“Bütün şəhərlərdə Qələbə abidələri ucaldılacaq və həyat qayıdacaq”. Bunu Prezident İlham Əliyev noyabrın 16-da işğaldan azad olunmuş Füzuli və Cəbrayıl rayonlarına səfəri zamanı deyib.
Dövlət başçısı bildirib ki, yeni böyük baş plan tərtib ediləcək. Müvafiq göstərişlər verilib: “Hər bir şəhər üçün xüsusi baş plan tərtib ediləcək. Burada bütün inzibati binalar, ictimai binalar, məktəblər, tibb ocaqları yaradılacaq. Bütün infrastruktur yaradılacaq. Küçələr salınacaq, parklar, xiyabanlar salınacaq. Bütün şəhərlərdə Qələbə abidələri ucaldılacaq və həyat qayıdacaq. Yenə də Azərbaycan vətəndaşları burada yaşayacaqlar, quracaqlar, yaradacaqlar. Amma bugünkü tarix heç vaxt silinməyəcək. Erməni vəhşiliyinin canlı şahidləridir, bax, bu dağılmış evlər. Bu evlərdə Azərbaycan vətəndaşları yaşayıb, mülki vətəndaşlar yaşayıb. Mənfur düşmən gəlib onları öz torpaqlarından didərgin salıb, onların binalarını dağıdıb, onların əmlakını mənimsəyib, talayıb. Düşmən oğru, əxlaqsız, vicdansız bir düşməndir. Mən bir daha demək istəyirəm ki, bizim parlaq Qələbəmiz təkcə ölkəmizin ərazi bütövlüyünün bərpası deyil. Bu, şərlə xeyir qüvvələrinin mübarizəsidir. Şər qüvvələri məğlub olub, amma biz qalib gəlmişik. Çünki biz qurub yaradanıq. Ermənilər isə bax, bunları ediblər, dağıdıblar".
Qarabağda Qələbə abidələrinin ucaldılması təklifini ekspertər müsbət qarşılayırlar.
“…Azərbaycanın haqlı mübarizədə zəfər qazandığının mesajını verəcək”
“Vəfa” Sosial-İctimai Birliyinin sədri Fatimə Hacıbəyli qeyd etdi ki, işğaldan azad olunmuş torpaqlarımızda bütün infrastruktur bərpa ediləcək: “Azad olunan torpaqlarımızın hər qarışı şəhid qanı ilə sulanıb. Orada ermənilər tərəfindən dağıdılan hər bir evin, sönmüş ocağın şəhidi var. Xocalıda və digər bölgələrimizdə çox sayda dəfn olunmamış şəhidimiz var. Məncə, o torpaqlara qayıdışdan sonra narahat ruhlar rahatlıq tapacaqlar. Şəhidlərimizin qisası alınacaq. O yerlər müqəddəs torpaqlardır. İşğaldan azad olunmuş hər bir ərazidə Qələbə abidəsi ucaldılmalıdır. Ucaldılacaq Qələbə abidələri düşmən ölkəyə və bütün dünyaya Azərbaycanın haqlı mübarizədə zəfər qazandığının mesajını verəcək.
Xocalı soyqırımı törədilən ərazilər soyqırım abidə kompleksi şəklində tarix kimi qorunub saxlanmalıdır. Düzdür, hər şeyin doğrusunu cənab Prezident bilir. Biz, sadəcə, vətəndaş kimi fikirlərimizi söyləyirik. Düşünürəm ki, Xocalı o cür abidə kimi saxlanan yer olacaq”.
Həmsöhbətimiz onu da əlavə etdi ki, Şuşa şəhərinin ən yüksək yerlərindən birində bizim xilaskar əsgərimizə abidə qoyulmalıdır. Ümumiyyətlə, bu tarixi Qələbənin birinci qəhrəmanı Ali Baş Komandan İlham Əliyevdir: “Onun atdığı addımlar həlledici idi və Qələbəni təmin etdi. Şanlı Qələbəyə imza atan isə ordumuzdur. Ordumuz, sözün həqiqi mənasında, xariqələr yaratdı, tarixi Qələbəni bizə yaşatdı. Şəhidlərimizin qarşısında baş əyirik, qazilərimizə hörmətlə yanaşırıq”.
Günel CƏLİLOVA
