Son zamanlar Azərbaycanın bank sektoruna xarici bankların marağı artır. İsveçrənin “Banque Cantonale de Genève” (BCGE) bankı da Azərbaycanda maliyyə xidmətləri və kapitalın idarə edilməsi ilə bağlı xidmətlər göstərmək istəyini bildirib. Bunu BCGE-nin icraçı direktoru Mario Al Jebouri Azərbaycan-İsveçrə biznes forumunda deyib. O qeyd edib ki, regionda mövqelərimizi daha da möhkəmləndirmək istəyirik: “Azərbaycanda geniş imkanlar var. Biz istərdik ki, burada maliyyə xidmətləri və kapitalın idarə edilməsi ilə bağlı xidmətlər göstərək”.
Bir sıra ekspertlərin fikrincə, xarici bankların Azərbaycanda fəaliyyətinə şərait yaradılmasının zamanı çatıb. Çünki ölkədə bank sektorunda yaranmış kapital çatışmazlığı bunu diqtə edir. Doğrudur, İran və Pakistan banklarının filiallarının fəaliyyəti olsa da, onlar Azərbaycan Mərkəzi Bankının məcmu kapitalla bağlı qoyduğu tələbləri tam şəkildə yerinə yetirə bilmirlər. Bu səbəbdən yeni maliyyə təşkilatlarının bazara daxil olmasına ehtiyac yaranıb.
Onu da qeyd edək ki, “Banque Cantonale de Genève” bankı Cenevrə iqtisadiyyatında mühüm yer tutur. Məlumatlara görə, bankın dövriyyəsi 22 milyard İsveçrə frankı təşkil edir. Maraqlıdır, belə bir bankın Azərbaycana gəlməsi bank sektoruna, xüsusən də kredit faizlərinə necə təsir edəcək?
“…xarici bankların gəlişi maliyyə sektorumuza və kredit faizlərinin enməsinə müsbət təsir göstərəcək”
İqtisadçı-ekspert Fuad İbrahimov bizimlə söhbətində qeyd etdi ki, xarici bankların ölkəmizə gəlişi yerli banklarda mövcud olan faiz dərəcəsinin düşməsinə səbəb ola bilər: “İsveçrənin BCGE bankının Azərbaycanın bank sahəsinə maraq göstərməsinin səbəbi ölkəmizin maliyyə, əsasən də bank sektorunun açıq şəkildə cazibədarlıq prinsiplərinə yiyələnməsinin nəticəsidir. Azərbaycan belə bir siyasəti irəli sürməsəydi, şübhəsiz ki, heç bir xarici bank ölkəmizin bank sektorunda hər hansı bir iş görməyə maraq göstərməzdi”.
İqtisadçının fikrincə, hər hansı bir ölkənin xarici bankı ölkəmizdə fəaliyyət göstərərsə, bu hal ölkədə kredit faiz dərəcələrinə təsir edər: “Nəzərə almaq lazımdır ki, kapital axını və kapital yerləşdirilməsində bolluq yaranarsa, sağlam rəqabət də yaranar. Şərt o deyil ki, xarici kapital Azərbaycandakı hər hansı bir bankda yerləşdirilsin, bütün hallarda, həmin vəsait dövriyyəyə cəlb olunmalı və mənfəət gətirməlidir. Bu nöqteyi-nəzərdən xarici bankların gəlişi maliyyə sektorumuza və kredit faizlərinin enməsinə müsbət təsir göstərəcək”.
Həmsöhbətimiz onu da vurğuladı ki, hazırda Azərbaycan qanunvericiliyi, texniki potensialı, eyni zamanda, infrastrukturu müasir dövrün tələblərinə cavab verir: “Bank sektorumuz texniki cəhətdən inkişaf etmiş ölkələrin bank sektorundan geri qalmır. Lazım olan hər bir mexanizm var. Sadəcə olaraq, bu mexanizmləri müasir dövrün tələblərinə uyğun hərəkətə gətirmək lazımdır. Həmin mexanizmlərin hərəkətə gətirilməsi də yenilik kimi, əlbəttə ki, maliyyə və bank sektorumuza müsbət cəhətlər vəd edəcək. Xarici bankların gəlişilə, habelə Mərkəzi Bank da buna dəstək olsa, hazırda mövcud olan faiz dərəcələrinin haradasa, ən azından, 20-30 faizə qədər düşməsi gözləniləndir” .
Günel CƏLİLOVA
