Ağdamda Rusiya sülhməramlıları ilə erməni hərbi qüvvələri arasında atışma baş verdiyi haqda məlumat yayılıb. Bu haqda Rusiya Teleqram kanalları yazıb. İddia edilir ki, erməni hərbi birləşmələri təslim olmaqdan və ərazini təhvil verməkdən imtina edirlər. Bildirilir ki, bir neçə hərbi birləşmə komandiri baş terrorçu Araik Arutyunyanın iştirakı ilə Rusiya sülhməramlılarının komandanı Rüstəm Muradovla danışıqlar aparır. Erməni komandirlər şərt irəli sürürlər ki, Paşinyanın imzaladığı kapitulyasiyanı tanımırlar. Onlar Qarabağın “müstəqilliyinin” tanınmasını tələb edirlər. Əks təqdirdə, istənilən ordu ilə döyüşəcəklərini deyirlər.
Sosial şəbəkələrdə yayılan videodan görünür ki, Azərbaycan, Rusiya və Ermənistan rəhbərliklərinin yayımladığı üçtərəfli bəyanata əsasən işğal altında olan Ağdam rayonundakı mövqelərini boşaltmaqdan imtina edən erməni silahlı qüvvələrinin bəzi qruplarına növbəti dəfə xəbərdarlıq edilib.
Videodan görünür ki, ərazidə səsgücləndirici vasitəsilə ermənilərə xəbərdarlıq edilir ki, sakit şəkildə silahı yerə qoysunlar və ərazini tərk etsinlər. Bildirilir ki, onların təslim olmaması və ölümü nəticəni dəyişməyəcək. Yayılan, lakin rəsmi təsdiq edilməyən məlumatlarda atışmada 4 rus sülhməramlısının, 18 erməni əsgərinin öldürüldüyü bildirilir. Erməni silahlı qruplarının bu addımının kökündə hansı niyyətlər dura bilər?
“Ermənistanın bütün ordusu tərəfimizdən sıradan çıxarılıbsa, onların hansısa xırda qruplarla silahlı müqavimət göstərməsi heç nəyi dəyişə bilməz”
Təhlükəsizlik məsələləri üzrə ekspert Elşən Həsənov “Bakı-Xəbər”ə açıqlamasında bildirdi ki, bu məlumat rəsmən təsdiqlənməsə də, inandırıcı görünə bilər: “Çünki ermənilərin öz öhdəliklərinə necə riayət etdiyini biz artıq görürük. Onlar hər vəchlə üç rayondan çıxmaqla bağlı üzərlərinə götürdükləri öhdəlikləri pozmağa çalışırlar. Qrafikə görə, ilk olaraq Kəlbəcər rayonu boşaldılmalıydı. Bunun üçün son tarix noyabrın 15-nə kimi müəyyənləşmişdi. Həmin müddətdə ermənilərin hansı vəhşilikləri törətdiklərini bütün dünya gördü. Evləri yandırdılar, meşələri qırdılar. 10 günlük möhlət istədilər, biz onu da vermişik. Əslində Azərbaycanın bu addımlarını düzgün hesab edirəm. Bizim səbrimiz çoxdur, 30 il gözləmişiksə, 10 günü də gözləyə bilərik. Bununla biz imzalanan sənədə sadiqliyimizi göstəririk. Həm də ermənilərin əlinə əlavə bəhanə vermək istəmirik. Ancaq onlar hər vəchlə bu öhdəliklərdən yayınmağa çalışırlar. Ortaya xristianlıq faktorunu atıblar ki, ay aman, bizim kilsələrimiz orda qalır. Kəlbəcərdə ermənilərə məxsus bir dənə də olsun kilsə yoxdur. Barəsində bəhs olunan məbəd albanlara məxsusdur. Azərbaycan hər zaman onu göz bəbəyi kimi qoruyub. Bütün bu bəhanələr keçmədiyindən, indi də silahlı yola əl atırlar. Bütün bunların arxasında provokasiya niyyətləri durur. Əslində, ermənilər bu öhdəlikləri sevincək halda yerinə yetirməlidirlər. Çünki həmin müqavilə onları məhvdən xilas edib. Ermənistanın bütün ordsusu tərəfimizdən sıradan çıxarılıbsa, onların hansısa xırda qruplarla silahlı müqavimət göstərməsi heç nəyi dəyişə bilməz. Əslində, bu faktor Rusiya sülhməramlıları üçün vacib sayılmalıdır. Onlar bilməlidirlər ki, necə mənfur bir millətlə üzləşməli olacaqlar. Ümid edirəm ki, heç bir bəhanə erməniləri dekabrın 1-dən sonra həmin 3 rayonda saxlaya bilməz. Yaxşı olardı ki, ermənilərin atdıqları bu cür neqativ addımlar Rusiya sülməramlıları tərəfindən ictimailəşdiriləydi və bunun fonunda Ermənistana ciddi xəbərdarlıq olunardı. Azərbaycan öz sözünü deyib. Ermənilər bu öhdəlikləri əməl etsələr, biz onları buna hərbi yolla məcbur etmək yolunu seçəcəyik. Bu dəfə onları bizim əlimizdən kimsə ala bilməyəcək”.
Fikrimizcə, yaxşı olardı ki, Rusiya sülməramlıları ermənilərin rayonlardan çıxarkən törətdiyi vəhşiliklərin qarşısını alsın. Çünki bu addımın özü sülhməramlı missiyaya aid məsələdir.
Məhəmmədəli QƏRİBLİ
