Dövlət Gömrük Komitəsində “2019-cu ilin 10 ayı ərzində görülən işlər, qarşıda duran vəzifələr” mövzusunda keçirilən mətbuat konfransında DGK sədri Səfər Mehdiyev jurnalistlərin suallarını da cavablandırıb.
Verilən hər bir suala ətraflı cavab verən sədr, son zamanlar ictimaiyyətdə Gömrük Komitəsinin ləğvi ilə bağlı səslənən fikirlərə də münasibət bildirib. Sədr söyləyib ki, bu məsələ komitənin səlahiyyətində deyil: "Hər hansı bir qurumun rəhbəri, Dövlət Gömrük Komitəsi, eləcə də digər qurumlar hansısa komitəni ləğv edə bilməzlər. Bu bizim səlahiyyətlərimizə daxil deyil. Görünən odur ki, cənab Prezident son islahatlarda məsləhət görməyibsə, komitənin ləğvindən söhbət gedə bilməz".
Daha sonra DGK sədri bu ilin 10 ayında Azərbaycanın idxalının dəyərinin ötən ilin eyni dövrü ilə müqayisədə 24% çox olduğunu dedi: “Amma bu artımın 85%-ni Azərbaycan Dövlət Neft Fondunun (ARDNF) ölkəyə idxal etdiyi qızıl təmin edib. İdxalın real artımı 6-7%-dir. Məsələn, buğda idxalında kəskin artım var. Bu ilin yanvar-oktyabr aylarında buğda idxalına çəkilən xərc ötən ilin eyni dövrü ilə müqayisədə 119 milyon ABŞ dolları, yaxud 68% çox olub”.
S.Mehdiyev çıxışı zamanı onu da əlavə etdi ki, 2019-ci ilin dövlət büdcəsi ilə bağlı proqnoz tapşırığına noyabrın 5-də 100% əməl edilib. 10 ay ərzində isə büdcə öhdəliyi 123% yerinə yetirilib: “Bu gedişlə bu il büdcəyə 700 milyon manat əlavə vəsait köçürəcəyik”.
Komitə sədri xarici dövlət nömrəsi olan avtomobillərin ölkə ərazisində qalma müddətinə dair qanunvericilikdə hər hansı bir dəyişikliyin olmadığını da bildirdi: “Sadəcə, əvvəllər bunu gömrük əməkdaşları hesablayırdısa, artıq bunu sistem avtomatik olaraq hesablayır. Gömrük Məcəlləsinin 305 saylı qərarının 4.3-cü maddəsində yazılıb ki, qeyri-rezident vətəndaşların Azərbaycana nəqliyyat vasitəsilə gəldiyi zaman 1 gündən 90 günə qədər gəlişinin məqsədi bəyan edilməklə müvəqqəti idxal rejimində heç bir rüsum və vergi ödəmədən daxil ola bilir. Bundan sonra 1 ilə qədər müddətin uzadılması o zaman baş verə bilər ki, Azərbaycanda işlədiyini sənədlər vasitəsilə təsdiq etsin. Bu da Gömrük Məcəlləsinin 258-ci maddəsinə uyğun olaraq təlimat üsulları ilə tənzimlənir.
Ölkəyə gətirilən minik avtomobillərilə bağlı gömrük rüsumlarının aşağı salınması isə bizim səlahiyyətimizdə deyil. Gömrük Komitəsi icraedici orqandır. Əgər rüsumların aşağı salınması ilə bağlı qərar olarsa, biz buna etiraz etmərik".
S.Mehdiyevin sözlərinə görə, Azərbaycanda qaçaqmalçılıq hallarının qarşısı alınır: "Əgər əvvəllər sərhəd-keçid məntəqələrinin nəqliyyat vasitəsi tutumu gündəlik 200 ədəd idisə, bu gün bu rəqəm 450-600 ədəddir. Məntəqələrdə quraşdırılan yeni avadanlıqlar, xüsusilə də "body scan" aparatları hesabına qaçaqmalçılıq hallarının qarşısı alınır. Bu avadanlıqların tətbiqi ilə, həmçinin, son 2 ildə 2 tona yaxın narkotik vasitə dövriyyədən çıxarılıb".
Günel CƏLİLOVA
