22/11/2019 19:22
728 x 90

Azərbaycanın iki məzmunlu dövlət büdcəsi – dünyada az-az belə büdcələr olur...

Fuad İbrahimov: “Bu o deməkdir ki, yenidən minimum əməkhaqqından başlayaraq digər müavinətlər artırılacaq”

img

“Gələn ilin büdcəsi həm sosial, həm də investisiya yönümlü olmalıdır”. Bunu Prezident İlham Əliyev keçirilən son iqtisadi müşavirədə çıxışı zamanı deyib.

Ölkə başçısı bildirib ki, gələn ilin büdcəsi ilə əlaqədar tapşırıqlar verilib və hökumət üzvləri artıq neçə vaxtdır işləyirlər: “Deyə bilərəm ki, gələn ilin büdcəsi həm sosialyönümlü olmalıdır, həm də investisiya yönümlü olmalıdır. Gələn il də biz ciddi sosial proqramlar icra edəcəyik, əhalinin yaşayış səviyyəsini yaxşılaşdırmaq üçün önəmli addımlar atılacaq, infrastruktur layihələrinin icrası ilə əlaqədar kifayət qədər vəsaitimiz olmalıdır. Ancaq gələn ilin xərclərinə biz çox böyük diqqətlə baxmalıyıq və burada şəffaflığı tam təmin etmək üçün hökumət gərək təkliflər versin və tezliklə, ilin sonuna qədər bu təkliflərə baxılacaq və beləliklə, əminəm ki, eyni həcmdə olan işi az vəsaitlə biz edə bilərik. Buna nail olmaq üçün, ilk növbədə, şəffaflıq, dövlət nəzarəti və ictimai nəzarət olmalıdır”.

O da məlumdur ki, əvvəlki illərdə sosial infrastruktur layihələri ilə bağlı böyük vəsaitlər ayrılırdı. O vaxt üçün bu vacib idi. Çünki bu sahədə görüləsi işlər çox idi. Aparılan siyasət nəticəsində çoxsaylı infrastruktur obyekti tikildi, yollar salındı, məktəblər, xəstəxanalar yeniləndi. Sonrakı dövrdə büdcədə sosial xərclərə ayrılan vəsaitlər artmağa başladı. Gələn il isə artıq Azərbaycanın dövlət büdcəsi həm sosial, həm investisiya yönümlü olacaq. Bu da əhəmiyyətli yenilikdir. O baxımdan bunu ekspertlər necə dəyərləndirirlər?

  • “...kapital qoyuluşu sayəsində yeni iş yerlərinin açılmasına şərait yaranacaq”

Məsələyə münasibət bildirən iqtisadçı-ekspert Fuad İbrahimovun sözlərinə görə, bu ondan xəbər verir ki, hər iki sahəyə ciddi vəsait ayrılacaq: “Səslənən fikirlər onu göstərir ki, sosialyönümlü siyasət davam etdiriləcək. Bu o deməkdir ki, yenidən minimum əməkhaqqından başlayaraq digər müavinətlər artırılacaq. Əhalinin aztəminatlı təbəqəsinin sosial durumu daha da yaxşılaşacaq. Bununla yanaşı, investisiya yönümlü siyasət davam etdiriləcək. İlk növbədə, burada söhbət daxili investisiyalardan gedir. Yəni daxili investisiyaların dövlət tərəfindən tənzimlənməsi öndə olacaq. Bu o deməkdir ki, kapital qoyuluşu sayəsində yeni iş yerlərinin açılmasına şərait yaranacaq. Onun bazasında yeni biznes mühiti formalaşacaq. Nəzərə almaq lazımdır ki, investisiya layihələri yeni iş yerlərinin açılmasına rəvac verir. Layihəyə sərmayə qoyulur və iş icra olunur. Daha sonra digər işlərə start verilir. Bütün bunların hamısında da insanlar iştirak edirlər. Bu nöqteyi-nəzərdən gələn il hər iki sahədə ciddi işlərin görüləcəyi gözlənir”.

Vidadi ORDAHALLI

Son xəbərlər