“Zirvə görüşlərimiz ənənəvi olaraq əməkdaşlığımızın müxtəlif sahələrini əhatə edən mövzulara həsr olunur. Kiçik və orta sahibkarlığa həsr olunan builki Zirvə görüşünün mövzusu da mühüm aktuallıq kəsb edir". Bunu Bakıda keçirilən Türkdilli Dövlətlərin Əməkdaşlıq Şurasının VII Zirvə görüşündə Prezident İlham Əliyev deyib.
Dövlət başçısı bildirib ki, 2017-ci ildə Azərbaycanda Kiçik və Orta Sahibkarlığın İnkişafı Agentliyi yaradılıb, agentliyin yaradılmasında da məqsəd məhz kiçik və orta sahibkarlığın inkişafının dəstəklənməsidir: “Ölkə daxilində və xaricində geniş fəaliyyət imkanlarına malik güclü sahibkarlar sinfi formalaşıb. Sahibkarlığın İnkişafı Fondu tərəfindən indiyə qədər 36 min sahibkara 1,4 milyard ABŞ dolları həcmində güzəştli kredit ayrılıb. 2018-ci ildə özəl sektorun ölkəmizin ümumdaxili məhsulunda payı 85 faiz təşkil edib. Son 16 ildə Azərbaycan iqtisadiyyatı 3 dəfədən çox artıb. Ölkəyə 270 milyard dollardan çox sərmayə qoyulub ki, bunun da yarısı xarici sərmayədir”.
Ölkə başçısı onu da qeyd edib ki, iqtisadi sahədə aparılan islahatlar beynəlxalq təşkilatlar tərəfindən də təqdir olunur. Dünya Bankının 2020-ci il üzrə "Doing Business" hesabatında Azərbaycan ən islahatçı 20 ölkə sırasında yer alıb.
Bütün bu deyilənlərin fonunda, kiçik və orta sahibkarlığın inkişafı sahəsində Azərbaycan təcrübəsi başqa türk ölkələri üçün necə əhəmiyyətli rol oynayacaq?
“Həmin dövlətlər Azərbaycanın bu sahədə təcrübəsini öyrənsələr, o zaman biznesin inkişafı sahəsində praktiki baxımdan müsbət nəticələr əldə edə bilərlər”
Məsələyə münasibət bildirən iqtisad elmləri doktoru Fikrət Yusifovun sözlərinə görə, Azərbaycanın bu sahədə əldə etdiyi nailiyyətlər digər türkdilli ölkələr üçün faydalı ola bilər: “Məsələ ondadır ki, Azərbaycanda kiçik və orta sahibkarlığın inkişafı istiqamətində ötən illər ərzində bir sıra işlər görülüb. Sistemli islahatlar aparılıb və bu işlər çərçivəsində bir sıra çox önəmli qanunlar, qərarlar qəbul olunub. Bütün bunları etməkdə məqsəd kiçik və orta sahibkarlığı daha da inkişaf etdirmək, həmçinin, biznes mühitini daha da yaxşılaşdırmaq və bu sahədə mövcud olan maneələri aradan qaldırmaq olub. Ötən illər ərzində həyata keçirilən islahatlar çərçivəsində Azərbaycan bu sahədə böyük təcrübə əldə edib. Təsadüfi deyil ki, Azərbaycanın bu sahədə atdığı addımlar beynəlxalq reytinq agentlikləri tərəfindən yüksək qiymətləndirilir. Reytinq sıralamasında Azərbaycanın irəliləməsinin başlıca səbəblərindən biri də sahibkarlığın inkişafı ilə bağlı həyata keçirilən islahatlardır. Ona görə də türkdilli dövlətlər kiçik və orta sahibkarlığın inkişafı sahəsində Azərbaycan təcrübəsindən bəhrələnməlidirlər. Xüsusən də Orta Asiyada yerləşən türkdilli dövlətlərin bundan faydalanması daha məqsədəuyğundur. Hesab edirəm ki, həmin dövlətlər Azərbaycanın bu sahədə təcrübəsini öyrənsələr, o zaman biznesin inkişafı sahəsində praktiki baxımdan müsbət nəticələr əldə edə bilərlər. Nəzərə almaq lazımdır ki, Orta Asiyada yerləşən türkdilli ölkələr bizim kimi uzun illər SSRİ tərkibində olublar. Azad sahibkarlıqla bağlı fəaliyyət 1991-ci ildən sonra genişləndi. Ona görə də bu yöndə təcrübə mübadiləsinin genişləndirilməsi, Azərbaycan təcrübəsinin öyrənilməsi faydalı olacaq”.
Vidadi ORDAHALLI
