Ermənistanın Vatikandakı keçmiş səfiri Mikael Minasyan baş nazir Nikol Paşinyanı qanunsuz brilyant ticarəti ilə əlaqəli mafiya sistemi yaratmaqda ittiham edib. Bu barədə Minasyan yeni videomüraciətində bildirib.
Keçmiş səfir baş naziri oliqarxlarla gizli razılaşmada, qanunsuz bizneslə məşğul olmaqda və bu yolla pul qazanmaqda günahlandırıb. Minasyanın sözlərinə görə, insanlar tədricən Paşinyanın sözlərinin yalan olduğunu başa düşüblər. O əlavə edib ki, Hindistandan qanunsuz yolla gətirilən brilyantlar 2-3 fabrikə göndərilir. Orada məhsullara "erməni istehsalı" adı qoyulur və heç bir gömrük ödəməsi olmadan xaricə çıxarılır.
Sabiq diplomatın fikrincə, 2020-ci ilin birinci rübündə Ermənistandan 20 milyard dram (40 milyon dollar) dəyərində brilyant ixrac edilib: “Bu miqdarda brilyantı emal etmək üçün orta hesabla 1400 mütəxəssis lazımdır. Ancaq Ermənistanda 400-dən artıq mütəxəssis qeydiyyata alınmır. Yəni erməni ustaları fiziki olaraq bu qədər miqdarda bahalı daş emal edə bilməzlər. Bütün sistem Paşinyan ailəsi tərəfindən yaradılıb və idarə olunur. Ermənistanın beynəlxalq tərəfdaşları artıq 3 ayda bu qədər brilyantın haradan gəldiyinə təəccüb etməyə başlayıblar”.
M.Minasyan bundan əvvəl Paşinyanın qanunsuz siqaret qaçaqmalçılığı ilə məşğul olduğunu faktlarla ifşa edib. Qeyd etmişdi ki, Rusiya istintaq orqanlarında bu istiqamətdə araşdırma gedir. Bu dəfə isə Paşinyanın qanunsuz brilyant ticarəti ilə məşğul oduğu məlum olub.
Göründüyü kimi, Ermənistan baş naziri müxtəlif qanunsuz ticarətlə məşğul olaraq sərvət toplayır.
“...artıq onun cinayət məsuliyyətinə cəlb edilməsinə gətirib çıxarmalıdır”
Sözügedən məsələni “Bakı-Xəbər”ə şərh edən politoloq Məhəmməd Əsədullazadənin sözlərinə görə, Paşinyanın qaçaqmalçılıq ticarəti ilə məşğul olması onu göstərir ki, ölkə kriminal ünsürlərin nəzarətindədir: “Ermənistanda demokratiya anlayışı nisbidir və bunu baş nazir Nikol Paşinyan öz əməllərində büruzə verir. Bir ölkənin baş naziri qaçaqmalçılıqla məşğul olursa, demək, bu ölkə kriminal ünsürlərin nəzarətındədır. Qaçaqmalçılıq beynəlxalq cinayətdir və bununla bir ölkənin baş baziri məşğul olursa, demək, burada cinayətkarlıq yüksək səviyyədə dövlət tərəfindən müdafiə olunur. Hesab edirəm ki, Paşinyanın brilyant və siqaret qaçaqmalçılığı ilə məşğul olması artıq onun cinayət məsuliyyətinə cəlb edilməsinə gətirib çıxarmalıdır. Ermənistanda hüquq olmadığı üçün kriminalizm, demək olar ki, dövlət səviyyəsində həyata keçirilir. Hazırda Paşinyana qarşı bu kimi iddiaların olması onun siyasi fiaskosunu sürətləndirə bilər. Xalq baş nazirdən sosial sahədə islahatlar, cinayətkarlığa qarşı mübarizə gözlədiyi bir ərəfədə onun özünün qanunsuz bizneslə məşğul olması çox mənfi tendensiyadır. Artıq Paşinyan üçün gerisayım başlayır və ona qarşı bu kimi ittihamlar daha da çoxalacaq. Çünki Paşinyan özü cinayətkarlığı müdafiə edir”.
Vidadi ORDAHALLI
