Fransada "Boz qurd" hərəkatına rəsmi qadağa qoyuldu. Bu barədə Fransa mediası məlumat yayıb. Məlumatda bildirilir ki, Fransanın Daxili İşlər naziri Gerald Darmanin məsələ ilə bağlı rəsmi qərarı yayımlayıb. Fransalı nazir qadağaya səbəb kimi “Boz qurd” hərəkatının həddən artıq milliyyətçilik aşıladığını, irqi ayrıseçkiliyə səbəb olduğunu bildirib. Nazir deyib ki, bu qərar Fransa Prezidenti Emmanuel Makronun təlimatına uyğun olaraq verilib.
Qərarda 1978-ci ildə Türkiyədə qurulan qrupun bir çox Avropa ölkəsində mövcudluğu və "həddindən artıq sağ türk millətçilərindən" ibarət olduğu izah edilir.
"Boz qurd"un Fransa ərazisində bir neçə təlim düşərgəsinin olduğu, guya "Boz qurd" təmsilçilərinin qanunsuz aksiyalarda iştirak etmək üçün burada təlim aldıqları iddia edilir. Bundan əlavə, təşkilat üzvlərinin sosial şəbəkələrdə ermənilərə və kürdlərə qarşı zorakılıq çağırışlarını yaydıqları, eyni zamanda, ölkədəki kürdpərəst və ermənipərəst nümayişlərin iştirakçıları ilə silahlı toqquşmalara səbəb olduqları bildirilir. Qərarda o da iddia edilir ki, Fransanın Lion şəhərində yerləşən "erməni soyqırımı" abidəsinin üstünə təxribat məqsədilə spreylə yazan da məhz "Boz qurd" olub.
Bütün bunlar onu göstərir ki, Makronun islam düşmənçiliyi qatı türk düşmənçiliyinə keçir. Belə olmasaydı, o zaman indiki situasiyada bu qərarı verməzdi. Nə vaxtdan “Boz qurd” terror təşkilatı olub?
“Terrorçuluq fəaliyyəti ilə “Boz qurd” yox, ermənilərin özləri məşğul olublar”
Məsələyə münasibət bildirən şərqşünas Seyid Camal Əzimbəylinin sözlərinə görə, Fransada bu yaşananlar əsla təsadüfi deyil: “Makronun bu siyasəti müsəlman və türk düşmənçiliyinin əyani göstəricisidir. Bu tək Makronun işi deyil. Bu, Fransadakı bəlli radikal dairələrin məqsədyönlü siyasətinin nəticəsidir. Ermənilərin mövqeyindən çıxış edən Fransa Prezidenti şüurlu şəkildə bunu edir ki, Türkiyəyə qarşı Avropada antipatiya formalaşsın. Türklərin, müsəlmanların sıxışdırılmasına təkan verilsin. Makron, zatən, müsəlmanlara, türklərə düşmən mövqedən yanaşan siyasətçidir. Avropanın müxtəlif ölkələrində fəaliyyət göstərən “Boz qurd” hər zaman türklərin milli maraqlarını müdafiə edib. Terrorçuluq fəaliyyəti ilə “Boz qurd” yox, ermənilərin özləri məşğul olublar. Onlara bu şəraiti də Fransa hakimiyyət orqanları yaradıblar. Türk diplomatlarına qarşı ASALA terror təşkilatının həyata keçirdiyi qətliamları hamı yaxşı bilir. O üzdən, yaxşı olardı ki, Fransa ictimaiyyəti Makronun bu siyasətinə öz etirazını bildirsin”.
Şərqşünasın fikrincə, müsəlmanlar hər zaman bu kimi təxribatlara qarşı hazır olmalıdırlar.
Vidadi ORDAHALLI
