Əli Əsədov Nazirlər Kabinetinin indiki kadr bazası ilə Prezidentin tapşırıqlarını icra edə biləcəkmi...
İlham Əliyevin idarəçiliyində diqqətçəkən əsas məqamlardan biri görülən işlər, qazanılan nailiyyətlər, perspektivdə atılacaq addımlar, habelə nöqsanlarla bağlı ictimaiyyətin mütəmadi olaraq məlumatlandırılmasıdır. Çünki belə hesabatlar geridə qalan müəyyən dövrlər üzrə əldə edilən iqtisadi və sosial nəticələrin qiymətləndirilməsi, bu barədə əhaliyə obyektiv məlumatların çatdırılması, o cümlədən, problemlər ətrafında müzakirələrin aparılması və onların həlli yollarının müəyyən edilməsi baxımından ən səmərəli vasitədir.
Dövlət başçısının yanında keçirilən iqtisadi müşavirələr bu baxımdan xüsusi əhəmiyyətə malikdir və təsadüfi deyil ki, daim ictimaiyyətin dərin marağına səbəb olur. Oktyabrın 15-də keçirilən növbəti iqtisadi müşavirə də yeni müzakirələrə yol açan aktual məsələlərlə yadda qaldı. Bununla belə, ölkə başçısı yeni Baş nazir qarşısında bir sıra vəzifələr qoydu. Prezident qeyd edib ki, müasir dünyagörüşlü, müasir iqtisadiyyatı bilən, savadlı gənc kadrlar işə cəlb edilməlidir: “Yeni hökumət qarşısında bir çox vəzifələr qoyulub. Mən Əli Əsədovu bu vəzifəyə təyin edərkən ona bir çox vəzifələr tapşırdım. Onun qarşısına vəzifə qoydum ki, islahatlar aparılmalıdır, o cümlədən, kadr islahatları. Biz XXI əsrdə yaşayırıq, köhnə təfəkkürlə, köhnə biliklərlə gələcəyə necə gedə bilərik? Nə qədər biz təbii resurslara arxalanaraq, necə deyərlər, belə ətalət yolu ilə gedə bilərik?”.
Bütün bu deyilənlərin fonunda maraqlıdır, Nazirlər Kabineti hazırkı kadr potensialı ilə ölkə başçısının qarşıya qoyduğu məsələləri yerinə yetirə bilərmi? Yoxsa, Nazirlər Kabinetinin özünün ciddi və köklü islahatlara ehtiyacı var?
- “Ona görə də sözügedən qurumun özündə ciddi islahatlar aparılmalıdır”
Məsələyə münasibət bildirən İqtisadi Resursların Öyrənilməsi Mərkəzinin direktoru Ruslan Atakişiyevin sözlərinə görə, Nazirlər Kabinetinin hazırkı kadr potensialı ilə qarşıya qoyulan tələbləri həyata keçirmək çətin olacaq: “Ona görə də sözügedən qurumun özündə ciddi islahatlar aparılmalıdır. Prezidentin çağırışı ondan ibarət idi ki, biz bazar iqtisadiyyatı şəraitində yaşayırıq. Bu şəraitə uyğun idarəetmədə kadrların olmasına ehtiyac var. Bu gün idarəetmədə elə insanlar var ki, bazar iqtisadiyyatının özünün mahiyyətini anlamaqda hələ də çətinlik çəkirlər. Çünki bazar iqtisadiyyatını anlamaq, bazar münasibətləri prinsiplərini tamamilə dərk etmək, əslində, asan bir şey deyil. Məsələn, bu gün iqtisadiyyatda hər hansı bir hadisə baş verəndə, sahibkarlıq mühiti ilə bağlı bir iş görmək lazım olanda təkliflərin bəziləri inzibati xarakterli tədbirlərə bənzəyir. Bu ondan irəli gəlir ki, kadrların bir çoxu köhnə sistemə uyğun təhsil alıb. Təfəkkürləri planlı iqtisadiyyata uyğun formalaşıb. Ona görə də bu düşüncəyə sahib olanlar effektiv idarəçiliklə məşğul olmurlar. Dövrün tələbləri ilə ayaqlaşa bilmirlər. Bax, problem əsasən bununla bağlıdır. İqtisadiyyatın dinamik inkişafını, qurumların səmərəli fəaliyyət göstərməsini istəyiriksə, idarəetmə kadrları buna uyğun olmalıdır. Ona görə də Nazirlər Kabinetinin hazırkı kadr bazası bu tələblərə cavab vermir. Bunu qurumun qərarlarında, fəaliyyətində görmək mümkündür. Ona görə də bu sahədə ciddi yeniliklər olmalıdır”.
Vidadi ORDAHALLI
