Rusiyanın İqtisadi inkişaf naziri Maksim Oreşkin Prezident İlham Əliyevlə görüşü zamanı bildirib ki, Rusiyanın Avrasiya İqtisadi İttifaqı ilə ticari-iqtisadi münasibətlərində mənfi dinamika fonunda, Azərbaycanla ticarət dövriyyəsi 30 faiz artıb:
“Həqiqətən, cari rəqəmlərə nəzər salsaq, əmtəə dövriyyəsini və dinamikanı əks istiqamətdə müqayisə etsək, məsələn, bu il Avrasiya İqtisadi İttifaqı ilə bizim münasibətlərimizdə dinamika mənfidir, əmtəə dövriyyəsi bir qədər azalır. Buna görə, həqiqətən, Azərbaycanla təqribən 30 faiz artım var. Bu, ümumiyyətlə, hər hansı ölkə ilə müqayisədə həqiqətən ən yüksək göstəricilərdən biridir. Doğrudan da baza bəlkə də bu qədər yüksək olmayıb və Hökumətlərarası Komissiya çərçivəsində mənim həmkarlarımla birlikdə həyata keçirdiyimiz ilk tədbirlər, sədlərin aradan qaldırılması, bazarlar açılması – bütün bunlar ciddi irəliləyişə nail olmağa və bu cür yaxşı nəticələr göstərməyə imkan verib”.
Rusiyalı nazirin fikrincə, bu sahədə daha irəli getmək və elə etmək lazımdır ki, bunlar birdəfəlik nəticə deyil, daimi hadisə olsun: “Buna görə biz burada, əlbəttə, əməkdaşlığın dərinləşdirilməsi üzərində işləyəcəyik. Çünki bunlar, sadəcə, sədlər deyil, bunlar müştərək layihələr məsələləri və əlavə dəyər zənciridir”.
Görünən odur ki, Azərbaycanın Rusiya üçün iqtisadi önəmi daha da artmaqdadır. Bunun nəticəsidir ki, Rusiyanın Aİİ ölkələri ilə ticari-iqtisadi münasibətlərində mənfi dinamika müşahidə edildiyi halda, Azərbaycanla ticarət əlaqələrinin həcmi artır.
Maraqlıdır, bəs ekspertlər bunu necə dəyərləndirirlər?
“Tərəflər arasında mal dövriyyəsi həcminin artması müşahidə edilir”
Məsələyə münasibət bildirən İqtisadi Resursların Öyrənilməsi Mərkəzinin direktoru Ruslan Atakişiyevin sözlərinə görə, bu, Azərbaycanın Rusiya üçün vacib iqtisadi tərəfdaş olmasından irəli gəlir: “Azərbaycanın 3 əsas ticarət tərəfdaşlarından biri də Rusiyadır. Azərbaycandan Rusiyaya qeyri-neft məhsulları ixrac olunur. Əsasən də kənd təsərrüfatı məhsullarının ixracında Rusiya vacib partnyorlardan biridir. O cümlədən, biz qida və digər sektorlarda bir sıra məhsulları Rusiyadan idxal edirik. Ümumiyyətlə, son dövrlərdə Azərbaycan şirkətləri Rusiyada investisiyalar yatırırlar. “Şimal-Cənub” nəqliyyat dəhlizi ilə bağlı görülən işlər də iki ölkə arasında ticarət dövriyyəsinin artmasına öz müsbət təsirini göstərir. Məsələ ondadır ki, tərəflər arasında mal dövriyyəsi həcminin artması müşahidə edilir. Bütün bunlar, istər-istəməz, iki ölkə arasında olan iqtisadi əlaqələrin dərinləşməsinə gətirib çıxarır. Yəni bütün bunlar bir-birilə sıx bağlıdır. Rusiyanın Azərbaycanla iqtisadi əlaqələrinin genişlənməsi fonunda, Aİİ ölkələri ilə əlaqələrdə mənfi tendensiyaların özünü göstərməsi maraqlı məqamdır. Bütün bunlar onu göstərir ki, Azərbaycan getdikcə Rusiyanın əsas ticarət tərəfdaşlarından birinə çevrilməkdədir. Hesab edirəm ki, bu amil böyük əhəmiyyət kəsb edir”.
Vidadi ORDAHALLI
