Azərbaycanın işğaldan azad edilmiş Zəngilan rayonu ərazisində Ermənistan Milli Təhlükəsizlik Xidmətinin istifadəsində olmuş binaya baxış zamanı bəzi sənədlər, materiallar aşkarlanıb. Həmin materiallar təhlil olunarkən onların arasında Suriya vətəndaşlarına aid siyahı və pasportların surətlərinin olduğu da müəyyən edilib.
Məlum olub ki, siyahıda adları qeyd olunmuş 60 suriyalı erməni (cəmi 19 ailə) işğal olunmuş ərazilərdə Ermənistan tərəfindən aparılmış qanunsuz məskunlaşdırma prosesində Zəngilan rayonu ərazisinə köçürülüb.
Həmçinin, 02.05.1964-cü il təvəllüdlü, Suriya vətəndaşı, Suriyanın Haseke bölgəsinin sakini Baazo Hraj Sepob (pasport: 015-11-L021693), 12.11.1969-cu il təvəllüdlü, Suriya vətəndaşı, Suriyanın Hələb şəhərinin sakini İskandarian Hartion Avadis (Pasport: 004-11-L128622) və 01.01.1962-ci ildə Suriyada anadan olmuş Ermənistan vətəndaşı Kirakos Babkinin (pasport: AM 0709227) adına verilmiş pasportların kserosurətləri də aşkarlanıb...
Bu sensasion məlumatı rəsmi “Twitter” səhifəsində Azərbaycan Prezidentinin köməkçisi, Prezident Administrasiyasının Xarici siyasət şöbəsinin müdiri Hikmət Hacıyev təsdiqləyib. Bu fakt uzun illərdir işğal olunmuş Azərbaycan ərazilərindəki demoqrafik vəziyyəti lehinə qanunsuz köçürmə yolu ilə dəyişdirməyə çalışan Ermənistanın davamlı siyasətinin daha bir təsdiqidir.
Rəsmi Bakı uzun illərdir Ermənistan tərəfindən işğal olunmuş ərazilərin qanunsuz məskunlaşdırılmasının hər bir halını izlədiyini, heç vaxt və heç bir halda Azərbaycan Respublikası tərəfindən tanınmayacağını vurğulayıb.
Maraqlıdır ki, belə dəqiq faktların olmasına baxmayaraq, Rusiya tərəfi Lavrovun simasında Azərbaycan tərəfdə guya 2 min muzdlunun döyüşdüyü ilə bağlı narahatlıq ifadə edib.
Azərbaycan Respublikasının Prezidenti İlham Əliyev İspaniyanın EFE informasiya agentliyinə müsahibə verərkən müxbirin “Rusiya, Sergey Lavrov dedi ki, Dağlıq Qarabağda təqribən iki min muzdlu döyüşür. Bununla bağlı nə deyərdiniz” sualına aşağıdakı şəkildə cavab verib: "Mən bu ittihamlara, bu əsassız ittihamlara dəfələrlə cavab vermişəm. Səmimi desəm, təəssüflənirəm ki, bitərəf olmalı, onlara ATƏT tərəfindən verilmiş mandata əsasən hərəkət etməli olan ölkələrin yüksək səviyyəli rəsmiləri təsdiqini tapmamış bu əsassız dırnaqarası informasiyadan və şayiələrdən istifadə edirlər. Bu, birincisi. İkincisi, bizdə heç bir muzdlu yoxdur. Mən bu haqda dəfələrlə demişəm. Bizim onlara ehtiyacımız yoxdur. Bizim 100 min döyüşçüdən ibarət ordumuz var, biz tam səfərbərlik elan etsək, bundan bir neçə dəfə çox toplaya bilərik...”
Bir daha təsdiq olunur ki, Lavrov kimi rəsmilər konkret faktlara istinadla deyil, mülahizələr əsasında qərəzli fikir irəli sürürlər. Qubadlıda aşkar olunan faktlar Lavrovun iddialarına əsl cavab sayıla bilərmi?
Politoloq Yeganə Hacıyeva “Bakı-Xəbər”ə açıqlamasında bildirdi ki, bu faktın doğru olmadığını Lavrov hamıdan gözəl bilir: “Biz dəfələrlə sizin qəzet vasitəsilə bu mövzuya toxunmuşuq. Hətta müharibənin başlanmasından çox əvvəl Ermənistanın işğal altındakı ərazilərdə qanunsuz məskunlaşdırma apardığına dair həyəcan təbili çalmışıq. Ortaya konkret faktlar qoyurduq. Təəssüf ki, bu məsələyə dünya birliyi tərəfindən lazımi reaksiya verilmədi. Hətta vəziyyət o həddə çatmışdı ki, Ermənistan rəsmən belə məskunlaşdırmanı apardığını təsdiqləyirdi. Təəssüf ki, Lavrov, Makron kimi siyasətçilər bu cür faktları qoyub, Azərbaycana şər atmaqla məşğul olurlar. Ermənistanın Azərbaycanla döyüş əməliyyatlarına muzdluları, terrorçuları cəlb etməsinə dair çoxsaylı fakt var. Bu faktlar təkcə Azərbaycan mətbuatında deyil, nüfuzlu xarici KİV-də də öz əksini tapmaqdadır. Belə ki, Rusiya, Fransa, Böyük Britaniya, Avropanın bir sıra ölkələrinin KİV-i bu barədə mütəmadi olaraq məlumatlar dərc edir. Həmin məqalələrdə muzdular danışır, onlar döyüşmək üçün Qarabağa gəldiklərini etiraf edirlər. Həmçinin, Yaxın Şərqdən, xüsusilə Livan və Suriyadan gələn muzdlular, PKK terrorçuları Qarabağda Azərbaycan Ordusuna qarşı döyüşürlər”.
Müsahibimizin sözlərinə görə, Qubadlıda aşkar olunan konkret faktlar Ermənistanın bölgəyə məskunlaşdırma adı ilə muzdlu döyüşçüləri cəlb etdiyini sübut edir və yaxşı olar ki, Lavrov bu məsələyə münasibət bildirsin.
Məhəmmədəli QƏRİBLİ
