Prezident biznes mühitini yaxşılaşdırmağa çağırdı, Şahin Mustafayev nədən başlayacaq…

“Biznes mühitinin yaxşılaşdırılması istiqamətində əlavə addımlar atılmalıdır”. Bunu Prezident İlham Əliyev Şahin Mustafayevi yeni vəzifəyə - Baş nazirin müavini təyin olunması ilə əlaqədar qəbul edərkən deyib.

“Biznes mühitinin yaxşılaşdırılmasını Dünya Bankı kimi ən aparıcı beynəlxalq maliyyə qurumu qiymətləndirir və biznes mühitinin səviyyəsinə görə biz dünyada 25-ci yerdəyik, 20 ən islahatçı ölkə arasındayıq. Eyni zamanda, Davos Ümumdünya İqtisadi Forumu illik hesabatında Azərbaycanı bir çox meyarlar üzrə qabaqcıl yerlərə layiq görüb. Bütün bunlar aparılan islahatların nəticəsidir. Ancaq hesab edirəm ki, biz əldə edilmiş uğurlarla kifayətlənməməliyik”.

Prezident onu da vurğulayıb ki, iqtisadi sahədə hələ də bir çox problem mövcuddur, o cümlədən, biznes mühitinin yaxşılaşdırılması istiqamətində əlavə addımlar atılmalıdır.

Biznes mühitinin yaxşılaşdırılması istiqamətində mütəmadi olaraq müəyyən işlər görülür və görülməkdədir.

Maraqlıdır,  biznes mühitinin yaxşılaşdırılması istiqamətində nə kimi işlərin görülməsinə ehtiyac var?

• “Elə bu səbəbdəndir ki, Prezident indi kadr islahatlarına start verdi”

İqtisadçı-ekspert Fikrət Yusifov “Bakı-Xəbər”ə açıqlamasında qeyd etdi ki, sürətli iqtisadi islahatlara start verildikdən sonra bir-birinin ardınca qəbul edilən qərarlar fonunda, ölkə iqtisadiyyatının real sektorunda ikirəqəmli artım templərinə çatılacağına heç kəsin şübhəsi yox idi: “Lakin bu gözləntilər özünü doğrultmadı. Elə bu səbəbdəndir ki, bu ayın 15-də keçirilən iqtisadi müşavirədə və sabiq iqtisadiyyat nazirini Baş nazirin müavini vəzifəsinə təyin edəndə də Prezident qeyri-neft sektorunun inkişaf sürətindən və bu sektordan ixracın səviyyəsindən narahatlıq ifadə etdi. Dövlətin islahatları aparmaq üçün, praktik olaraq, əldə olan bütün rıçaqları işə saldığı bir vaxtda nəticələrin belə zəif olması məyusluq doğurur.

Prezident Şahin Mustafayevi qəbul edərkən kölgə iqtisadiyyatı, inhisarçılıq və biznesdə məmur himayədarlığı ilə bağlı kəskin fikirlər səsləndirdi. Bu neqativ halların mövcudluğunun kökündə, ilk növbədə, məmur özbaşınalığı dayanır. Bu sıraya onların səriştəsiz idarəçiliyini də əlavə etsək, o halda, qəbul edilən qərarların gözləntiləri doğrulda bilməməsinin səbəbləri tam aydınlaşar. Elə bu səbəbdəndir ki, Prezident indi kadr islahatlarına start verdi. “Kadrlar hər şeyi həll edir” kimi məşhur bir deyim indi daha aktual görünür. Çünki yerində olan, dövləti və xalqı üçün vicdanla çalışmağı hər şeydən üstün tutan kadrlar həmişə yaxşı nəticələr əldə edə biliblər”.

Günel CƏLİLOVA