Həbsdə olan futbolçu Cavid Hüseynovun ev dustaqlığına buraxılması barədə məhkəməyə müraciət edilib. Təqsirləndirilən şəxsin vəkili Adəm Məmmədov APA-ya bildirib ki, vəsatət Səabil rayon Məhkəməsinə təqdim edilib. Vəsatətə yaxın günlərdə baxılacaq.
Adəm Məmmədov onu da bildirib ki, İtaliya mətbuatında C. Hüseynovla bağlı üzrxahlıq mətni yayılıb: "İtaliya mətbuatında Rasim Əliyevin ölümündə Cavid Hüseynovun günahkar olması haqqında məqalə dərc olunmuşdu. Lakin Avropa Şurasının baş katibi Torbyorn Yaqlandın yalanlarını ifşa edən açıqlamamdan sonra İtaliya mətbuatında Cavid Hüseynovla bağlı üzrxahlıq mətni yayılıb. Onlar səhv etdiklərini anlayıblar” .
Qeyd edək ki, avqustun 8-də jurnalist Rasim Əliyev paytaxtın Bayıl qəsəbəsi ərazisində bir qrup naməlum şəxs tərəfindən döyülərək çoxsaylı bədən xəsarətləri ilə Kliniki Tibbi Mərkəzə yerləşdirilib və avqustun 9-da orada vəfat edib.
