21/11/2019 17:46
728 x 90

4 milyondan çox adamın rifahını yaxşılaşdıran əlavə milyardlarla vəsait dövriyyədə - inflyasiya cəmi 2 faiz... Azərbaycan iqtisadiyyatının gücü...

Vüqar Bayramov: “Artımlar mərhələli şəkildə istehlak bazarına daxil oldu”

img

“İnflyasiya çox aşağı səviyyədədir, 2 faizdən bir qədər çoxdur. Nəzərə almalıyıq ki, bu il çox ciddi və böyük sosial paket reallaşdı – 4 milyon 200 mindən çox insanın maddi vəziyyəti yaxşılaşdı, pensiyalar, əməkhaqları, müavinətlər artırıldı. Yəni bu məqsədlər üçün milyardlarla manat vəsait xərclənib və bu vəsait sosialyönümlü istiqamətə nəzərdə tutulurdu. Buna baxmayaraq, inflyasiya çox aşağı səviyyədədir. Bu çox yaxşı göstəricidir. Əhalinin gəlirləri yenə də inflyasiyanı əhəmiyyətli dərəcədə üstələyir”.

Məlum olduğu kimi, bu fikirləri Prezident İlham Əliyev iqtisadi müşavirədə deyib. Onun sözlərinə görə, gələcəkdə də minimum əməkhaqqının, minimum pensiyanın artırılması üçün bizdə iradə var və imkanlar buna uyğun olmalıdır. Buna nail olmaq üçün bütün maliyyə və iqtisadi sahədə tam şəffaflıq təmin edilməlidir.

Görünən odur ki, Azərbaycan dövləti ölkə əhalisinin maddi rifah halını daha da gücləndirmək üçün düşünülmüş sosialyönümlü siyasət aparır. Hazırda Azərbaycan sosial müdafiə sahəsində dünya miqyasında nümunəvi ölkələrdən biridir. Ölkəmizdə mütəmadi olaraq həm minimum əməkhaqqı, pensiyalar artırılır, həm də özünüməşğulluq proqramı geniş vüsət alır. Ünvanlı sosial yardım alanların sayı artır. İndi hər bir ailə orta hesabla 200 manatdan çox yardım alır.

Bütün bunlar o deməkdir ki, dövriyyəyə milyardlarla vəsait daxil olur. Adətən bu cür artımlar bir çox ölkədə inflyasiya təzyiqlərini artırır. Nəticə etibarilə bu, inflyasiyanın böyük ölçüdə artmasına gətirib çıxarır. Azərbaycanda isə, qeyd olunduğu kimi, bir belə artımın müqabilində inflyasiyanın səviyyəsi 2 faizdən bir qədər çoxdur. Maraqlıdır, Azərbaycan belə aşağı inflyasiya göstəricisinə necə nail olur?

  • “...ölkədə inflyasiyanın böyük ölçüdə artmasına gətirib çıxarmadı”

Məsələyə münasibət bildirən iqtisadçı-ekspert Vüqar Bayramov bunun səbəbini bir sıra arqumentlərlə əsaslandırdı: “Nəzərə almaq lazımdır ki, Azərbaycandakı artımlar daha çox minimum əməkhaqqı və minimum pensiyanın artırılmasına hesablanmışdı. Yəni daha çox sosial təminata ehtiyacı olan vətəndaşlarımızın sosial müdafiəsinin gücləndirilməsini özündə ehtiva edirdi. Bu da çox vacibdir. Bununla belə, minimum pensiya və əməkhaqlarının artırılması daha çox istehlak bazarında yerli məhsullara tələbi formalaşdırır. Bu zaman tələbin yerli istehsal hesabına qarşılanması mümkündür. Çünki yerli istehsal hesabına tələb qarşılananda bu hər hansı tarazılığın pozulmasına gətirib çıxarmır. Başqa bir tərəfdən, artımlar mərhələli şəkildə istehlak bazarına daxil oldu. Yəni artım paketləri növbəli şəkildə qəbul edildi. Ona görə də bu, ölkədə inflyasiyanın böyük ölçüdə artmasına gətirib çıxarmadı. Görünən odur ki, birrəqəmli inflyasiyanın qorunub saxlanması mümkün olacaq”.

Vidadi ORDAHALLI

Son xəbərlər