Sahibkarlığın inkişafı Azərbaycan dövlətinin qarşısında duran əsas məqsədlərdən biridir. Bu sahənin inkişafı özəl sektorun tərəqqisi üçün böyük əhəmiyyətə malikdir. Belə ki, bu, ölkə iqtisadiyyatının daha dinamik inkişafına şərait yaratmış olur. Burada inkişafın əsas göstəricisi isə bazara yeni-yeni sahibkarlıq subyektlərinin daxil olması ilə bağlıdır.
Sahibkarlığın inkişafı, əlverişli biznes mühitinin yaradılması məqsədilə ölkəmizdə islahatlar aparılır, uzunmüddətli layihələr həyata keçirilir. Lakin bu sahənin davamlı inkişafına mane olan müəyyən problemlər də mövcuddur. Qeyd edək ki, sahibkarlar hər zaman bəzi məmurların onların fəaliyyətinə mane olduqlarını bildirirlər. Artıq sahibkarlıq fəaliyyətinə mane olanlar sərt şəkildə cəzalandırılacaq. Onların bu probleminin birdəfəlik həll olunması üçün yaxın günlərdə xüsusilə bölgələrdə bu istiqamətdə prosesə start veriləcək. Cəzalandırma yalnız işdən çıxarılmaqla məhdudlaşmayacaq. Bəzi məmurlar hətta həbs oluna bilər.
Xatırladaq ki, ölkə başçısı İlham Əliyev İqtisadiyyat naziri Mikayıl Cabbarovu qəbul edərkən bu məsələnin üzərində xüsusi dayanmışdı. Prezident qeyd etmişdi ki, inkişaf etmiş ölkələrdə ümumdaxili məhsulda əsas rolu kiçik və orta sahibkarlar oynayırlar: “Bizdə isə hələ ki, belə deyil. Biz də çalışmalıyıq elə bir şərait yaradaq ki, hər bir istedadlı insan, biznesə meyli, həvəsi olan hər bir şəxs bizneslə məşğul ola bilsin, məmur təzyiqindən, müdaxiləsindən azad olsun. Sahibkarlara yönəlmiş o çirkin əllər kəsilməlidir. Bəzi hallarda dövlət məmurları, yerli icra orqanlarının rəhbərləri, nümayəndələri imkan vermirlər, xüsusilə bölgələrdə. Əgər indi kimsə özü üçün bir balaca iş qurursa, gəlib zəli kimi onun bədənindən yapışırlar, qanını sorurlar. Belə adamlara qarşı çox ciddi tədbirlər görüləcəkdir”.
Göründüyü kimi, ölkə başçısı sahibkarlıq fəaliyyətinə müdaxilə edən, maneə törədən məmurların cəzalandırılacağını açıq mətnlə bəyan edib.
Sahibkarlıq fəaliyyətinə mane olanların sərt şəkildə cəzalandırılması, hətta onların həbs olunması ölkədə biznes mühitinin inkişaf etməsinə səbəb olacaq.
“…kiçik sahibkarların öz biznesini genişləndirməsində problemlər yaradır”
İqtisadçı-ekspert Ruslan Atakişiyev “Bakı-Xəbər”ə açıqlamasında qeyd etdi ki, qeyri-neft sektorunda yüksək nəticələrin əldə edilməsi ölkədə sahibkarlığın inkişafı üçün münbit şəraitin yaradılmasından çox asılıdır. Son illər ərzində dövlət tərəfindən belə bir mühitin formalaşdırılması üçün kifayət qədər ciddi addımlar atılıb: “Danılmaz faktdır ki, bu gün əsasən kiçik və orta sahibkarların fəaliyyətlərinə müdaxilələr çoxdur. Bunlar isə çox vaxt sahibkarlardan pul almaq məqsədi güdən yersiz müdaxilələr olur. Bu, müxtəlif dövlət qurumlarının sahibkarlıq fəaliyyətini yoxlamasıdır. Bu yoxlamalar adətən sahibkarlar üçün əlavə pul vermək, bəzilərinin işində fasilələrin yaranması deməkdir. Sahibkarlıq fəaliyyətinə olan müdaxilələr kiçik sahibkarların öz biznesini genişləndirməsində problemlər yaradır. Araşdırmalar zamanı müəyyən edilib ki, müxtəlif dövlət qurumlarının sahibkarlıq fəaliyyətinə yersiz müdaxilələri var. Bəzi hallarda bir-birini təkrarlayan dövlət qurumları sahibkarlıq fəaliyyətinə müdaxilə edirlər".
Həmsöhbətimizin sözlərinə görə, sahibkarlıq fəaliyyətinə mane olanlar qanun çərçivəsində sərt şəkildə cəzalandırılmalıdır: “Qanunverciliyə uyğun olaraq, sahibkarlıq fəaliyyəti ilə məşğul olanlar öz işlərini qurmalıdırlar. Onlar öz işlərini quran zaman müvafiq dövlət qurumları da sahibkarlıqla məşğul olmaq istəyənlərə və ya olanlara münasibətini də qanunvericiliyin tələbinə uyğun şəkildə aparmalıdır. Hər hansı bir qurumun nümayəndəsi tutduğu vəzifədən sui-istifadə edərsə, o şəxs qanun çərçivəsində yol verdiyi nöqsanın ağırlıq səviyyəsinə uyğun olaraq cəzalandırıla bilər. Sahibkarlığın fəaliyyətinə mane olanlar hətta həbs oluna bilər”.
İqtisadçı-ekspert onu da əlavə etdi ki, inkişaf etmiş ölkələrdə bizneslə məşğul olmaq istəyənlərə hansısa məmur mane olursa, o şəxs qanunvericiliyin tələbinə uyğun şəkildə cəzalandırılır. Analoji qayda bizdə də tətbiq olunacaq.
Günel CƏLİLOVA
