“Biz mülki şəxslərə hücum etmirik. Oktyabrın 10-dan sonra Dağlıq Qarabağdakı şəhərlərə hücum etmirik. Ondan əvvəl, bəli, bunu qəbul edirik”. Bunu Azərbaycan Respublikasının Prezidenti İlham Əliyev İspaniyanın EFE informasiya agentliyinə müsahibə verərkən deyib.
Prezident qeyd edib ki, Ermənistan ordusunun hərbi hissələrinin və infrastrukturunun çoxu Dağlıq Qarabağın dırnaqarası “paytaxtı” olan Xankəndidə cəmləşmişdi: “Ona görə də biz bunu etməli idik. Biz təhlükəsizliyimizi təmin etmək və əməliyyatımızın daha səmərəli olması üçün həmin mühüm hərbi obyektləri vurmalı idik. Lakin humanitar atəşkəs elan olunandan sonra, - bunu dəfələrlə elan etmişik, - biz heç vaxt insanların yaşadığı heç bir şəhəri və ya kəndi vurmamışıq. Buna zidd olaraq ermənilər nə etdi? Onlar Ermənistan ərazisindən Gəncəyə ballistik raket atdılar və bu, sübuta yetirilib. Baxmayaraq ki, Ermənistanın Baş naziri bunu onların etmədiyini dedi. Lakin bu, gülüncdür”.
Qeyd edək ki, Azərbaycan müharibə qanunlarına tam şəkildə riayət edir, ancaq Ermənistan isə tam əks mövqedədir.
“Müharibə hərb meydanında gedir və mülki insanların yaşadığı ərazilərin qadağan olunmuş silahlardan atəşə tutulması qəbuledilməzdir”
Millət vəkili Azər Badamov bildirdi ki, müharibə hərb meydanında gedir və mülki insanların yaşadığı ərazilərin qadağan olunmuş silahlardan atəşə tutulması qəbuledilməzdir: “Bu gün Ermənistanın Baş naziri, demək olar ki, döyüş bölgəsindəki hərbi birləşmələrə nəzarəti itirib. Orada əvvəlki müxalif ölkə rəhbərləri və yaxud da hərbi birləşmələrin rəhbərləri hansısa bir terror qrupları yaradaraq özfəaliyyətə keçiblər. Paşinyan artıq ölkədə nəzarəti itirib. Ermənistan ordusunda özbaşınalıq hökm sürür və terror əməllərini davam etdirirlər. Erməni hərbi birləşmələr nəzarətsiz şəkildə elan olunmuş humanitar atəşkəslərə riayət etmirlər. Bütün beynəlxalq qanunlar tapdalanırsa, mülki insanlarımıza qarşı belə bir əməllər törədilirsə, bu, Ermənistan hakimiyyətində özbaşınalığın olmasından xəbər verir. Mütləq şəkildə Ermənistanda yaxın günlərdə hakimiyyətdə dəyişikliklər olacaq. Son hadisələrin gedişatı onu deməyə əsas verir”.
Həmsöhbətimiz onu da əlavə etdi ki, bütün bu olaylar, terror hadisələri dünya ictimaiyyətinə çatdırılmalıdır: “Biz hərbi hədəfləri vururuq və artıq kiminsə nəsə deyəcəyini gözləməli deyilik. Ermənilər həddini aşıb. Biz öz mədəniyyətimizi qoruyuruq və müharibə qanunları çərçivəsində haqq savaşımızı aparırıq. Ermənistan isə vəhşicəsinə dinc sakinlərimizi, uşaq və qadınlarımızı hədəfə alır. Biz onların mülki insanlarına hörmətlə yanaşdıqca, daha çox azğınlaşırlar. Ermənilərin bu hərəkəti müharibənin miqyasının genişləndirilməsi və başqa ölkələri də münaqişəyə cəlb etmək məqsədi daşıyır. Ermənistanın bu hərəkətinin cavabı döyüş meydanında artıqlaması ilə verilir”.
Günel CƏLİLOVA
