Prezident İlham Əliyev xarici media qurumlarına verdiyi müsahibələrdə Ermənistanın bütün yalanlarını ifşa edir. Son müsahibələrindən birində cənab Prezident Ermənistanın öz ordusu barədə yaratdığı bütün miflərin darmadağın edildiyini bildirib.
Ölkə başçısı qeyd edib ki, Ermənistan bu gün döyüş meydanındakı qələbəsini həzm edə bilməməsi səbəbindən bizə böhtanlar atır. İlham Əliyev xüsusi olaraq vurğulayıb ki, bu müharibə həm də onu göstərdi ki, Ermənistanın güya bizim torpaqları təkbaşına işğal etməsi ilə bağlı söylədikləri də ağ yalan imiş. Sitat: “...Bilirik ki, PKK oradadır. Bilirik ki, Yaxın Şərqdən bəzi terrorçular qondarma “Dağlıq Qarabağ ordusu”na qoşulublar. Ona görə də, əfsuslar olsun ki, bu məsələ qətiyyən müzakirə mövzusu deyil. Bu, Azərbaycana qarşı qəsdən törədilmiş hücum barədə siyasi hücum təəssüratı yaradır. Bundan əlavə, ermənilərin bu yalan bəyanatdan sui-istifadə etmələrinin səbəbi odur ki, bizim onları döyüş meydanında məğlub etdiyimizi qəbul etmək onlar üçün, yəqin ki, çox ağrılıdır. Onlar 30 il ərzində özlərini elə göstərirdilər ki, məğlubedilməz orduları var. Onlar 30 il ərzində bizim əraziləri təkbaşına işğal etdiklərini deyirdilər, baxmayaraq ki, biz bunun doğru olmadığını bilirik. Beləliklə, biz onlara kimin kim olduğunu sübut etdik. Biz sübut etdik ki, onların guya “məğlubedilməz ordusu” əfsanədir, mifdir və bunu qəbul etmək onlar üçün çox ağrılıdır. Lakin onlar artıq öz məğlubiyyətlərini etiraf ediblər. Baş nazir Paşinyan Prezident Putinə məktub göndərərək hərbi yardım xahiş edib. Bu onların hərbi məğlubiyyətlərini və bizim qələbəmizi qəbul etmələri deməkdir”.
Ölkə başçısının Ermənistan ordusunun əsl simasını və nəyə qadir olduğunu açıqlamasından hansı nəticələri çıxara bilərik?
Hərbi ekspert Daşdəmir Əliyev “Bakı-Xəbər”ə açıqlamasında bildirdi ki, Ermənistan ordusunun nəyə qadir olduğunu biz gözəl bilirdik: “Onlar heç vaxt bizdən güclü olmayıblar. Sadəcə, tarixi şərait elə gətirmişdi ki, havadarlarının köməyi ilə bir qədər irəliləyişlərə nail olmuşdular. Bu yaxınlarda əcnəbi jurnalistlərdən birinin sualına cavab verərkən Prezident dedi ki, biz müharibəni heç vaxt uduzmamışıq. Azərbaycan Ordusunun bu gün göstərdiyi rəşadət bir daha sübut edir ki, bizim ordumuza qalib gəlmək asan məsələ deyil. Ermənilərin qazandığı müvvəqəti uğurlar həm də Azərbaycanın daxilində gedən siyasi kataklizmlərin fonunda baş vermişdi. İndi isə Azərbaycan çox güclü orduya və iqtisadiyyata sahibdir. Bizim ordumuz ən müasir silahlarla müharibə aparır. Hətta dünyanın ən nüfuzlu hərbi dərgiləri və ekspertləri Azərbaycanın apardığı müharibə taktikasına heyranlıqlarını ifadə edirlər. Ermənistan ordusundakı vəziyyət göz qabağındadır. Orduda döyüşməyə şəxsi heyətləri belə çatmır. Müharibədən çəkilən kadrlardan görürük ki, onlar artıq qocaların və qadınların ümidinə qalıblar. Azərbaycan ordusunun əks hücumu ilk günlərdən göstərdi ki, Ermənistanın “keçilməz sədd” təbliğatı şişirtmə imiş. Azərbaycan bir neçə saat ərzində həmin səddi darmadağı etdi. Təbiidir ki, bu gücdə olan ordu bizim torpaqlarımızı öz gücünə işğal edə bilməzdi. Artıq həmin işğalçı ordu tərəfimizdən darmadağın edilib, can verir. Müharibənin ilk günlərindən Paşinyanın telefonlarda qalması, dünya liderlərinə yalvarması onun ordusuna güvəninin aşağı səviyyədə olmasını şərtləndirirdi. Bir aydan artıq gedən hərbi əməliyyatlar dönəmində düşmən ordusu, demək olar ki, tam sıradan çıxarılıb. Paşinyanın indi də telefon zəngi ilə deyil, məktub vasitəsilə dünya liderlərinə yalvarması bir daha onların rəzil gündə olmasından xəbər verir. Prezident müsahibələrində Ermənistan ordusunun nəyə qadir olduğu ilə bağlı dünya ictimaiyyəti üçün aydın təsəvvür yarada bilir”.
Bu qısa müddət ərzində biz düşmən ordusunun həqiqətən hansı acınacaqlı vəziyyətdə olduğunu əyani şəkildə müşahidə edə bildik.
Məhəmmədəli QƏRİBLİ
