşanın azad olunması əməliyyatında nə drondan istifadə edilib, nə də digər ağır silahlardan. Şuşa düşmənlə əlbəyaxa döyüşlə azad edilib. Bu gün artıq düşmən tərəf də, xarici jurnalistlər də etiraf edirlər ki, döyüş zamanı şəhid olan, əsir düşən hərbçilərimiz arasında bir nəfər də olsa muzdlu döyüşçüyə rast gəlinməyib, hamısı Azərbaycan Ordusunun hərbçiləri olub. Təbii ki, bu çox yüksək dərəcədə hərbi əməliyyatı planlaşdırmanın və məxfiliyin təmin edilməsinin, ən əsas da Azərbaycan əsgərinin əzminin, hazırlığının və onun qələbə çalmaq arzusunun bariz nümunəsidir” - deyə T.Eyvazov qeyd etdi.
T.Eyvazov qeyd etdi ki, Prezident İlham Əliyevin təşəbbüsü ilə Şuşaya çəkilən yeni yol ordumuzun açdığı yol üzərində qurulur: “Həmin yol bizim hərbçilərimizin Şuşanı işğaldan azad etmək üçün getdikləri yol üzərindən çəkilir. Bu həm də bir nümunədir. Hərbçilərimiz Şuşaya yeni bir yol açıblar. Bilirsiniz ki, köhnə Ağdam-Şuşa yolu hələ tam boşaldılmayıb. Bu yeni yol isə hərbçilərimizin canı, qanı, qəhrəmanlığı ilə açdığı yoldur ki, cənab Prezident Şuşaya yolun oradan çəkilməsini məsləhət görüb. Bu bizim üçün çox təhlükəsiz bir yoldur”.
İradə SARIYEVA
