Ermənistanın Qarabağdakı döyüşlərdə verdiyi itkilər hələ də tam açıqlanmır və rəqəmlər ictimaiyyətdən gizlədilir. Bununla bağlı ziddiyyətli rəqəmlər səsləndirilir. Ermənistan Səhiyyə Nazirliyi Qarabağ döyüşlərində azı 2317 nəfər erməni hərbi qulluqçunun öldüyünü bildirib.
İşğalçı ölkə mətbuatının yaydığı məlumata görə, qurum cəsədlərin qaytarılması prosesində itkilərin daha da çox olacağını bəyan edib: “Bu günə qədər məhkəmə-tibbi ekspertizasından 2317 hərbi qulluqçunun cəsədi keçirilib. Onlar arasında kimliyi müəyyənləşməyən hərbçilər də var. Cəsədlərin dəyişdirilməsi prosesi yeni başlayıb və ona görə də münaqişə tərəfləri ölən hərbçilərinin dəqiq sayı barədə məlumar verə bilməz”.
Ancaq Ermənistanda buna inanan yoxdur. Ölkənin Vatikandakı keçmiş səfiri Mikayel Minasyan isə Ermənistanın itkilərinin 4750 nəfər olduğunu bəyan edib. Onun sözlərinə görə, Nikol müharibə qurbanlarını gizlədib: “Goris, Sisian, Vanadzor, Gümri, Eçmiədzin və İrəvan morqlarında hələ də yer yoxdur. Müharibənin ilk günlərindən etibarən əsgərlərin cəsədləri Abovyanda koronavirusdan ölənlər üçün nəzərdə tutulan meyitxanada saxlanırdı.Valideynlər övladlarının cəsədlərinin qalıqlarını təhvil vermək üçün təxminən iki aydır gözləyirlər, uzun növbələr var. Atalar hətta övladlarının cəsədlərini alıb dəfn edə bilmək üçün rüşvət təklif edirlər. Fakt odur ki, 5 gün əvvəl Milli Təhlükəsizlik Xidməti və Müdafiə Nazirliyi məruzə edib ki, bu vaxta olan məlumatlara görə, 2250 ölmüş və morqa düşən var, 1400 ölmüş və morqda düşməyən var. Həmçinin 1100 nəfər itkin düşüb. Sənədlə Ermənistan Baş nazirinə məruzə edilmiş, təsdiqlənmiş ölüm sayı 4750-dir”.
Rusiya mənbələri isə itkilərin 10 min nəfərə yaxın olduğunu deyirlər.
Maraqlıdır, bəs ekspertlər ermənilərin əsgər itkisinin sayı barədə hansı fikirdədirlər?
“Fərarilərin sayı da böyükdür”
Məsələyə münasibət bildirən hərbi ekspert İbrahim Rüstəmlinin sözlərinə görə, 44 günlük müharibədə erməni tərəfinin hərbi itkiləri hardasa 10 min nəfərə yaxındır: “Hələlik bununla bağlı konkret rəqəm demək çətindir. Ancaq ümumi dəyərləndirmələrə əsasən demək olar ki, ermənilərin əsgəri itkiləri minlərlədir. Məsələ ondadır ki, 10 noyabr bəyanatından sonra Paşinyan müəyyən açıqlamalarla çıxış etdi. Bildirdi ki, Ermənistan bununla razılaşmasaydı, o zaman Dağlıq Qarabağda Ermənistanın 25 minlik ordusu mühasirəyə düşərdi. Nəticədə itkilər daha böyük sayda olardı. Bu statistikadan çıxış etsək görərik ki, ermənilərin daralmış cəbhə xəttində verdikləri əsgəri itkilərin sayı həddən artıq çox olub. Bütün bunlardan çıxış edərək hesab edirəm ki, ermənilərin əsgər itkilərinin təxmini sayı 10 min nəfərdir. Hələ mən yaralanan hərbçiləri demirəm. Onların sayı daha çoxdur. Onu da qeyd edim ki, fərarilərin sayı da böyükdür”.
Hərbi ekspertin fikrincə, Ermənistan hələ bir müddət əsgəri itkilərini gizlətməyə çalışacaq.
Vidadi ORDAHALLI
