Yanvarın 1-dən pensiyalar orta aylıq əməkhaqlarının artımı qədər artırılacaq. Bunu Əmək və əhalinin sosial müdafiəsi nazirinin müavini Anar Kərimov deyib. Onun sözlərinə görə, bu artımın 13-14 faizə yaxın olacağı gözlənir: “Yanvarın 1-dən pensiyalar orta aylıq əməkhaqlarının artımı qədər - təxminən 13-14 faizə yaxın artırılacaq. Bu, bütün pensiyalara, o cümlədən, minimum pensiyalara şamil olunacaq”.
A.Kərimov əlavə edib ki, artımdan sonra minimal pensiyaların məbləğinin 230 manata çatacağı gözlənir: “Artıq minimum pensiyaların məbləğini təqribən 72 faiz artıraraq 200 manata çatdırmışıq. Biz gözləyirik ki, indeksləşdirilmə nəticəsində baş verəcək artımdan sonra pensiyaların minimal məbləği 230 manata yaxın olacaq. Prezident İlham Əliyevin də tapşırığı var ki, əhalinin sosial təminatı gücləndirilməli, sosial rifah yaxşılaşdırılmalıdır. Buna görə də hazırda pensiyaların minimal məbləğinin artırılması nəzərdən keçirilir”
O da məlumdur ki, təkcə son bir il ərzində pensiyaların artırılması ilə bağlı ölkə Prezidentinin bir neçə qərarı var. Prezidentin qanunvericilik təşəbbüsləri nəticəsində 2019-cu ildə Azərbaycanda minimum pensiya məbləği 72.4 faiz artırılıb.
Məsələ ondadır ki, 2018-ci ildə Azərbaycanda minimum pensiyanın məbləği 116 manat təşkil edirdi. Prezident İlham Əliyevin qərarı ilə 1 mart 2019-cu ildə minimum pensiyanın məbləği 116 manatdan 160 manata qaldırıldı. Oktyabrın 1-dən isə minimum pensiyanın məbləği 160 manatdan 200 manata qaldırıldı. Dövlət başçısının qanunvericilik təşəbbüsü əsasında cari il oktyabrın 1-dən pensiyanın minimum məbləği 25 faiz artırılıb. Ümumilikdə, 660 min nəfəri əhatə edən pensiya artımı üçün illik əlavə olaraq 216 milyon manat ayrılıb. Bununla da minimum pensiya 160 manatdan 200 manata çatdırılıb. Alıcılıq qabiliyyəti göstəricisi üzrə Azərbaycan minimum pensiya məbləğinə görə MDB məkanında birinci yerdədir.
Onu da qeyd edək ki, aprelin 1-dən 14 kateqoriyaya aid şəxslər üzrə sosial müavinətlər, 9 kateqoriyaya aid şəxslər üzrə isə Prezidentin aylıq təqaüdlərinin məbləği orta hesabla 100 faiz artırılıb. Sosial təminat sisteminin əhatə dairəsi daha da genişləndirilib, 2 yeni təqaüd növü - sağlamlıq imkanları məhdud uşaqlara və I dərəcə əlilliyi olan şəxslərə qulluq edənlərə Prezidentin aylıq təqaüdü təsis olunub. Habelə aylıq sosial müavinət alan I dərəcə əlilliyi olan şəxslər üçün Prezidentin aylıq təqaüdü pensiya alan I dərəcə əlilliyi olan şəxslərə də şamil edilib. Sayı 80 minədək olan müharibə veteranlarına aylıq təqaüdlər təsis olunub. Sosial müavinət və təqaüd artımları, təsis olunan yeni təqaüdlər 300 mini əlilliyi olan şəxslərdən ibarət 600 minədək vətəndaşın rifahını yaxşılaşdırıb. Bunlardan əlavə, məcburi köçkünlərin aylıq müavinəti 50 faiz artırılıb, 800 min vətəndaşın problemli kreditləri həll olunub, tələbələrin təqaüdlərində əhəmiyyətli artımlar edilib.
Ən nəhayət, 2020-ci ildə əmək pensiyalarının ödənişi üçün xərclərin proqnozu 2019-cu ilin rəqəmlərinə nisbətdə 16,63 faiz və ya 651,68 milyon manat çox nəzərdə tutulub. Bu barədə Azərbaycan Respublikasının 2020-ci il üzrə dövlət büdcəsinin zərfində qeyd edilib. Büdcə zərfinə əsasən, 2020-ci ildə əmək pensiyalarının ödənişi üçün ümumi məbləğ 4570,08 milyon manat planlaşdırılıb. Əmək pensiyalarının orta aylıq məbləği 2018-ci ildə 7,7 faizlik, 2019-cu ildə isə 11,8 faizlik artımla 2019-cu il üçün 250,8 manat təşkil edib. 2020-ci il üçün əmək pensiyalarının orta aylıq məbləği 293,3 manat proqnozlaşdırılır. Bu isə gələn il orta aylıq pensiyanın 300 manata yaxın olacağı anlamına gəlir. Müqayisə üçün qeyd edək ki, 2019-cu ildə orta aylıq əmək pensiyasının həcmi 241 manat olub. Bu o deməkdir ki, gələn il bu rəqəm 60 manatadək artacaq. Bu da pensiyaçıların sosial durumuna müsbət təsir edəcək.
Vidadi ORDAHALLI
.jpg)
.jpg)
