Məlum olduğu kimi, qondarma “Dağlıq Qarabağ Respublikası”nın əhalisi Ermənistana köçürülüb. Belə ki, qondarma rejimin rəhbəri Araik Arutyunyan Ermənistana köçürülən vətəndaşlara sosial və inzibati xidmətləri həyata keçirən operativ qərargah yaradıb.
O, Ermənistana köçürülən Qarabağ ermənilərini operativ qərargaha müraciət etməyə çağırıb. Bununla belə, yayılan məlumata görə, “DQR” hökuməti, bütövlükdə, İrəvana köçürülüb. Yəni separatçı rejimin “administrasiyası” Xankəndidən İrəvana köçürülüb. Ümumilikdə, separatçıların qondarma “hökuməti”nin İrəvana köçürülməsi xəbəri, əslində, dolayısı yolla qondarma “DQR”in mövcud əhalisinin Ermənistana köçürülməsini təsdiqləyir. Qondarma rejimin öldüsü ilə qaldısı bilinməyən "rəhbəri" Araik Arutyunyanın sosial şəbəkə hesabında Ermənistana köçürülən vətəndaşlara sosial və inzibati xidmətləri həyata keçirən operativ qərargah yaradılmasını deməsi bu qənaətə gəlməyə əsas verir. Arutyunyanın bu çağırışı bir daha onu sübut edir ki, hazırda Qarabağda, demək olar, mülki əhali qalmayıb. Onların hamısı bu və ya digər üsullarla aradan çıxıblar, qaçıblar.
Maraqlıdır, bəs ekspertlər bunu necə dəyərləndirirlər? Qondarma “DQR” “administrasiyası”nın İrəvana köçməsi nə deməkdir?
“Bu gün onlar Şuşanı, Xankəndini boşaldırlar”
Məsələyə münasibət bildirən hərbi ekspert İbrahim Rüstəmlinin sözlərinə görə, bütün bunlar separatçı qurumun sön günlərini yaşamasından xəbər verir: “Əvvəla bu, haqqın, ədalətin bərpa olunması deməkdir. Bunu Azərbaycan xalqının özünün doğma yurd-yuvasına, tarixi torpaqlarına qayıtması kimi dəyərləndirirəm. Qarabağ həm də xalqımızın böyük tarixi mədəniyyət mərkəzidir. Qarabağın ermənilərin əlinə keçməsi təkcə onların gücü daxilində mümkün olmadı. Erməniləri himayə edənlər torpaqlarımızı əlimizdən aldılar. İndi şanlı ordumuz Ali Baş Komandanın rəhbərliyi altında tarixi ədaləti bərpa edir. İndi biz yenidən öz doğma ocağımıza qayıdırıq. Separatçı rejim əvvəl-axır süqut etməli idi. Proseslər göstərir ki, separatçı qurum son çırpıntılarını yaşayır. Bir neçə gün əvvəl qondarma qurumun “məmurları” oradan qaçıblar. Araik istədi ki, onları cəzalandırsın, amma proseslərin sürətlənməsi onun bütün addımlarını heçə endirir. Bu gün onlar Şuşanı, Xankəndini boşaldırlar. Məndə olan informasiyaya görə, Şuşadan əhalinin bir qisminin çıxmasına imkan vermirlər. Bəzi adamlara Azərbaycan Ordusunun hərbi formasını geyindiriblər. Bunu ona görə edirlər ki, həmin insanları özləri qırsınlar və sonra bütün dünyaya bəyan etsinlər ki, guya Azərbaycan ermənilərə qarşı soyqırım həyata keçirir”.
Hərbi ekspertin fikrincə, ermənilərin məğlubiyyəti qaçılmazdır.
Vidadi ORDAHALLI
