723 manat orta aylıq əməkhaqqı – başqa ölkələrlə Azərbaycanın müqayisəsi nələri göstərir…
Məlumdur ki, Prezident İlham Əliyev iqtisadi inkişaf, neft və qaz sektorundan əldə olunan vəsaitlər və islahatlar nəticəsində artan büdcə gəlirləri hesabına ərsəyə gələn növbəti sosial paket ilə 2 milyondan çox insanın əməkhaqqını artırıb. Bəllidir ki, dövlət başçısı bu gəlirləri yenə xalqın rifahına yönəltdi. Təbii olaraq əhalinin gəlirlərinin artması alıcılıq qabiliyyətinin artmasına müsbət təsir edəcək.
Məlumdur ki, cari il ərzində həm minimum əməkhaqqı, həm də orta əməkhaqqının məbləği artırıldı. Danılmaz faktdır ki, əməkhaqqının artırılması əhalinin sosial rifahının inkişaf etməsinə səbəb olub.
Bu günlərdə Prezident İlham Əliyev İlqar Abbasovu Şirvan şəhər, Mərdan Camalovu Zərdab, Əziz Əzizovu Bakının Suraxanı, Elşad Həsənovu Yasamal, Rafiq Quliyevi Xətai rayonlarının icra hakimiyyətlərinin başçıları vəzifələrinə təyin olunmaları ilə bağlı qəbul edərkən əməkhaqqının gələcəkdə daha da artacağını bildirib. Prezident qeyd edib ki, orta əməkhaqqının 35 faiz artırılması və 723 manata çatdırılması, əlbəttə ki, sosial siyasətimizin bariz nümunəsidir: “Əminəm ki, gələcək illərdə bu rəqəm artacaq. İlk növbədə, ona görə ki, həm maaşlar artacaq, eyni zamanda, biz kölgə iqtisadiyyatına qarşı ciddi mübarizə apararaq, artıq 100 mindən çox iş yerini kölgədən çıxarıb və onları rəsmiləşdirə bilmişik və bu proses davam edəcək. Biz hələ işin başlanğıc mərhələsindəyik”.
Onu da qeyd edək ki, bir çox beynəlxalq hesabatda Azərbaycan istər minimum əməkhaqqı, istərsə də orta aylıq əməkhaqqının səviyyəsinə görə ön sıralarda qərarlaşıb.
MDB ölkələri ilə müqayisədə Azərbaycanda orta aylıq əməkhaqqının məbləği yüksəkdir. Belə ki, Ermənistanda orta aylıq əməkhaqqı 356,1, Qırğızıstanda 232,7, Ukraynada 328, Tacikistanda 129 dollardır. Ancaq Azərbaycanda isə 425 dollardır (423 manatdır).
Hazırda ölkədə orta əməkhaqqı 723 manatdır. MDB ölkələri ilə müqayisədə Azərbaycanda orta əməkhaqqı hansı səviyyədədir?
- “Əməkhaqlarının əhəmiyyətli artımı sayəsində iqtisadi aktivlik də artır”
İqtisadçı-ekspert Pərviz Heydərov “Bakı-Xəbər”ə açıqlamasında qeyd etdi ki, cari il ərzində iki dəfə böyükmiqyaslı sosial paket həyata keçirildi. Orta aylıq əməkhaqqının artım tempi qənaətbəxşdir. Bu artım beynəlxalq təşkilatların da hesabatlarında, o cümlədən, MDB ölkələri ilə müqayisədə öncül yerlərdə qərarlaşdı: “Onu da bildirim ki, pensiya məbləğinə görə Azərbaycan MDB ölkələri ilə müqayisədə birinci oldu. Eyni zamanda, orta aylıq əməkhaqqının səviyyəsinə görə də Azərbaycan xarici ölkələrlə müqayisədə də ön sıradadır. Yaxın illər ərzində orta aylıq əməkhaqqı məbləğinin daha da artacağı gözlənir. Əməkhaqqı məbləğinin daha da artmasına görə MDB ölkələrini daha da qabaqlayacağıq”.
Həmsöhbətimizin sözlərinə görə, Azərbaycan MDB məkanında maaş artımına görə 2-ci yeri tutur: “Hesab edirəm ki, bu çox yaxşı göstəricidir. Əməkhaqlarının əhəmiyyətli artımı sayəsində əhalinin alıcılıq qabiliyyətinin artması ilə yanaşı, iqtisadi aktivlik də artır. Minimum aylıq əməkhaqqının artması orta aylıq maaşın artmasına təsir edir. Bu da ölkə iqtisadiyyatında inkişafı, əhalinin rifahını təmin edir. Bəllidir ki, minimum aylıq əməkhaqqı qalxanda digər əməkhaqları, minimum pensiyalar və digər pensiya növləri də qalxacaq. Əməkhaqlarının artırılması, istənilən halda, ölkə üçün şərəf gətirir. Bu o deməkdir ki, insanların həyat səviyyəsi yüksəlir, sosial məsələlər qabağa çəkilir. İnsanlarda stimul yaranır, alıcılıq qabiliyyəti artır. Ona görə də bütün bu artımları yüksək qiymətləndirirəm”.
Günel CƏLİLOVA
