Məlum olduğu kimi, Azərbaycan Respublikasının Prezidenti İlham Əliyev oktyabrın 23-də Mikayıl Cabbarovu yeni vəzifəyə - İqtisadiyyat naziri təyin olunması ilə əlaqədar qəbul edib.
Prezident Mikayıl Cabbarovla görüşən zaman bildirib ki, Azərbaycanda sahibkarlığın inkişafı üçün vergilər stimulverici rol oynayır və nəticələr də göz qabağındadır: “Bu il Vergilər Nazirliyi plandan əlavə təqribən 350 milyon manatdan çox vəsait toplayıb və əlbəttə ki, bu, şəffaflığın təzahürüdür. Təbii ki, bu vəsait bizə bu il çox geniş və ciddi sosial paket icra etmək imkanı verdi. Deyə bilərəm ki, bu sosial təşəbbüsün analoqu bu günə qədər olmamışdır. Dörd milyon iki yüz min insan bu sosial təşəbbüsdən faydalanıb, minimum əməkhaqqı təxminən iki dəfə, minimum pensiya 70 faizdən çox artırılıb. Minimum pensiyanın alıcılıq qabiliyyətinə görə biz MDB məkanında birinci yerdəyik, amma orta pensiyanın səviyyəsinə görə üçüncü yerdəyik. Yəni bu, doğrudan da çox böyük sosial təşəbbüsdür. Əlbəttə, əgər bizim maliyyə imkanlarımız olmasaydı, biz bunu edə bilməzdik”.
Qeyd olunduğu kimi, bu il plandan əlavə 350 milyon manatdan çox vəsait toplanıb. Vergi sahəsində görülən işlər öz müsbət axarında davam edir.
Maraqlıdır, iqtisadi sektora aid bütün dövlət qurumları öz fəaliyyətlərində belə dönüş yaratsaydılar, hansı daha böyük uğurlara imza atardılar?
“Prezidentin verdiyi tapşırıqların hər bir sahədə qətiyyətlə icra olunması həm ölkə iqtisadiyyatını sürətlə inkişaf etdirəcək, həm də insanların maddi rifah halını daha da yaxşılaşdıracaq”
Millət vəkili, Milli Məclisin İqtisadi siyasət, sənaye və sahibkarlıq komitəsinin üzvü Tahir Mirkişili “Bakı-Xəbər”ə açıqlamasında qeyd etdi ki, dövlət başçısı yeni İqtisadiyyat naziri Mikayıl Cabbarovu qəbul edərkən sahibkarlıq fəaliyyətinin inkişafına, bununla bağlı dövlət siyasətinə mane olan qüvvələrə qarşı sərt tədbirlərin görüləcəyini bəyan etdi: “Dövlət başçısı Mikayıl Cabbarovu yeni vəzifəyə təyin edərkən bildirib ki, ölkəmiz sürətli iqtisadi inkişaf üçün böyük ehtiyatlara sahibdir. Vergilər, sosial sahədə əldə olunan nəticələr onu göstərdi ki, ölkəyə bağlı, vətənpərvər, müasir baxışlı kadrların köməyilə, bu ehtiyatlardan səmərəli istifadə etməklə böyük irəliləyiş əldə etmək mümkündür. Məhz bu səbəblən də iqtisadi strukturlarda həm də struktur dəyişiklikləri aparılır. İnanıram ki, cənab Prezidentin verdiyi tapşırıqların hər bir sahədə qətiyyətlə icra olunması həm ölkə iqtisadiyyatını sürətlə inkişaf etdirəcək, həm də insanların maddi rifah halını daha da yaxşılaşdıracaq”.
Günel CƏLİLOVA
