22/11/2019 19:19
728 x 90

Dövlət büdcəsinə şişirdilmiş təklif verən məmurlarla necə davranmalı...

İlqar Hüseynli: “...bundan əvvəlki şişirdilmiş büdcələr barəsində də araşdırmalar aparılmalıdır”

img

“Əgər bu dəfə bizim dövlət qurumlarımız, şirkətlərimiz yenə də şişirdilmiş rəqəmlər versələr, artıq özlərini ifşa etmiş olacaqlar”. Məlum olduğu kimi, bunu Prezident İlham Əliyev keçirdiyi iqtisadi müşavirədə deyib.

Ölkə başçısının sözlərinə görə, hər ilin sonunda büdcə müzakirə olunarkən sifarişlər göndərilir: “Özü də orada şişirdilmiş rəqəmlər öz əksini tapır, havadan götürülmüş rəqəmlər. Onlardan soruşanda ki, misal üçün bənd tikmək, yol çəkmək, kabel çəkmək, bu qədər vəsait barədə rəqəmi haradan götürürsən!? Havadan. Sonra araşdırma aparılır, görünür ki, şişirdiblər. Nəyə görə şişirdiblər? Aydın məsələdir nəyə görə. Buna da son qoyulmalıdır. Ona görə Maliyyə Nazirliyi, İqtisadiyyat Nazirliyi, - bunu təkcə onların boynuna atmaq olmaz, - hökumət də nəzarətçi kimi şişirdilmiş bütün o rəqəmləri təhlil etsinlər və real rəqəmləri müəyyənləşdirsinlər. O rəqəmləri verənlər gərək məsuliyyət daşısınlar. Əgər bu dəfə bizim dövlət qurumlarımız, şirkətlərimiz yenə də şişirdilmiş rəqəmlər versələr, artıq özlərini ifşa etmiş olacaqlar. Hökumət, əlbəttə ki, onların bütün təkliflərinə baxacaq. Amma onlar əgər şişirdilmiş rəqəmləri versələr, öz cəzalarını alacaqlar”.

Prezident qeyd edib ki, belə hallara son qoyulmalıdır: “Ona görə zəhmət çəkib normal işləsinlər və pis vərdişlərdən əl çəksinlər. Beləliklə, biz büdcəyə böyük qənaət edərik, maaşların, pensiyaların artırılmasına imkan yaradarıq və şəffaflığı təmin edə bilərik”.

Ölkə başçısı çox önəmli məqama toxundu. Çünki həqiqətən də sözügedən problem mövcuddur. Uzun illərdir bir sıra qurumlar iqtisadiyyatda şişirdilmiş rəqəmlərdən istifadə edir və büdcəyə sifarişləri də buna uyğun verirlər. Artıq bu halın ən yüksək səviyyədən deyilməsi ondan xəbər verir ki, bundan sonra şirirdilmiş rəqəmlərlə çıxış edən məmurlara yönəlik sərt tədbirlər görüləcək. O baxımdan bununla bağlı ekspertlər nə təklif edirlər?

  • “Büdcəni talayan məmurlar, şirkət rəhbərləri məsuliyyətə cəlb olunaraq həbs edilməlidirlər”

Məsələyə münasibət bildirən ekspert İlqar Hüseynlinin sözlərinə görə, şişirdilmiş rəqəmlərlə çıxış edən məmurlar və şirkət rəhbərləri sərt formada cəzalandırılmalıdır: “Neçə illərdir bu problemlər var. Ekspert olaraq zaman-zaman ictimaiyyəti bununla bağlı məlumatlandırırdıq. Gör vəziyyət nə yerə gəlib çatıb ki, ən yüksək səviyyədə bu problem bəyan olunur. Xüsusən də yol və infrastruktur obyektlərinin tikintisində ciddi şişirtmələrə yol verilir. Bunların hamısı büdcənin talanması deməkdir. İllər əvvəl hava limanına çəkilən yolun hər kilometrinə 14 milyon manat vəsait xərcləndi. Aydın görünürdü ki, rəqəmlər göz görə-görə şişirdilib. Prezident İlham Əliyev tərəfindən bu məsələnin gündəmə gətirilməsi çox müsbət haldır. Ona görə də nəinki bundan sonrakı, bundan əvvəlki şişirdilmiş büdcələr barəsində də araşdırmalar aparılmalıdır. Büdcəni talayan məmurlar, şirkət rəhbərləri məsuliyyətə cəlb olunaraq həbs edilməlidirlər. Burada güzəşt olmamalıdır. Belə olarsa, o zaman sifarişlər verilən zaman əyintilər əhəmiyyətli dərəcədə azalacaq”.

Vidadi ORDAHALLI

Son xəbərlər