İşğalçı Ermənistanın təxribatçı və separatçı silahlı birləşmələrinin tərkibinin muzdlulardan ibarət olduğu faktdır. Düşmən ölkənin işğalçı silahlı birləşmələri nəinki Suriyadan, Livandan gətirilən muzdlu döyüşçülərdən, PKK və digər terror təşkilatlarından ibarətdir, hətta onların sırasında Fransadan, həmçinin də digər Avropa ölkələrindən gətirilən ekstremist qüvvələr təmsil olunurlar.
Azərbaycan Respublikasının Baş Prokurorluğunun indiyə qədər Ermənistan tərəfindən döyüşən muzdlu döyüşçülərin aşkarlanması, onlar barəsində cinayət işlərinin başlanması, eləcə də bu terrorçuların beynəlxalq axtarışa verilməsi istiqamətində saysız iş gördüyü məlumdur.
Baş Prokurorluqdan baki-xeber.com-a daxil olan məlumata görə, həyata keçirilən bu tədbirlərin davamı kimi, Fransa Respublikasının vətəndaşı, Parisdə zorakılığın əsas təhrikçisi olan Fransanın ekstremist “Zouaves Paris” (ZVP) qruplaşmasının lideri, özünü sosial şəbəkələrdə faşist adlandıran və terrorçu qruplaşma olan “SS” faşist təşkilatının simvolikasından istifadə edən Marc de Cacqeray –Valmenier –in (Mark De Kakkere-Valmenirin) və digərilərinin Azərbaycan Respublikasının ərazisində törətdiyi cinayət əməllərinə dair toplanmış materiallar, habelə kütləvi informasiya vasitələri və sosial media səhifələrində aşkar edilmiş məlumatlar üzrə Azərbaycan Respublikası Baş Prokurorluğunda araşdırma aparılıb. “Araşdırmalarla qeyd olunan cinayətkar birlik və üzvlərinin 2020-ci ilin oktyabr ayında Ermənistanın aidiyyəti dövlət qurumlarının təşkilatçılığı və dəstəyilə Ermənistana gələrək, Azərbaycan Respublikasının işğal olunmuş ərazilərində olan digər şəxslərlə cinayət əlaqəsinə girib cinayətkar birlik halında Azərbaycan Respublikasının beynəlxalq səviyyədə tanınmış dövlət sərhədini müəyyən edilmiş sənədlər olmadan və dövlət sərhədinin nəzarət-buraxılış məntəqlərindən kənarda, yəni Ermənistan ərazisindən qanunsuz keçərək, Xankəndi şəhəri və işğal altında olan digər yaşayış məntəqələrinə gəlmələri, Azərbaycan Respublikasının dinc vətəndaşlarına və antiterror əməliyyatlarını həyata keçirən silahlı qüvvələrinə qarşı Ermənistanın siyasi-hərbi rejimi tərəfindən muzdlu kimi istifadə edilmələri müəyyən edilib”.
Məlumatda bildirilir ki, hazırda qeyd edilən cinayət işi ilə əlaqədar Baş Prokurorluq tərəfindən Fransanın aidiyyəti dövlət qurumlarına hüquqi yardımın göstərilməsi haqqında vəsatət hazırlanır.
“...Ermənistanın dövlət siyasətinin terrorçuluqdan, separatizmdən, ekstremizmdən ibarət olduğunu göstərir”
“İki sahil” qəzetinin baş redaktoru Vüqar Rəhimzadə “Bakı-Xəbər”ə şərhində bildirdi ki, Ermənistanın nəinki Yaxın Şərqdən, eləcə də Avropadan, xüsusən də Fransadan gətirilən muzdlu döyüşçülərdən istifadə etməsi bu ölkənin mahiyyətini tam olaraq ortaya qoyur. “Ermənistanın təxribatçı, terrorçu silahlı birləşmələrin tam tərkibinin müxtəlif ölkələrdən gətirilən muzdlu döyüşçülərdən ibarət olması faktdır. Artıq Azərbaycanın Baş Prokurorluğ tərəfindən Fransanın ekstremist qrupunun rəhbəri ilə bağlı beynəlxalq axtarış da verilib. Fransadan gələn muzdlular da, digəriləri də beynəlxalq terror qruplaşmalarının üzvləridirlər. Ermənistanın Yaxın Şərqdən və Avropadan, xüsusən də Fransadan gətirib döyüşdürdüyü muzdlular bu ölkənin terrorçu ölkə olduğunu bir daha sübut edir. Fransalı ekstremistlərin liderinin, eləcə də digər terrorçuların Ermənistan tərəfindən müharibəyə cəlb edilməsi Ermənistanın dövlət siyasətinin terrorçuluqdan, separatizmdən, ekstremizmdən ibarət olduğunu göstərir. Suriyadan, Livandan gətirilən muzdluların, PKK üzvlərinin Ermənistan tərəfdə vuruşması faktdır. Fransanın terror qruplaşmasının başçısının və üzvlərinin də döyüşlərdə iştirak etməsi Ermənistanın bəşəriyyət əleyhinə böyük cinayətlər törətdiyini aşkar şəkildə ortaya qoyur. Bunu dünya da görməlidir ki, terrorçu Ermənistanın tərəfində müharibədə avropalı ekstremist qruplaşmaların təmsilçiləri də yaxından iştirak edirlər. Hesab edirəm ki, Fransa bu məsələyə reaksiya verməli, ekstremist qruplaşmanın lideri olan vətəndaşının muzdlu kimi Ermənistan tərəfdə döyüşməsinə münasibət bildirməlidir. Əgər buna münasibət bildirmirsə, o, ATƏT-in Minsk Qrupunun həmsədrlərindən biri kimi nə qədər tərəf tutduğunu və ədalətsiz olduğunu ortaya qoyur. Fransa Ermənistanı açıq şəkildə dəstəkləyir və onun terrorçu əməllərinə hətta öz ekstremist qüvvələri ilə dəstək belə olur. Fransa münaqişənin nizamlanmasında bitərəf olmaq əvəzinə, çox təəssüflər olsun ki, tərəfkeşlik nümayiş etdirir, Ermənistana dəstək verir və hətta terrorçularının da Azərbaycana qarşı cinayətlər törətməsinə şərait yaradır. Bu təəssüf doğurur. Bu, birmənalı olaraq, Fransa dövləti tərəfindən ədalət prinsiplərinin pozulması, beynəlxalq hüququn kobud şəkildə tapdanmasıdır.
Fikrimcə, bu yalnız Avropa üçün deyil, dünya üçün bir mesajdır ki, Fransada belə terrorçu qruplaşmalar fəaliyyət göstərirlər. Fransanın həmin terrorçu, ekstremist qrupları da Ermənistanın tərəfində terrorçu muzdlu kimi Azərbaycan Ordusuna qarşı vuruşur, bəşəriyyət əleyhinə törədilən cinayətlərin iştirakçısına çevrilirlər. Bu fakt bütün dünyanı düşündürməlidir” - deyə V.Rəhimzadə qeyd etdi.
İradə SARIYEVA
