Sahibkarlarla nadürüst davranışlara görə icra başçılarından “vurulanlar olacaq”…

Azərbaycanda həyata keçirilən iqtisadi strategiyanın prioritet istiqamətlərindən biri də ölkədə sahibkarlığın inkişafıdır. Bu gün dövlət başçısının "ölkəmizin gələcək inkişafı sahibkarlığın inkişafından asılıdır” strateji xəttinə uyğun olaraq, həmin sahəyə xüsusi diqqət göstərilir, sistemli və kompleks tədbirlər həyata keçirilir.

Bunun nəticəsidir ki, son 15 ildə ölkəmizdə fəaliyyət göstərən sahibkarların sayı 4,2 dəfə artıb. İndiyədək 35 mindən çox sahibkara 2,5 milyard manatadək güzəştli kredit verilib.

Sahibkarlığın inkişafı üçün dövlət tərəfindən mühum işlər görülür. Dünya ölkələrinin qabaqcıl təcrübəsi öyrənilir, müasir texnologiyaların tətbiqinə əsaslanan istehsal, emal, infrastruktur sahələrinin yaradılması istiqamətində çoxlu sayda iş görülməkdədir. Sahibkarlığın inkişafı üçün dövlət tərəfindən lazımi dəstək göstərilsə də, təəssüf ki, bəzi məmurlar bizneslə məşğul olanlara mane olurlar.

Dəfələrlə Prezident İlham Əliyev sahibkarlıqla məşğul olmaq istəyənlərə lazımi dəstəyin göstərilməsi üçün aidiyyəti qurumlara çağırışlar edib. Lakin hələ də bu sahədə müəyyən problemlər yaşanır.

Bir neçə gün öncə Prezident İlham Əliyev İlqar Abbasovu Şirvan şəhər, Mərdan Camalovu Zərdab, Əziz Əzizovu Bakının Suraxanı, Elşad Həsənovu Yasamal, Rafiq Quliyevi Xətai rayonlarının icra hakimiyyətlərinin başçıları vəzifələrinə təyin olunmaları ilə bağlı qəbul edərkən sahibkarlıqla məşğul olanlara diqqət göstərilməsinin vacibliyi haqqında fikir səsləndirib. Prezident qeyd edib ki, sahibkarlara  diqqət göstərilməli, onlar incidilməməlidir: “Əgər hansısa sahibkar vəsait qoymaq, hansısa iş görmək istəyirsə, birinci olaraq siz ona dəstək verməlisiniz. Bəzi hallarda sahibkarlara qarşı ədalətsizlik edilir və onlardan nəsə əldə etmək cəhdləri göstərilir. Buna qətiyyən yol vermək olmaz. Sahibkarlara da deyirəm ki, əgər belə xoşagəlməz halla üzləşsələr, dərhal bizə məlumat versinlər”.

Qeyd edək ki, son zamanlar Prezident İlham Əliyev yeni təyin olunan icra başçılarını qəbul edərkən sahibkarlıqla məşğul olanlara mane olan, onlara çətinlik yaradanların sərt şəkildə cəzalandırılacağını açıq şəkildə bəyan edib.

Sahibkarlıqla məşğul olanlara maneçilik törədənlər necə cəzalandırılacaq?

• “Azərbaycanda iqtisadi islahatların dərinləşməsi üçün məhkəmə islahatları vacibdir”

İqtisadçı-ekspert Natiq Cəfərli bizimlə söhbətində qeyd etdi ki, bizneslə məşğul olanlara və ya olmaq istəyənlərə çətinlik yaradanlarla bağlı məsələ ilk növbədə ictimailəşdirilməlidir: “Bu məsələdə zərərçəkən sahibkarlarla yanaşı, vətəndaşların da üzərinə böyük yük düşür. O insanlar qorxmadan, çəkinmədən bizneslə məşğul olmaq istəyənləri incidənləri, onların başlarına gələn hadisələri ictimailəşdirməlidirlər. İstər sosial şəbəkə vasitəsilə, istərsə də mətbuata çıxmaqla sahibkarlara necə maneçilik törədildiyini ictimailəşdirə bilərlər”.

Həmsöhbətimiz onu da vurğuladı ki, məhkəmə islahatları həyata keçirilməlidir. Ədalətsizliklə üzləşən hər bir şəxs məhkəməyə müraciət edə bilər: “Məhkəmələr tapşırıqla deyil, ədalətli qərar verməlidirlər. Azərbaycanda iqtisadi islahatların dərinləşməsi və həyata keçirilməsi üçün məhkəmə islahatları vacibdir. Ədalətli məhkəmə qərarları olarsa, iqtisadiyyatda atılan addımlar müsbət effekt verə bilər. Sahibkarlıqla məşğul olanlara istənilən formada çətinlik törədənlərlə bağlı həm ictimai qınaq, həm də hüquqi məsuliyyət tətbiq olunarsa, Azərbaycanda biznes mühiti inkişaf edər”.

İqtisadçının sözlərinə görə, bizneslə məşğul olanlardan nəsə əldə etmək istəyənlər az deyil. Artıq dövr dəyişib. Prezidentin sərt çıxışları və icra başçılarına tapşırıqlarından sonra vəziyyət dəyişəcək. Hansısa məmur və ya icra başçısı sahibkarlığın inkişafına mane olarsa, öz qazancını güdərsə, o şəxs dərhal məsuliyyətə cəlb edilməlidir.

Günel CƏLİLOVA