16/12/2019 03:01
728 x 90

Satışda “Paşa yatırım” istiqrazları - Azərbaycan maliyyə bazarında yeni proses...

Pərviz Heydərov: “Maliyyə bazarına "PAŞA Yatırım Bankası”nın istiqrazlarının daxil olması bu sahədə müsbət dəyişikliklərin baş verməsinə səbəb ola bilər”

img

Xəbər verildiyi kimi, “Bakı Fond Birjası” QSC-nin (BFB) Listinq Komitəsinin qərarı ilə “PAŞA Bank" ASC-nin Türkiyədəki törəməsinin ("PAŞA Yatırım Bankası") 2 müxtəlif buraxılışlı istiqrazları əsas bazar seqmentində listinqə daxil edilib. “Bakı Fond Birjası”nın yaydığı məlumatda qeyd olunur ki, noyabrın 18-də qiymətli kağızların təkrar bazarda ticarətinə başlanacaq. Söhbət hər birinin nominal dəyəri 1 000 ABŞ dolları olan 50 min ədəd faizli, təmin olunmamış istiqrazdan (50 milyon dollarlıq) gedir. Məlumat üçün bildirək ki, onların illik gəlirliliyi 2,95%-dir.

İstiqrazların 25 milyon dollarlıq hissəsi faizlərin aylıq ödənilməsi şərtilə 15 sentyabr 2021-ci ilə qədər, qalan 25 milyon dollarlıq hissəsi isə faizlərin rüblük ödənilməsi şərtilə 17 aprel 2022-ci ilə qədər tədavüldə olacaq. Prosesin anderrayteri “PAŞA Kapital İnvestisiya Şirkəti” QSC-dir.

Xatırladaq ki, "PAŞA Yatırım Bankası”nın istiqrazları ilk dəfə 13 avqust 2018-ci ildə əsas bazar seqmentində listinqə daxil edilib.  

"PAŞA Yatırım Bankası”nın istiqrazları Azərbaycan maliyyə bazarında nə kimi əhəmiyyətə malik olacaq? Bütün banklarda qeyd olunan istiqrazlar olarsa, bunun maliyyə sektoruna nə kimi təsiri olar?

  • “Qeyri-neft sektoru iqtisadiyyatın aparıcı qüvvəsinə çevrilərsə, bank sistemi...”

Məsələ ilə bağlı fikir bildirən iqtisadçı-ekspert Pərviz Heydərov “Bakı-Xəbər”ə açıqlamasında qeyd etdi ki, Azərbaycan banklarının inkişaf səviyyəsi hazırda qaneedici deyil: “Hazırda ölkə iqtisadiyyatının inkişafı baxımından maliyyə bazarının mövcud vəziyyəti adekvat deyil. Bunun da səbəbi bazar iştirakçılarının payının az olmasıdır. 

Ölkə iqtisadiyyatının əsas aparıcı qüvvəsi hələ ki, neft sektoru sayılır. Qeyri-neft sektoru lazımi səviyyədə inkişaf etmədiyi üçün, bank sektoru istənilən səviyyədə deyil. Qeyri-neft sektoru iqtisadiyyatın aparıcı qüvvəsinə çevrilərsə, bank sistemi və digər sferalar da bazar iqtisadiyyatının inkişaf tempinə uyğun olaraq fəaliyyət göstərə bilərlər”.

P.Heydərov hesab edir ki, maliyyə bazarlarına daxil olan iştirakçıların sayının artması qeyd olunan sektorun inkişaf etməsinə səbəb ola bilər. Bu sferaya yeni nəfəsin daxil olmasına ehtiyac var. Maliyyə bazarına "PAŞA Yatırım Bankası”nın istiqrazlarının daxil olması bu sahədə müsbət dəyişikliklərin baş verməsinə səbəb ola bilər.

Günel CƏLİLOVA

Son xəbərlər