Aydın Hüseynov: “Bu o deməkdir ki, aparılan islahatlar kompleks xarakterli və davamlı olacaq”
“Biz hazırda çox aktiv transformasiya mərhələsindəyik”. Bunu Prezident İlham Əliyev CISCO şirkətinin qlobal innovasiyalar üzrə vitse-prezidenti Qay Didrixin rəhbərlik etdiyi nümayəndə heyətini qəbul edərkən deyib.
Dövlət başçısının sözlərinə görə, struktur islahatları, siyasi, iqtisadi islahatlar, məsuliyyətin gücləndirilməsi ilə bağlı tədbirlər ölkəyə faydalar gətirir: “Nəqliyyat, Rabitə və Yüksək Texnologiyalar Nazirliyi sizin üçün yaxşı tərəfdaşdır. Biz gələcəklə bağlı planlarımızı, Azərbaycanın müasirləşdirilməsi, informasiya texnologiyaları sektorunun inkişafı ilə bağlı planlarımızı dəfələrlə müzakirə etmişik. Biz hazırda çox aktiv transformasiya mərhələsindəyik. Struktur islahatları, siyasi, iqtisadi islahatlar, məsuliyyətin gücləndirilməsi ilə bağlı tədbirlər, şəffaflıq - bütün bunlar hamısı ölkəyə böyük faydalar gətirir, həm siyasi, həm də iqtisadi”.
Prezident onu da qeyd edib ki, CISCO şirkəti ilə hakimiyyət orqanları arasında əməkdaşlıq çox yaxşı səviyyədədir.
Bütün bu deyilənlərin fonunda, Prezident “Azərbaycan transformasiya mərhələsindədir” deyərkən nəyi nəzərdə tutur?
- “Ölkə başçısının gördüyü işlərin nəticəsidir ki, Azərbaycanda ciddi dəyişikliklər baş verir”
Sözügedən məsələyə aydınlıq gətirən millət vəkili Aydın Hüseynovun sözlərinə görə, burada söhbət islahatların kompleks xarakterli olmasından və bütün sahələri əhatə etməsindən gedir: “Bu o deməkdir ki, aparılan islahatlar kompleks xarakterli və davamlı olacaq. Yəni islahatlar sistemli olacaq və bütün sahələri əhatə edəcək. Nəzərə almaq lazımdır ki, Azərbaycan ən çox islahat aparan ölkələr sırasındadır. Bununla belə, aparılan islahatlar kompleks xarakter daşıyır. Çünki həm struktur, həm də iqtisadi islahatlar aparılır. Xüsusən də kadır sahəsində aparılan islahatlara mühüm önəm verilir. Bunun nəticəsidir ki, Azərbaycanda aparılan islahatlarla bağlı beynəlxalq qurumlar müsbət fikirdədirlər. Hazırlanan hesabatlarda Azərbaycan öncül yerlərdə qərarlaşıb. Mötəbər reytinq cədvəllərində ön sırada yer tuturuq. Bu zaman həm ölkənin imici yüksəlir, həm də iqtisadi qüdrətimiz artır. Prezident İlham Əliyevin qətiyyəti sayəsində Azərbaycan dünyada gedən proseslərə tez bir zamanda adaptasiya olunur. Ölkə başçısının gördüyü işlərin nəticəsidir ki, Azərbaycanda ciddi dəyişikliklər baş verir”.
Vidadi ORDAHALLI
