Ölkə başçısı bir necə rayona yeni təyin olunan icra başçılarını qəbul edib. Onlarla ətraflı söhbət aparan dövlət başçısı işlərinin icrasına başlayacaq məmurlara tövsiyə və göstərişlərini verib.
İlham Əliyev bu dəfə də icra başçılarına rəhbərlik edəcəkləri rayonlara investisiya cəlb etmələrini tapşırdı: “Siz elə işləməlisiniz ki, vətəndaşlar sizdən razı olsunlar, rəhbərlik edəcəyiniz şəhər və rayonlarda işlər yaxşı getsin. Siz çalışmalısınız ki, rayonlara sərmayə qoyulsun, investorları inandırmaq üçün səylər göstərməlisiniz. Yəni gözləməməlisiniz ki, dövlət gəlib hansısa işi görəcək, onsuz da biz bunu görürük. Hazırda 4-cü regional inkişaf proqramının icrası davam edir. Əminəm ki, növbəti 4 il ərzində bu günə qədər öz həllini tapmamış məsələlər də öz həllini tapacaq. Ancaq siz hər bir rayonda mövcud olan problemlərə diqqət göstərməlisiniz, reaksiya verməlisiniz və çalışmalısınız ki, bu məsələlər öz həllini tapsın. Ona görə vətənpərvərlik, dürüstlük, şəffaflıq, vətəndaşlara xidmət, dövlətçilik prinsiplərini əsas tutmaq, investorları cəlb etmək, rayonların sosial-iqtisadi inkişafını təmin etmək sizin əsas vəzifəniz olmalıdır. Yenə də deyirəm, həm sənaye, həm də kənd təsərrüfatı istehsalı sahələrinə dövlət xəttilə çox böyük dəstək göstərilir”.
Qeyd edək ki, bundan əvvəl də ölkə başçısı rayon icra hakimiyyəti başçılarına hətta xarici investisiyanın cəlbi ilə bağlı sərbəstlik vermişdi. Təəssüflər olsun ki, bu sahədə ciddi irəliləyiş nəzərə çarpmadı. İcra başçılarının rayonlara investisiya cəlbinin öhdəsindən nə dərəcədə gələ bildiklərini və ya bilmədiklərini müəyyən etmək üçün “bacaranlara mükafat, bacarmayanlara cəza” prinsipinin tətbiqi bu sahədə işlərin inkişafına hansı stimulu verə bilər?
“Bunun da müqabilində icra başçılarının fəaliyyətinə qiymət verilsin”
Sosial məsələlər üzrə ekspert İlqar Hüseynli “Bakı-Xəbər”ə açıqlamasında bildirdi ki, ölkə başçısının irəli sürdüyü tələblər çox yaxşıdır: “İnvestisiya cəlbi ilə bağlı məsələyə bir qədər kompleks formada yanaşmaq lazımdır. İlk əvvəl investisiya mühiti yaxşı olmalıdır. Bunun üçün həm də ölkənin investisiya mühitini daha da yaxşılaşdırmağa ehtiyac var. Belə işlərin görülməsinə məsul olan qurumlar var ki, Prezidentin tapşırıqlarından onlar da öz paylarını götürməlidirlər. Demək istəyirəm ki, investisiya mühiti yaxşı olmasa, icra başçısı nə qədər bacarıqlı olursa-olsun, ora kapital cəlb edə bilməyəcək. Bunun üçün həm də rayonlarda bu mühitin sağlamlaşmasına zərurət var. Digər tərəfədən, biz bütün rayonlara bu məsələdə bir gözlə baxa bilmərik. Elə rayonlar var ki, ora investisiya baxımından çox cəlbedicidir, elələri var ki, yox. Bütün bu hallar yaxşılaşandan sonra artıq investorun özü gəlib rayonlara sərmayə qoymaqda maraqlı olacaq. Təbii ki, investisiya cəlbində şəxsi keyfiyyətlər də önəmli rol oynayır. Köhnə nəsil icra başçıları ilə bunu etmək bir qədər çətin olardı. Yeni təyin olunan icra başçılarının tərcümeyi-halına baxanda, onların bir neçə xarici dil bildiyini görürük. Bunun özü investisiya cəlbində mühüm faktordur. Çünki adam getməlidir, danışmalıdır, inandırmalıdır ki, investor gətirib onun rayonuna sərmayə qoysun. Eyni zamanda, icra başçılarının xaricə çıxış imkanlarını bir qədər sadələşdirmək lazımdır. Bilirsiniz ki, onlar Prezidentin yerlərdəki səlahiyyətli nümayəndələridirlər. Dövlətin tapşırıqlarını yerinə yetirməklə bağlı işləri çox, qrafikləri zəngin olur. Çox yaxşı olar ki, bu məsələdə regionların investisiya cəlbedicilik əmsalına görə fərqli təsnifatlandırma aparılsın. Bunun da müqabilində icra başçılarının fəaliyyətinə qiymət verilsin. Məsələn, biz bu məsələdə Zərdabla Lənkəranı eyni tərəziyə qoya bilmərik. Bundan əlavə, bu məsələdə icra başçılarına Azərbaycanda investisiya qoyuluşunu təbliğ edən qurumlar yardım etməlidirlər. Həmin rayonların bütün potensialı xarici auditoriyaya çıxış imkanları olan saytlar, jurnallar vasitəsilə təbliğ olunmalıdır. Bütün bunlar öz həllini tapandan sonra biz icra başçılarından konkret nəticələr tələb etməliyik. Ümumən isə qarşıya qoyulan məqsəd çox lazımlıdır. Bunun həm ölkəmizin inkişafına, həm də regionlarda əhalinin maddi durumunun yaxşılaşmasına, yeni iş yerlərinin açılmasına müsbət təsiri olacaq”.
Məhəmmədəli QƏRİBLİ
