“Vergi orqanları, digər hüquq-mühafizə orqanları bu tipli dırnaqarası sahibkarlara qarşı çox ciddi tədbirlər görməlidirlər. Həmin sahibkarlar da bilməlidirlər ki, vergiləri ödəmək onların borcudur. Onlardan heç bir başqa ödəniş tələb oluna bilməz”. Bu sözləri Azərbaycan Prezidenti İlham Əliyev oktyabrın 15-də keçirilən iqtisadi müşavirədə deyib.
Prezident çıxışı zamanı vergidən yayınan sahibkarlar haqqında bunları deyib: “Mən bütün qurumlar qarşısında bu vəzifəni qoydum, maksimum şəffaflıq, dürüstlük olmalıdır, rüşvətxorluğa, korrupsiyaya son qoyulmalıdır. Ancaq sahibkarlar dövlət vergisini tam şəkildə ödəməlidirlər. Biz bu vergilər hesabına sosial layihələri icra edirik, vergilər hesabına köçkünləri yerləşdiririk, vergilər hesabına ordumuzu gücləndiririk. Ona görə də vergini ödəməyən cinayət məsuliyyətinə cəlb edilməlidir. Bir çox hallarda eşidirik ki, bizdə standartlar, meyarlar Avropa standartlarına uyğun olmalıdır. Avropa ölkələrində vergisini ödəməyənə hansı cəza verilirsə, biz də onlardan nümunə götürməliyik. Ona görə vergidən yayınmaq çox ciddi nəticələrə gətirib çıxarmalıdır. Mən bütün aidiyyəti qurumlara bir daha bu tapşırığı verirəm”.
Dövlət vergisini tam şəkildə ödəməyən sahibkarların qanun çərçivəsində cəzalandırılmasını ekspertlər də müsbət dəyərləndirirlər.
- Musa Quliyev: “Sahibkarlar da gərək vicdanlı davransın, dövlətin vergisini vaxtlı-vaxtında ödəsinlər”
Millət vəkili Musa Quliyev bildirdi ki, vergidən yayınma çox ciddi məsələdir: “Prezident sahibkarlara birbaşa öz tövsiyə və tapşırıqlarını verdi. Hökumət sahibkarların inkişafına hər zaman dəstək verir. Bundan sonra da yardım edəcək. Sahibkarlar da gərək vicdanlı davransın, dövlətin vergisini vaxtlı-vaxtında ödəsinlər. Dövlətin büdcəsi ən çox vergidən formalaşır. Çünki formalaşan büdcə əsasında biz sosial siyasətimizi formalaşdırırıq. Həssas təbəqənin vəziyyətini yaxşılaşdırırıq”.
Millət vəkilinin sözlərinə görə, korrupsiya və rüşvətxorluqla mübarizə gedir və Prezidentin müşavirədəki çıxışından sonra bu sahədə mübarizə daha da gücləndiriləcək: “Hesab edirəm ki, müşavirədə Prezident doğru söylədi ki, ictimaiyyət də bu məsələdə aktiv olmalıdır”.
- Fikrət Yusifov: “Qərb ölkələrində vergidən yayınanlara hansı cəzalar tətbiq olunursa, eyni hal bizdə də tətbiq olunmalıdır”
İqtisadçı-ekspert Fikrət Yusifov qeyd etdi ki, Avropa ölkələrinin qanunvericiliyində vergidən yayınmaqla bağlı ciddi cəzalar nəzərdə tutulur. Ümumiyyətlə, vergidən yayınmaq ən ağır cinayətlərdən biri hesab olunur: “Oktyabrın 15-də keçirilən iqtisadi müşavirədə Prezident İlham Əliyev də bu məsələyə xüsusi olaraq toxundu. Məlumdur ki, cari ilin əvvəlindən etibarən iş adamlarına, sahibkarlara vergi güzəştləri tətbiq olunub. Buna baxmayaraq, vergidən yayınan sahibkarlar var. Dövlətin sahibkarlıqla məşğul olanlara şərait yaratmasına baxmayaraq, onlar bu güzəştdən istifadə edib vergidən yayınırlar. Qanunvericilikdə vergidən yayınanlarla bağlı cəzalar sərtləşdirilməlidir. Qərb ölkələrində vergidən yayınanlara hansı cəzalar tətbiq olunursa, eyni hal bizdə də tətbiq olunmalıdır. O zaman iş adamları, sahibkarlar dövlətin vergisini ödəməkdən yayınmaz”.
Günel CƏLİLOVA
