Məşğulluğu, artan əhalini işlə təmin etmək üçün şərait yaradılmalıdır. Bunu Prezident İlham Əliyev Şahin Mustafayevi yeni vəzifəyə - Baş nazirin müavini təyin olunması ilə əlaqədar qəbul edərkən deyib.
Ölkə başçısının sözlərinə görə, iqtisadi artım demoqrafik artımı üstələməlidir: “İşsizlik Azərbaycanda aşağı səviyyədədir. Ancaq buna baxmayaraq, işsizlik arta bilər. Nəyə görə? Əhali artır və əgər iqtisadi inkişaf artan əhalinin templəri ilə uzlaşmasa, əlbəttə ki, gələcəkdə bizi bir çox problemlər gözləyə bilər. Biz isə öz siyasətimizi strateji hədəflər əsasında qururuq. Bizim siyasətimiz uzunmüddətlidir və siyasətimizin əsas qayəsi odur ki, dayanıqlı inkişaf təmin edilsin. Cənubi Qafqazda bizdən başqa digər ölkələrdə demoqrafik artım yoxdur. Ona görə o ölkələrdə bizim üzləşdiyimiz problemlər də mövcud deyil. Mən dəfələrlə demişəm ki, bizim iqtisadi artımımız demoqrafik artımı üstələməlidir. Buna nail olmaq üçün biz yeni artım mənbələri aşkar etməliyik. Onlardan biri kölgə iqtisadiyyatına qarşı mübarizədir”.
Prezidentin fikrincə, qeyri-neft sektorunda ehtiyatlar kifayət qədər böyükdür. Özəl sektorun iqtisadi sahədə payı yüksək olsa da, qeyri-neft ixracı hələ ki, çox aşağı səviyyədədir. Ona görə də qeyri-neft sektoru və qeyri-neft ixracı artmalıdır.
Görünən odur ki, iqtisadi artımın demoqrafik artımı üztələməsi çox vacib məsələdir. Bunların uzlaşdırılması olduqca zəruridir. Bütün hallarda, Azərbaycan yaxın perspektivdə buna nail olmasa, nə baş verəcək? Buna nail olmaq üçün hansı zəruri işlər görülməlidir?
“Ona görə də çıxış yolu qeyri-neft sektorunun inkişafından keçir”
Məsələyə münasibət bildirən ekspert Rəsul Cahangirlinin sözlərinə görə, iqtisadi artım demoqrafik artımı üstələməsə, o zaman işsizlərin sayı artacaq: “Prezidentin bu məsələyə xüsusi toxunması onun son dərəcə uzaqgörən siyasətçi olmasından irəli gəlir. Məsələ ondadır ki, nəinki Cənubi Qafqaz ölkələri, digər regionlarla müqayisədə Azərbaycanda demoqrafik artım göstəriciləri yüksəkdir. Ona görə də açılan iş yerlərinin sayı əhalinin artımına adekvat olmalıdır. Çünki Azərbaycanda ailə ənənələri yüksəkdir. Düzdür, sovet dönəmi ilə müqayisədə çoxuşaqlı ailələrin sayı xeyli azalıb. Buna rəğmən, ölkə əhalisi hər il artır. Elə ölkələr var orada əhalinin tərkibi qocalır. Yaşlı insanların çəkisi artır. Bu da, nəticə etibarilə, əhalinin azalmasına gətirib çıxarır. İqtisadi artımın demoqrafik artımı üstələməsinin yolu ölkədə qeyri-neft sektorunun inkişafından keçir. Nə qədər ki, ölkədə çoxşaxəli iqtisadiyyat formalaşmayıb, bunun öhdəsindən gəlmək mümkün olmayacaq. Ona görə də çıxış yolu qeyri-neft sektorunun inkişafından ibarətdir. Bunun üçün isə islahatlar daha da dərinləşdirilməlidir”.
Vidadi ORDAHALLI
