Pərviz Heydərov: “Bizdə minimum pensiyanın qaldırılması həm nominal, həm də xüsusən alıcılıq qabiliyyəti baxımından MDB ölkələri arasında ilk pillədə yer tutmağımıza şərait yaradıb”
Son bir ildə ölkəmizdə həyata keçirilən sosialyönümlü islahatlar nəticəsində pensiya təminatında köklü şəkildə artım baş verib. Bu gün Azərbaycanda pensiyanın alıcılıq qabiliyyəti yüksəkdir.
Bu məsələyə ölkə başçısı İlham Əliyev iqtisadi müşavirədə də toxunub və qeyd edib ki, pensiya təminatı sahəsində MDB ölkələrindən irəlidəyik.
“...Minimum pensiyanın alıcılıq qabiliyyətinin səviyyəsinə görə Azərbaycan bu gün MDB məkanında birinci yerdədir. Orta aylıq pensiyanın həcminə görə isə üçüncü yerdədir. Əlbəttə ki, bu, bizi qane edə bilməz. Ancaq mən müqayisə üçün bunu bildirməliyəm. Hər şey müqayisədə ölçülür. Gələcəkdə də minimum əməkhaqqının, minimum pensiyanın artırılması üçün bizdə iradə var və imkanlar buna uyğun olmalıdır. Buna nail olmaq üçün bütün maliyyə və iqtisadi sahədə tam şəffaflıq təmin edilməlidir” - deyə Prezident İlham Əliyev qeyd edib.
- “Sonuncu minimum pensiya həcminin qaldırılmasından sonra biz bu sahədə yeganə olaraq Rusiya ilə müqayisə olunan səviyyəyə gəlib çatmışıq”
Azərbaycanda pensiyanın alıcılıq qabiliyyətinə görə bizim üstünlük əldə etdiyimizi deyən tanınmış iqtisadçı-ekspert Pərviz Heydərov “Bakı-Xəbər”ə bildirdi ki, Azərbaycan bu sahədə MDB ölkələri arasında çox yüksək nəticələr əldə edib. O hesab edir ki, bu gün pensiyanın alıcılıq qabiliyyəti səviyyəsinin yüksək olması baxımından Azərbaycanın lider olması bu sahədə həyata keçirilən sosial islahatların nəticəsidir. “Son bir il ərzində istər minumum əməkhaqqının iki dəfə, bundan başqa, minimum pensiya məbləğinin özünün bir il ərzində iki dəfə artırılması əvvəlki illərə nəzər saldıqda görürük ki, mühüm və yeganə hadisə idi. Yəni heç vaxt bizim ölkədə bir il ərzində minimum pensiya iki dəfə artırılmamışdı. Bu, cari il ərzində ölkədə həyata keçirilən sosial paketin mühüm tərkib hissələrindən biri idi. Əsas məqsəd və hədəf əhalinin pensiya alan hissəsinin sosial müdafiəsini daha keyfiyyətli şəkildə təmin etmək və bu sahədə, ilk növbədə, Müstəqil Dövlətlər Birliyinə (MDB) daxil olan digər ölkələrlə müqayisədə ən yüksək pilləyə nail olmaq idi. Yəni Azərbaycanın bu sahədəki göstəricisi onun MDB ölkələri arasında ən yüksək nəticəyə nail olmasının təmin edilməsidir. Nəticədə də sonuncu minimum pensiya həcminin qaldırılmasından sonra biz bu sahədə yeganə olaraq Rusiya ilə müqayisə olunan səviyyəyə gəlib çatmışıq. Digər ölkələrlə müqayisədə Azərbaycan artıq minimum pensiya məbləği, xüsusən də həmin pensiyanın alıcılıq qabiliyyətinin səviyyəsi baxımından da bütün MDB ölkələrindən irəli mövqedə qərarlaşıb. Bu mühüm hadisədir. Bizim ölkədə minimum pensiyanın məbləğinin qaldırılması ilə pensiyaçılar üçün müəyyən olunan yaşayış minimumu göstərilib. Biz bu sahədə də ilk dəfə olaraq irəli keçmişik. Əvvəlki illərdə nəinki minimum pensiya məbləği, heç əməkhaqqının özü də yaşayış minimumuna çatmırdı, amma bu ilin martında, ilk dəfə olaraq, həm minimum əməkhaqqı səviyyəsi, həm də minimum pensiya məbləği yaşayış minimumunda göstəriləni də keçmiş oldu. Bilirsiniz ki, yaşayış minimumu pensiyaçılar üçün hər il ərzində ayrıca nəzərdə tutulur. İndi bu il həmin məbləği də keçmişik”.
P.Heydərov qeyd etdi ki, bu məsələdə söhbət MDB ölkələri ilə müqayisədən gedirsə, burada rəqəm götürüb, nominal şəkildə məsələyə yanaşmaq doğru deyil. O hesab edir ki, burada məsələ minimum pensiyaların həmin ölkələrə uyğun alıcılıq qabiliyyətindən gedir. Onun sözlərinə görə, bu gün Ermənistan, Gürcüstan, Qazaxıstan, digər MDB ölkələri ilə müqayisədə Azərbaycanda pensiyanın alıcılıq qabiliyyətinin yüksək olması bizim uğurumuzdur: “Bizdə minimum pensiyanın qaldırılması həm nominal, həm də xüsusən alıcılıq qabiliyyəti baxımından MDB ölkələri arasında ilk pillədə yer tutmağımıza şərait yaradıb”.
İradə SARIYEVA
.jpg)
