11/12/2019 11:47
728 x 90

Naxçıvanın özünü taxılla təmin edə bilməsindən çıxan məntiqi sual - Azərbaycanın başqa bölgələri də bunu əldə edə bilərmi…

Vahid Məhərrəmov: “Bu gün Azərbaycanın digər bölgələrinin də özünü taxılla tam təmin etməsi, idxaldan asılı olmaması üçün bütün resurslar var”

img

Məlum olduğu kimi, noyabrın 18-də Prezident İlham Əliyev Naxçıvan Muxtar Respublikası Ali Məclisinin sədri Vasif Talıbovu qəbul edib.

Naxçıvan Muxtar Respublikasının inkişafının daim diqqət mərkəzində olduğunu bildirən Prezident İlham Əliyev Muxtar Respublikada bir sıra sahələr üzrə vəziyyətə toxunub, eyni zamanda, taxılçılığın yüksək səviyyədə inkişafından danışıb. “…Artıq bir neçə ildir ki, Naxçıvan özünü taxılla tam təmin edir və məhsuldarlıq da yaxşıdır. Kənd təsərrüfatının inkişafı üçün indi pivot suvarma qurğularının alınması məqsədilə vəsait ayrılmışdır” -deyə ölkə başçısı qeyd edib.

Naxçıvan özünü yüz faiz taxılla təmin etdiyi halda, Azərbaycanın digər bölgələrində niyə bu proses getmir? Onlar xarici ölkələrdən idxal edilən taxıl hesabına un və un məhsullarına olan tələbatlarını ödəyirlər. Taxılçılığın ölkəmizin digər bölgələrində də inkişaf etməsi nə dərəcədə mümkündür? 

Qeyd edək ki, Azərbaycana taxıl əsasən xarici ölkələrdən idxal olunur.

  • “…respublikanın torpaq, iqlim şəraitinə uyğun sortlar yetişdirilmirsə...”

Kənd təsərrüfatı üzrə tanınmış mütəxəssis Vahid Məhərrəmov “Bakı-Xəbər”ə bildirdi ki, Azərbaycanın digər bölgələrində də taxılçılığın inkişafı üçün münbit şərait var. O hesab edir ki, bu sahədə olan resurslardan istifadə etməklə Azərbaycanın xaricdən taxıl almasının həcmini azaltmaq tam mümkündür. “Ümumiyyətlə, Azərbaycanın özünün taxıl məhsullarına tələbatını ödəmək üçün heç bir problemi yoxdur, ölkəmizin kifayət qədər həm maliyyə, həm əmək, həm su, həm də digər resursları var. Bundan əlavə, çoxlu sayda kənd təsərrüfatı texnikası alınaraq ölkəmizə gətirilib, gübrə problemi yoxdur. Yəni bütün istehsal vasitələri, demək olar ki, əldə olunub. Bu gün Azərbaycanın digər bölgələrinin də özünü taxılla tam təmin etməsi, idxaldan asılı olmaması üçün bütün resurslar var, sadəcə, göstərilən sahədə idarəetmənin düzgün qurulmaması bu prosesin gerçəkləşməsinə mane olur.

Bu gün məhsuldarlıq aşağıdır. Bilirsiniz ki, əkin sahələrinin 60-65 faizində taxıl əkilir. Təxminən 1 milyon hektara yaxın ərazi taxıl əkini üçün istifadə olunur. Bu qədər ərazi taxılçılıq üçün istifadə edildiyi halda, necə olur ki, biz idxaldan asılı vəziyyətdə qalırıq? Dediyim kimi, problem yalnız işin təşkilindədir. Builki statistik göstəriciyə baxaq. Kənd təsərrüfatı naziri deyib ki, ötən ilə nisbətən bu il 200 min tondan artıq taxıl istehsal olunub, keçən il əvvəlki illə müqayisədə 350 min ton taxıl istehsal edilib. İstehsal artmır. Yalnız son üç ayda ölkəyə 700 min tondan artıq buğda idxal olunub. Bu o deməkdir ki, rəqəmləri yerlərdə şişirdirlər. Bölgələrdə aqrar inkişaf mərkəzləri yaradılıb, bu qurumun işi ancaq ondan ibarətdir ki, rəqəmlərlə istehsalatda inkişaf olduğunu göstərsinlər, mövcud problemi ört-basdır etsinlər. Ölkədə istehsal artıbsa, onda idxal artmamalıdır” - deyə V.Məhərrəmov qeyd etdi.

O, həmçinin, bildirdi ki, ölkədə yeni növ buğda sortlarının da yetişdirilməsində ciddi problemlər var. Onun sözlərinə görə, bu sahə tamamilə sıradan çıxarılıb. “Bizdə bu vacib sahə sıradan çıxarılıb. Bu istiqamətdə görülən cüzi işlər isə toxumçuluğun artmasına elə də təsir etmir, cəmi bir faiz təşkil edir. Ölkədə respublikanın torpaq, iqlim şəraitinə uyğun sortlar yetişdirilmirsə, bu sahə inkişaf edə bilməz. Digər tərəfdən, bu sahədə ciddi problemlərdən biri maarifçilik işinin zəif olmasıdır. Yəni fermerlər bilməlidirlər ki, məhsuldarlığın artırılması üçün hansı yollardan istifadə etsinlər. Bu il bir neçə rayonda oldum və müşahidə etdim ki, taxılçılıqda yabanı vələmir geniş yayılıb, bu da inkişafa mane olur” - deyə V.Məhərrəmov bildirdi.

İradə SARIYEVA

Son xəbərlər