Tarixi dostluq, qarşılıqlı etimad, səmimi münasibətlər, yüksək səviyyəli əməkdaşlıq əsasında qurulan Azərbaycan-Türkiyə əlaqələri daim möhkəmlənməkdədir. Xalqlarımızın eyni soykökə, dilə, dinə, mədəniyyətə və bir çox digər qarşılıqlı bağa malik olması bu iki ölkəni həmişə bir-birinə doğma edib, sevincli, kədərli günlərdə də biri digərinin yanında olub.
Azərbaycan və Türkiyə arasında əlaqələrin belə səviyyədə inkişafı təkcə bu dövlətlərin yox, həm də regionun ümumi tərəqqisinə, sabitliyin bərqərar olmasına mühüm töhfələr verir. Eyni zamanda, Türk dünyasının daha sıx şəkildə bir araya gəlməsini bu gün şərtləndirən mühüm amillərdən biri də məhz Azərbaycan və Türkiyənin münasibətlərinin inkişafından keçir.
Hazırda siyasi müstəvidə ölkələrimiz arasında yüksək səviyyədə münasibətlər formalaşmaqla yanaşı, iqtisadi sahədə əlaqələr inkişaf edir. Azərbaycan-Türkiyə iqtisadi əlaqələri inkişaf edərək, hər iki ölkə bir-birinə qarşılıqlı sərmayə yatırır.
Məlumat üçün bildirək ki, Azərbaycan Türkiyə iqtisadiyyatına ən çox sərmayə qoyan ölkələrdən biridir.
Oktyabrın 15-də Bakıda Türkdilli Dövlətlərin Əməkdaşlıq Şurasının VII Zirvə görüşü keçirilən zaman Prezident İlham Əliyev qeyd edib ki, Azərbaycanın Türkiyə iqtisadiyyatına sərmayəsi 15 milyard ABŞ dolları, Türkiyənin Azərbaycan iqtisadiyyatına qoyulan sərmayəsi isə 12 milyard ABŞ dolları təşkil edir.
İ.Əliyev qeyd edib ki, tarixən qədim İpək Yolunun üzərində yerləşən ölkələrimiz arasında nəqliyyat sahəsində əməkdaşlıq, təbii ki, əsas istiqamətlərdən biridir: “Azərbaycan Şərq-Qərb nəqliyyat dəhlizinin fəal iştirakçısıdır. 2017-ci ilin oktyabr ayında istifadəyə verilmiş Bakı-Tbilisi-Qars dəmir yolu tarixi İpək Yolunun bərpasına bizim müştərək töhfəmizdir. Bakı Beynəlxalq Dəniz Limanı 15 milyon ton yük və 100 min konteyner yükaşırma qabiliyyətinə malikdir. Ehtiyac olduğu təqdirdə limanın yükaşırma qabiliyyəti 25 milyon ton yük və 1 milyon konteynerə kimi artırıla bilər. Azərbaycan etibarlı tranzit ölkəsi olaraq türkdilli ölkələrin dünya bazarlarına çıxışı üçün səylərini davam etdirir. 2018-ci ildə türkdilli ölkələrdən 8 milyon ton yük Azərbaycan vasitəsilə daşınıb".
“Türkiyə Azərbaycanın qeyri-neft sektoruna yatırdığı investisiyanın həcminə görə digər ölkələrdən seçilir”
Azərbaycanın Türkiyə iqtisadiyyatına, eynilə Türkiyənin ölkəmizə yatırdığı sərmayənin əhəmiyyəti barəsində danışan millət vəkili Rüfət Quliyev qeyd etdi ki, Azərbaycanla Türkiyə arasında ticarət əməkdaşlığının potensialı inkişaf səviyyəsindədir. Türkiyə ilə Azərbaycan arasında iqtisadi münasibətlər çox güclü olaraq inkişaf edir: “Qarşılıqlı investisiyalar iki ölkə arasında iqtisadi əməkdaşlığın mühüm göstəricisidir. Azərbaycanın Türkiyə iqtisadiyyatına investisiyalarının ümumi həcmi 15 milyard dollar səviyyəsindədir. Hər il iki ölkə arasında ticari-iqtisadi münasibətlər şaxələnir və yeni sahələri əhatə edir. Azərbaycanın Türkiyəyə investisiyalarının bir qismi neft-qaz sahəsinə yerləşdirilib. Türkiyə, öz növbəsində, Azərbaycana 12 milyard dollar yatırıb, bunun da müəyyən hissəsi neft sektoruna yerləşdirilib. Türkiyə Azərbaycanın qeyri-neft sektoruna yatırdığı investisiyanın həcminə görə digər ölkələrdən seçilir. Təxminən Azərbaycanda Türkiyə kapitalı ilə 3400 şirkət, Türkiyədə isə Azərbaycan kapitalı ilə 2400 şirkət fəaliyyət göstərir”.
Həmsöhbətimiz onu da vurğuladı ki, müstəqilliyin ilk illərində Azərbaycanda sahibkarlıq sinfi formalaşmağa başlayanda türk qardaşlarımız yanımızda olub.
Günel CƏLİLOVA
