“İcra başçıları da həm yerli, həm də xarici biznes dairələri ilə sıx təmaslar qurmalıdırlar, şəhər və rayonlara investisiyalar cəlb etməlidirlər ki, yerli istehsal artsın, işsizlik daim aşağı səviyyədə olsun”. Bu sözləri Prezident İlham Əliyev Rüstəm Xəlilovu Hacıqabul Rayon İcra Hakimiyyətinin başçısı, Vüqar Novruzovu isə Naftalan Şəhər İcra Hakimiyyətinin başçısı vəzifələrinə təyin olunması ilə əlaqədar qəbul edərkən deyib.
O qeyd edib ki, işsizliklə bağlı olan problemlər, bütövlükdə, Azərbaycanda öz həllini tapır və beynəlxalq qurumlar da bu sahədəki uğurlarımızı qeyd edirlər: “Ancaq mən bunu dəfələrlə demişəm. Bəzi qonşu ölkələrdən fərqli olaraq, bizim əhalimiz artır. Cənubi Qafqazda Azərbaycan yeganə ölkədir ki, əhalisi artır və Sovet dövründən sonra müstəqillik illərində demək olar ki, 30% artıb, 7 milyondan 10 milyona çatıb. Bütün bunlar, əlbəttə, tələb edir ki, yeni iş yerləri yaradılsın və iş yerlərinin yaradılması üçün investisiya layihələri icra edilməlidir. Ona görə də icra başçıları da həm yerli, həm də xarici biznes dairələri ilə sıx təmaslar qurmalıdırlar, şəhər və rayonlara investisiyalar cəlb etməlidirlər ki, yerli istehsal artsın, işsizlik daim aşağı səviyyədə olsun”.
İcra başçılarının yerli və xarici biznes dairələri ilə birgə iş qurmasının vacibliyi barədə Prezident dəfələrlə icra başçılarına çağırışlar edib. Bu sahədə istənilən nəticəni necə əldə etmək olar?
“…gəlir gətirən sahələrin yaradılması kimi işlərin Bakıda həll olunacağını gözləmək düzgün deyil”
Mövzu ilə bağlı iqtisadçı-ekspert Pərviz Heydərova müraciət etdik. O, “Bakı-Xəbər”ə açıqlamasında qeyd etdi ki, ölkə başçısı bir neçə dəfə icra başçılarına, bölgələrdə fəaliyyət göstərən biznesmenlərə müraciət edib ki, onlar yerli və xarici investorlarla birgə işləməkdə maraqlı olsunlar. Hətta Prezident regionların sosial-iqtisadi inkişafına dair dövlət proqramlarının icrası ilə bağlı iclaslarda da bu məsələyə toxunub. Prezident dəfələrlə çıxışı zamanı qeyd edib ki, hər bir işin paytaxt tərəfindən icra olunmasını gözləmək bugünkü çağırışlara cavab vermir. Ümumiyyətlə, hər regionun icra başçısı maraqlı olmalıdır ki, orada sahibkarlıq fəaliyyəti inkişaf etsin. İcra başçıları bununla bağlı əhali arasında müəyyən çağırışlar etməli, onlar arasında təbliğat işi aparmalıdırlar. İcra başçıları bilməlidirlər ki, regionlara investisiyaların cəlb olunması, müvafiq biznes fəaliyyətinin təşkil edilməsi, eyni zamanda, yeni iş yerlərinin açılması, gəlir gətirən sahələrin yaradılması kimi işlərin Bakıda həll olunacağını gözləmək düzgün deyil. Dövlət başçısı tərəfindən təyin olunan icra başçılarından tutmuş, bələdiyyələrə qədər regionlara investisiyaların cəlb edilməsində maraqlı olmalıdırlar”.
Günel CƏLİLOVA
