15 oktyabr 2019-cu il tarixində ölkə rəhbəri cənab İlham Əliyevin yanında iqtisadi müşavirə keçirilib, dövlət başçısı tərəfindən ölkə iqtisadiyyatının müxtəlif istiqamətləri ilə yanaşı, maliyyə bazarlarındakı cari vəziyyət, sektorun effektivliyinin və dayanıqlığının artırılması baxımından həyata keçirilən islahatlara toxunulub, qarşıdakı dövr üçün konkret hədəflər və vəzifələr müəyyənləşdirilib, tapşırıqlar verilib.
Sözügedən müşavirədə dövlət başçısı tərəfindən maliyyə-bank sektoru ilə əlaqədar verilmiş tapşırıqların icrası məqsədilə Azərbaycan Respublikasının Maliyyə Bazarlarına Nəzarət Palatasının təşkilatçılığı, Azərbaycan Banklar Assosiasiyasının, həmçinin, ölkədə fəaliyyət göstərən istehlakyönümlü bankların iştirakı ilə iclas təşkil olunub. İclasda biznes kreditlərinin təşviqi məqsədilə banklar tərəfindən kredit yarmarkalarının keçirilməsi məqsədəuyğun hesab edilib.
Danılmaz faktdır ki, bu gün banklar istehlak kreditlərinin verilməsinə daha çox üstünlük verir. Təbii ki, istehlak kreditlərinin biznes kreditlərindən üstünlük təşkil etməsi iqtisadiyyatın inkişafına mənfi təsir göstərir. Dəfələrlə ölkə başçısı İlham Əliyev real sektora kreditin az ayrılması məsələsinə toxunub və bu problemin qısa müddətdə həll olunması üçün tapşırıqlar verib. Lakin banklar yenə biznes kreditlərinə deyil, istehlak kreditlərinin verilməsinə daha çox diqqət ayırıb. Maraqlıdır, banklar tərəfindən biznes kreditlərinin təşviqi məqsədilə kredit yarmarkalarının keçirilməsi biznes kreditlərinə marağı artıra bilərmi?
“Biznes kreditlərinin qoyuluşunun artması üçün faiz dərəcələri enməlidir”
İqtisadçı-ekspert Ruslan Atakişiyev bildirdi ki, kredit yarmarkalarının təşkil edilməsində məqsəd əhalidə və sahibkarlar arasında biznes kreditlərindən istifadəyə marağın artırılmasıdır: “Yarmarkalarda, sədəcə, kredit məhsulları yox, digər bank məhsulları da təqdim edilməli və təşviq olunmalıdır. Yarmarkalarda qiymətli kağızlar bazarı, birgə investisiyalar, payçı kimi iştirak haqqında məlumat verilməli, burada iştirakın əhəmiyyəti izah edilməlidir”.
R.Atakişiyevin sözlərinə görə, biznes kreditlərinin qoyuluşunun artması üçün faiz dərəcələri enməlidir: “Bu məqsədlə alternativ maliyyə məhsullarından istifadə genişləndirilməlidir. Əks təqdirdə kredit faizlərində enmə olmayacaq. Bazarda formalaşmış biznes kredit faizləri var. Sahibkarlar da bu faizlərlə kredit götürərək bizneslə məşğul olurlar. Ayrılıqda hansısa bank biznes kreditləri üzrə faizləri aşağı salmaqda maraqlı olmaz. Çünki bu halda ümumi formalaşmış bazar qiyməti aşağı düşəcək ki, bu da banklara sərf etmir”.
Günel CƏLİLOVA
